ഫയലുകള് ഇനി വേഗത്തില് തീര്പ്പാകും.... രണ്ടു തട്ടില് മാത്രം ഫയലുകള് പരിശോധിച്ചാല് മതിയെന്ന ശുപാര്ശയ്ക്ക് മന്ത്രിസഭായോഗത്തിന്റെ അംഗീകാരം
ഫയലുകള് ഇനി വേഗത്തില് തീര്പ്പാകും.... രണ്ടു തട്ടില് മാത്രം ഫയലുകള് പരിശോധിച്ചാല് മതിയെന്ന ശുപാര്ശയ്ക്ക് മന്ത്രിസഭായോഗത്തിന്റെ അംഗീകാരം.
ഭരണപരിഷ്കാര കമ്മിഷന് ശുപാര്ശയുടെയും തുടര്ന്നുള്ള ചര്ച്ചകളുടെയും അടിസ്ഥാനത്തില് അണ്ടര് സെക്രട്ടറി മുതല് അഡിഷണല് സെക്രട്ടറി വരെയുള്ള ഓഫീസര്മാരുടെ ഫയല് പരിശോധനാതലങ്ങള് രണ്ടായി ചുരുക്കാനാണു തീരുമാനമായത്. 46 വകുപ്പുകളുമായി ബന്ധപ്പെട്ടുള്ള ഫയലുകളാണ് സെക്രട്ടേറിയറ്റില് എത്തുന്നത്.
പൊതുഭരണം ഒഴികെയുള്ള വകുപ്പുകളില് അണ്ടര് സെക്രട്ടറി കണ്ട ഫയല് ഡെപ്യൂട്ടി സെക്രട്ടറി, ജോയിന്റ് സെക്രട്ടറി, അഡിഷണല് സെക്രട്ടറി, സ്പെഷ്യല് സെക്രട്ടറിയുണ്ടെങ്കില് അവരുടെയും പരിശോധനകള്ക്കു ശേഷമാണു സെക്രട്ടറി തലത്തില് എത്തുക .ഇതൊഴിവാകും.
മന്ത്രിമാരുടെ മുന്നില് എത്തേണ്ട ഫയലുകള് അണ്ടര് സെക്രട്ടറി കണ്ടശേഷം ഡെപ്യൂട്ടി സെക്രട്ടറി, ജോയിന്റ് സെക്രട്ടറി, അഡിഷണല് സെക്രട്ടറി എന്നിവരില് ഒരാള് പരിശോധിച്ചാല് മതി.
പൊതുഭരണ വകുപ്പില് അസിസ്റ്റന്റും സെക്ഷന് ഓഫീസറും തയ്യാറാക്കുന്ന ഫയലുകള് അണ്ടര് സെക്രട്ടറിയുടെ പരിശോധനയ്ക്കു ശേഷം സെക്രട്ടറി തലത്തില് എത്തുന്ന സംവിധാനം നേരത്തെ നടപ്പാക്കിയിട്ടുണ്ടായിരുന്നു.
ഉന്നത തലത്തില് പരിശോധിക്കുന്നത് ഒന്നില്കൂടുതല് വ്യക്തികളെ ബാധിക്കുന്ന പരാതികള്, സര്ക്കാരിന്റെ നയപരമായ തീരുമാനങ്ങള്, നയപരമായി പ്രാധാന്യമുള്ള വ്യക്തിപരമായ പരാതികള്, സാമ്പത്തിക ബാദ്ധ്യതയുണ്ടാക്കുന്ന തീരുമാനങ്ങള്, സങ്കീര്ണ്ണമായ നിയമപ്രശ്നങ്ങളുള്ള വിഷയങ്ങള്, ഫയല്നീക്കം വേഗത്തിലാവും
ഫയല് പരിശോധന നടത്തുന്നതിന് ഓരോ വകുപ്പിലുമുള്ള ഉദ്യോഗസ്ഥ തസ്തികളുടെ അടിസ്ഥാനത്തില് രണ്ടു പരിശോധന തട്ടുകള് എങ്ങനെയാവണമെന്ന് അതതു വകുപ്പു സെക്രട്ടറിമാര് വകുപ്പ് മന്ത്രിമാരുമായി കൂടിയാലോചിച്ച് ഉത്തരവിറക്കും.
വിവിധ തട്ടുകളിലുള്ള പരിശോധനയും നോട്ട്കുറിക്കലും മൂലം ഒച്ചിന്റെ വേഗതയിലായിരുന്നു ഫയല് നീക്കം. അതിനി വേഗത്തിലാവും.ഫയല് പരിശോധനയുടെ തട്ടുകള് കുറയുന്നതോടെ പല തസ്തികകളും ഭാവിയില് ഇല്ലാതാവുമെന്ന ആശങ്കയിലാണ് ജീവനക്കാരുടെ സംഘടനകള്.
"
https://www.facebook.com/Malayalivartha
