ഭര്ത്താവില് നിന്നും പണം ഒളിപ്പിക്കാനായി വ്യാജ മോഷണ പരാതിയും ബോധം കെടലും..... കള്ളനെ തേടി അലഞ്ഞ് പോലീസ് എത്തിച്ചേര്ന്നത് വീട്ടമ്മയുടെ മുന്നില്, ഒടുവില് കുറ്റം ഏറ്റു പറഞ്ഞ് വീട്ടമ്മ....
ഭര്ത്താവില് നിന്നും പണം ഒളിപ്പിക്കാനായി വ്യാജ മോഷണ പരാതിയും ബോധം കെടലും..... കള്ളനെ തേടി അലഞ്ഞ് പോലീസ് എത്തിച്ചേര്ന്നത് വീട്ടമ്മയുടെ മുന്നില്, ഒടുവില് കുറ്റം ഏറ്റു പറഞ്ഞ് വീട്ടമ്മ....
പട്ടാഴി തെക്കേത്തേരിയിലാണ് ഒരു രാത്രിയും പകലും പൊലീസിനെ കുഴക്കിയ സംഭവം ഉണ്ടായത്. ഉദ്ദേശ്യം നല്ലതായതിനാല് കേസെടുക്കാനില്ലെന്ന് പൊലീസ്.
ഇന്നലെ രാത്രി 1.30നാണ് കുന്നിക്കോട് പൊലീസ് സ്റ്റേഷനിലേക്ക് വീട്ടമ്മയുടെ ഫോണ് എത്തിയത്. വീടിനുള്ളില് ബാഗില് സൂക്ഷിച്ച 50000 രൂപ മോഷ്ടാവ് കൊണ്ടു പോയി എന്നാണ് അറിയിച്ചത്. ഉടന് പൊലീസ് സ്ഥലത്തെത്തി. പരിശോധനകള് തുടങ്ങി.
മേല്ക്കൂരയിലെ ഒരു ഓടു മാത്രം പൊളിച്ച മോഷ്ടാവ് തോട്ടി ഉപയോഗിച്ചു മുറിയില് കസേരയില് വച്ചിരുന്ന ബാഗ് ഉയര്ത്തിയെടുത്ത് പണം അപഹരിച്ചെന്നായിരുന്നു മൊഴി നല്കിയത്. പൊളിച്ച ഓടിന് നേരെ താഴെയുള്ള കസേരയില് തന്നെയായിരുന്നു പണം അടങ്ങിയ ബാഗെന്നും ഒച്ച കേട്ട് ഉണര്ന്ന് കതക് തുറന്നപ്പോള് മോഷ്ടാവ് ഓടിപ്പോയെന്നുമുള്ള മൊഴി കേട്ട് പോലീസിന് സംശയമായി.
തോട്ടി ഉപയോഗിച്ച് ബാഗ് എടുക്കാന് കഴിയുമോ എന്ന കാര്യത്തിലും സംശയമേറി. ലോട്ടറി വില്പനക്കാരിയായ വീട്ടമ്മ ചെറിയ വരുമാനത്തില് നിന്നു സ്വരൂപിച്ച തുക നഷ്ടമായ സംഭവമായതിനാല് അന്വേഷണം തുടര്ന്നു. ഇതിനിടയ്ക്ക് സ്റ്റേഷനിലേക്കു വിളിപ്പിച്ച വീട്ടമ്മ പണം നഷ്ടപ്പെട്ടതിന്റെ വേദനയില് 'ബോധരഹിത'യാകുകയും ചെയതതോടെ പൊലീസും ധര്മ സങ്കടത്തിലായി.
അവസാനം ് ഭര്ത്താവിനെയും ഭാര്യയെയും ഒറ്റക്കിരുത്തി നടത്തിയ ചോദ്യം ചെയ്യലിലാണ് സത്യം വെളിച്ചത്താകുന്നത്. ഭര്ത്താവ് പണം ധൂര്ത്തടിക്കാതിരിക്കാന് കൊട്ടാരക്കരയിലെ സ്വകാര്യ ബാങ്കില് നിക്ഷേപിച്ചു. അധികം ഉണ്ടായിരുന്ന പണം വീട്ടിലുണ്ടായിരുന്ന ഒരു പുസ്തകത്തിലും സൂക്ഷിച്ചു. പണം എവിടെയെന്ന ഭര്ത്താവിന്റെ ചോദ്യത്തിന് ഉത്തരം നല്കാനാണ് മോഷണ നാടകം കളിച്ചത്. മോഷണ നാടകം പൊളിഞ്ഞെങ്കിലും വീട്ടമ്മയുടെ സദുദ്ദേശ്യം കണക്കിലെടുത്ത് ഭര്ത്താവിനെ ഉപദേശിച്ച പൊലീസ് കേസെടുക്കാതെ രണ്ടു പേരെയും പറഞ്ഞയച്ചു.
https://www.facebook.com/Malayalivartha
