ഇത്രയൊക്കെ പറ്റുമോ... കെവി തോമസ് സെമിനാറില് പങ്കെടുത്താല് മൂക്കില് കയറ്റുമെന്ന് പറഞ്ഞവര് എവിടേയെന്ന് ചോദിച്ച് പിണറായി തിരികൊളുത്തി; കയ്യടിച്ച് പ്രോത്സാഹിപ്പിച്ച് തോമസ് മാഷ്; പിണറായി വിജയനെ വാനോളം പുകഴ്ത്തി കോണ്ഗ്രസ് നേതാക്കള്ക്ക് തട്ട് കൊടുത്ത് കെവി തോമസ്
കെ.വി. തോമസ് എന്ന കോണ്ഗ്രസ് നേതാവിന് കമ്മ്യൂണിസ്റ്റ് വേദിയില് കിട്ടിയ കൈയ്യടി കണ്ട് കോണ്ഗ്രസ് നേതാക്കള് നടുങ്ങി. കെ.വി. തോമസ് എന്ന തോമസ് മാഷ് അക്ഷരാര്ത്ഥത്തില് കമ്മ്യൂണിസ്റ്റാകുന്ന കാഴ്ചയാണ് കണ്ടത്. എകെജിയെപ്പറ്റി പറഞ്ഞ് സദസിനെ ഇളക്കിമറിച്ചു.
പണ്ട് എകെജിയുടെ പാര്ളമെന്റ് പ്രസംഗം കേള്ക്കാന് നെഹ്റു സ്ഥിരം എത്തുമായിരുന്നു. മലയാളം കലര്ന്ന ഇംഗ്ലീഷ് പ്രസംഗം എന്തിന് നെഹ്റു കേള്ക്കുന്നതെന്ന് കുറ്റപ്പെടുത്തിയപ്പോള് അതാണ് സാധാരണക്കാരന്റെ ഭാഷയെന്ന് നെഹ്റു പറഞ്ഞു. ഇത് തോമസ് മാഷ് പറഞ്ഞതോടെ സകലരും കൈയ്യടിച്ചു. സുധാകരനിട്ടുള്ള താങ്ങാണെന്ന് എല്ലാവര്ക്കുമറിയാം.
മുഖ്യമന്ത്രി പിണറായി വിജയനെ വാനോളം പുകഴ്ത്തിയും സില്വര്ലൈന് പദ്ധതിക്കു പിന്തുണ പ്രഖ്യാപിച്ചുമാണ് പാര്ട്ടി കോണ്ഗ്രസ് സെമിനാറിനെ കെ.വി.തോമസ് ചൂടുപിടിപ്പിച്ചത്. പാര്ട്ടി വിലക്കു ലംഘിച്ചു സെമിനാറിനെത്തിയ അദ്ദേഹം കോണ്ഗ്രസുകാരനായിരിക്കുമെന്ന് ആവര്ത്തിച്ചെങ്കിലും കോണ്ഗ്രസ് നേതൃത്വത്തെ കുത്തിനോവിക്കുന്നതായിരുന്നു പ്രസംഗം.
രാഹുല് ഗാന്ധിയെ നേതാവായി അംഗീകരിക്കുന്നെങ്കില് സംസ്ഥാനങ്ങളെ ദുര്ബലപ്പെടുത്തുന്ന കേന്ദ്രത്തിനെതിരെ പൊരുതണമെന്ന അദ്ദേഹത്തിന്റെ പാര്ലമെന്റിലെ ആഹ്വാനം കോണ്ഗ്രസിലെ സഹപ്രവര്ത്തകര് അനുസരിക്കണമെന്നു തോമസ് ആവശ്യപ്പെട്ടു. അതിഥികളില് ആദ്യം വേദിയിലെത്തിയ തോമസിന് ആവേശകരമായ വരവേല്പാണു ലഭിച്ചത്. സെമിനാറില് പങ്കെടുത്താല് തോമസിന്റെ മൂക്ക് ചെത്തുമെന്നു ചിലര് പറഞ്ഞിട്ട് ഒരു ചുക്കും സംഭവിച്ചില്ലെന്നു മുഖ്യമന്ത്രി പരിഹസിച്ചു. കോണ്ഗ്രസുകാരനായാണ് തോമസ് പങ്കെടുക്കുന്നത്. നാളെയും വലുതായൊന്നും സംഭവിക്കാനില്ലെന്നും പിണറായി പറഞ്ഞു.
