തമിഴ്നാട്ടിലെ സർക്കാർ സ്‌കൂൾ വിദ്യാർത്ഥികൾക്ക് ഉച്ചഭക്ഷണ പദ്ധതിയിലൂടെ ആഴ്‌ചയിൽ ഒരുദിവസം ചിക്കൻ ബിരിയാണി വിളമ്പാനൊരുങ്ങുന്നതായി സൂചനകൾ‍. ആഗസ്റ്റ് അഞ്ചിന് സംസ്ഥാന ബഡ്‌ജറ്റ് അവതരിപ്പിക്കുന്നതിന് മുന്നോടിയായി കഴിഞ്ഞ ദിവസം നടന്ന യോഗത്തിലാണ് നിർദേശം വന്നതെന്നാണ് റിപ്പോർട്ടുകളുള്ളത്. അദ്ധ്യാപക സംഘടനാ പ്രതിനിധികളുമായി വിദ്യാഭ്യാസ മന്ത്രി എ രാജ്‌മോഹൻ കൂടിക്കാഴ്‌ച നടത്തിയിരുന്നു.

ഗുണനിലവാരം കൂടിയ അരി പാചകത്തിനായി ഉപയോഗിക്കണമെന്നും ആഴ്‌ചയിൽ ഒരുദിവസം ചിക്കൻ ബിരിയാണി നൽകാനും കൂടുതൽ പോഷകപ്രദമായ ഭക്ഷണങ്ങൾ ഉൾപ്പെടുത്താനും അദ്ധ്യാപക സംഘടനാ പ്രതിനിധികൾ സർക്കാരിനോട് അഭ്യർത്ഥിച്ചിട്ടുണ്ടായിരുന്നു. സ്‌കൂളിലെ പ്രഭാതഭക്ഷണവും ഉച്ചഭക്ഷണവും പ്ലസ് ടു വരെയുള്ള വിദ്യാർത്ഥികൾക്കും നൽകണമെന്ന് സംഘടനകൾ ആവശ്യപ്പെടുകയും ചെയ്തു. നിലവിൽ എട്ടാംക്ലാസ് വരെയുള്ള വിദ്യാർത്ഥികൾക്കാണ് പ്രഭാത ഭക്ഷണം നൽകുന്നത്. പത്താം ക്ലാസ് വരെയുള്ള വിദ്യാർത്ഥികൾക്ക് ഉച്ചഭക്ഷണവും നൽകി വരുന്നു.