ഗുജറാത്തിലെ അഹമ്മദാബാദിൽ വ്യാഴാഴ്ച പുലർച്ചെ ഭൂചലനമുണ്ടായി. റിക്ടർ സ്കെയിലിൽ 2.6 തീവ്രത രേഖപ്പെടുത്തിയ ഭൂചലനമാണ് അനുഭവപ്പെട്ടതെന്ന് ഗാന്ധിനഗർ ആസ്ഥാനമായി പ്രവർത്തിക്കുന്ന ഇൻസ്റ്റിറ്റ്യൂട്ട് ഓഫ് സീസ്മോളജിക്കൽ റിസർച്ച് അറിയിക്കുകയും ചെയ്തു.

അഹമ്മദാബാദിൽ നിന്ന് 29 കിലോമീറ്റർ തെക്ക്-തെക്കുപടിഞ്ഞാറ് മാറി ഭൂമിക്ക് അടിയിൽ 20 കിലോമീറ്റർ ആഴത്തിലാണ് ഇതിന്റെ പ്രഭവകേന്ദ്രമുള്ളത്. പുലർച്ചെ 4:39-നാണ് ഭൂചലനം അനുഭവപ്പെട്ടത്.

ഗുജറാത്ത് സംസ്ഥാന ദുരന്തനിവാരണ അതോറിറ്റിയുടെ കണക്കനുസരിച്ച് ഭൂകമ്പ സാധ്യതയുള്ള മേഖലയാണ് ഗുജറാത്ത്. കഴിഞ്ഞ 200 വർഷത്തിനിടെ ഒമ്പത് വലിയ ഭൂകമ്പങ്ങൾക്ക് മേഖല സാക്ഷ്യം വഹിച്ചിട്ടുണ്ടായിരുന്നു.