അതേസമയം സിപിഐ എം പാര്ട്ടി കോണ്ഗ്രസ് സെമിനാറില് പങ്കെടുക്കാന് വന്നത് ശരിയായ തീരുമാനമെന്ന് കെ വി തോമസ് പറഞ്ഞു. ഉചിതമായ തീരുമാനം എടുക്കാന് ഉപദേശിച്ചത് മുഖ്യമന്ത്രി പിണറായി വിജയനാണെന്നും അദ്ദേഹം പറഞ്ഞു. ചര്ച്ചയിലേക്ക് വിളിച്ചവര്ക്ക് നന്ദി പറഞ്ഞുകൊണ്ടായിരുന്നു കെ വി തോമസ് പ്രസംഗം തുടങ്ങിയത്.
പിണറായി കേരളത്തിന്റെ അഭിമാനമാണ്. പിണറായി നല്ല മുഖ്യമന്ത്രിയെന്നതില് തനിക്ക് അനുഭവമുണ്ട്. വൈപ്പിന് പദ്ധതി പൂര്ത്തിയാക്കിയത് മുഖ്യമന്ത്രിയുടെ വില്പവര് കൊണ്ടാണ്. കൊവിഡിനെ ഏറ്റവും നന്നായി നേരിട്ട സംസ്ഥാനമാണ് കേരളം. കൊവിഡിലെ കേന്ദ്രസമീപനം നമ്മള് കണ്ടതാണെന്നും കെ വി തോമസ് പറഞ്ഞു.
കെ റെയില് സംസ്ഥാനത്തിന് ഗുണകരമായ പദ്ധതിയാണെന്നും വികസനത്തിനായി ഒറ്റക്കെട്ടായി നില്ക്കണമെന്നും അദ്ദേഹം കൂട്ടിച്ചേര്ത്തു. കെ റെയിലിനെ എതിര്ക്കുകയാണോ ചെയ്യേണ്ടത്, പദ്ധതി കൊണ്ടുവന്നത് പിണറായി ആയതുകൊണ്ട് എതിര്ക്കണമെന്നില്ലെന്നും കെ വി തോമസ് വ്യക്തമാക്കി.
അതേസമയം പാര്ട്ടിയുടെ വിലക്കു ലംഘിച്ചു സിപിഎമ്മിന്റെ പാര്ട്ടി കോണ്ഗ്രസ് സെമിനാറില് പങ്കെടുത്ത എഐസിസി അംഗം കെ.വി.തോമസിനെതിരെ കടുത്ത നടപടി വേണമെന്നു കെപിസിസി നേതൃത്വം ആവശ്യപ്പെട്ടു. പാര്ട്ടിയുടെ അച്ചടക്കവും തീരുമാനവും ലംഘിച്ച കെ.വി.തോമസ് പാര്ട്ടിക്ക് അവമതിപ്പുണ്ടാക്കുന്ന തരത്തില് വാര്ത്താ സമ്മേളനവും നടത്തിയെന്നു കെപിസിസി അധ്യക്ഷന് കെ.സുധാകരന് കോണ്ഗ്രസ് അധ്യക്ഷ സോണിയാ ഗാന്ധിക്കു നല്കിയ കത്തില് ചൂണ്ടിക്കാട്ടി. കഴിഞ്ഞ ഒരു വര്ഷമായി സിപിഎം നേതാക്കളുമായി സമ്പര്ക്കം പുലര്ത്തുന്ന കെ.വി.തോമസ്, സെമിനാറില് പങ്കെടുത്തത് ആസൂത്രിതമായാണെന്നും കുറ്റപ്പെടുത്തി.
"
https://www.facebook.com/Malayalivartha
