മലപ്പുറം അരീക്കോട് എംഎസ്പി ക്യാമ്പില്‍ നിന്ന് കാണാതായ പോലീസുകാരനെ കണ്ടെത്തി....ഇന്ന് രാവിലെ ഭാര്യയോടൊപ്പം അരീക്കോട് പോലീസ് സ്റ്റേഷനില്‍ ഹാജരാവുകയായിരുന്നു. ഉച്ചയോടെ മഞ്ചേരി കോടതിയില്‍ ഹാജരാക്കും.

സ്പെഷ്യല്‍ ഓപ്പറേറ്റിങ് ഗ്രൂപ്പിലെ പോലീസുകാരനായ വടകര സ്വദേശി പി.കെ. മുബഷീറിനെ(29)യാണ് ഇന്ന് കണ്ടെത്തിയത്.

ക്യാമ്പില്‍നിന്ന് പോയ മുബഷീര്‍, വടകരയിലെ വീട്ടിലുണ്ടായിരുന്നു എന്നാണ് പോലീസ് നല്‍കുന്ന വിവരം. ഇന്ന് രാവിലെ ഭാര്യയോടൊപ്പം അരീക്കോട് പോലീസ് സ്റ്റേഷനില്‍ ഹാജരാവുകയായിരുന്നു. മഞ്ചേരി കോടതിയില്‍ ഉച്ചയോടെ ഹാജരാക്കും.

മുബഷീര്‍ ജോലി സമ്മര്‍ദം കാരണമാണ് ക്യാമ്പില്‍നിന്ന് പോയതെന്നാണ് പോലീസ് നല്‍കുന്ന വിവരം. മാത്രവുമല്ല അരീക്കോട് സ്റ്റേഷനില്‍ എത്തിയപ്പോഴും ഇനി ജോലിയില്‍ തുടരാനാകില്ലെന്ന് പറഞ്ഞ് യുവാവ് കരഞ്ഞതായും പോലീസുകാര്‍ പറയുന്നതായും സൂചനകള്‍. 

മുബഷീറിനെ കാണാനില്ലെന്ന് അരീക്കോട് എം.എസ്.പി. ക്യാമ്പ് ഡെപ്യൂട്ടി കമാന്‍ഡന്റ് അരീക്കോട് പോലീസിലും ഭാര്യ ഷാഹിന ബത്തേരി പോലീസിലും പരാതി നല്‍കിയിട്ടുണ്ടായിരുന്നു. വെള്ളിയാഴ്ചയാണ് മുബഷീറിനെ ക്യാമ്പില്‍നിന്ന് കാണാതായത്. ഇതിനുപിന്നാലെ മുബഷീറിന്റെ പേരിലെഴുതിയ കത്തും പുറത്തുവന്നിട്ടുണ്ടായിരുന്നു.

ഇനിയും മേലുദ്യോഗസ്ഥരുടെ പീഡനം സഹിച്ച് ക്യാമ്പില്‍ തുടരാനാകില്ലെന്നാണ് കത്തില്‍ എഴുതിയിരിക്കുന്നത്. മെസ്സില്‍ കട്ടന്‍ചായ നിര്‍ത്തലാക്കിയത് ചോദ്യംചെയ്തതാണ് പ്രശ്നങ്ങളുടെ തുടക്കമെന്നും കത്തിലുണ്ടായിരുന്നു. ഈ വിഷയത്തിന്റെ പേരില്‍ ക്യാമ്പില്‍ ദ്രോഹിച്ചതായും പാലക്കാട് ക്യാമ്പിലേക്ക് സ്ഥലം മാറ്റിയതായും കത്തില്‍ ആരോപണമുണ്ട്. .

കൂടാതെ കാനഡയിലായിരുന്ന ഭാര്യ രണ്ടാഴ്ചത്തെ അവധിക്ക് നാട്ടിലെത്തിയിട്ടും തന്നോടുള്ള ദേഷ്യം കാരണം ഭാര്യയെ കാണാന്‍ ഒരുദിവസത്തെ അവധി പോലും അനുവദിച്ചില്ല.
മേലുദ്യോഗസ്ഥരുടെ പീഡനം ഉള്‍പ്പെടെ ആരോപിച്ചുള്ള കത്ത് പുറത്തുവന്നതിന് പിന്നാലെ വകുപ്പുതല അന്വേഷണത്തിനും സാധ്യതയേറെ.