കൊച്ചിയില്‍ നടിയാക്രമിക്കപ്പെട്ട സംഭവത്തില്‍ മറ്റൊരു നിര്‍ണായക വഴിത്തിരിവ് കൂടി ഉണ്ടായിരിക്കുകയാണ്. ആക്രമണത്തിന് ഇരയായ അതിജീവിതക്കുള്ള പിന്തുണ വര്‍ധിച്ചിരിക്കുന്നു. നടിക്ക് നീതി ലഭിക്കണമെന്ന് ആവശ്യപ്പെട്ട് രംഗത്ത് വന്നിരിക്കുകയാണ് തെന്നിന്ത്യയിലെ പ്രമുഖ നടനും അമ്മയിലെ അംഗവുമായ രവീന്ദ്രനും ഫ്രണ്ട്‌സ് ഓഫ് പി.ടി ആന്റ് നേച്ചര്‍ എന്ന സംഘടനയും.

നടിയെ അക്രമിച്ച സംഭവത്തില്‍ അന്വേഷണം അട്ടിമറിക്കപ്പെടുന്നു എന്നാണ് രവീന്ദ്രനും സംഘടനയിലെ ഭാരവാഹികളും ആരോപിക്കുന്നത്. മാത്രമല്ല അതിജീവിതക്ക് നീതിവേണം എന്ന മുദ്രാവാക്യം ഉയര്‍ത്തിക്കാട്ടി ഫ്രണ്ട്‌സ് ഓഫ് പി.ടി ആന്റ് നേച്ചറിന്റെ നേതൃത്വത്തില്‍ സത്യാഗ്രഹം നടത്താനും ഇവര്‍ പദ്ധതിയിടുന്നുണ്ട്.

ദിലീപിനുള്ള ജനപ്രീതിയും പിന്തുണയും ഓരോ ദിവസവും കുറയുന്നു എന്നതിനുള്ള ഏറ്റവും വലിയ ഉദാഹരണമാണ് ഇത്. രവീന്ദ്രന്‍ നേരത്തെയും അതിജീവിതക്ക് പിന്തുണ അറിയിച്ച് രംഗത്ത് വന്നിരുന്നു. എന്നാല്‍ അന്ന് താന്‍ ഇരയോടൊപ്പമാണെന്ന് പറഞ്ഞ അദ്ദേഹം അമ്മ എന്ന സംഘടനയെ തള്ളിപ്പറയാതെ ആയിരുന്നു പ്രതികരിച്ചത്. അമ്മ നടിയോടൊപ്പമാണെന്ന് നേരത്തെ പ്രഖ്യാപിച്ചിട്ടുണ്ട്. ഇതില്‍ അഭിപ്രായ വ്യത്യാസമുണ്ടെന്ന് തോന്നുന്നില്ല എന്നായിരുന്നു അദ്ദേഹം ജനുവരിയില്‍ നടത്തിയ വാര്‍ത്താ സമ്മേളനത്തില്‍ പറഞ്ഞത്.

മാത്രമല്ല സംഭവം നടക്കുമ്പോള്‍ താന്‍ മിഡില്‍ ഈസ്റ്റിലായിരുന്നെന്നും അതു കൊണ്ടു തന്നെ കേസിനെ കുറിച്ചു കൂടുതല്‍ കാര്യങ്ങള്‍ അറിയില്ലെന്നും മലയാളികളുടെ സമീപനത്തിന്റെ പ്രശ്‌നമാണിതെന്നും പ്രതികരിച്ചിരുന്നു. അതായത് പരോക്ഷമായി ദിലീപിനേയും മറ്റ് പ്രതികളേയും പിന്തുണക്കുന്ന സമീപനം എന്ന് വേണം കരുതാന്‍.

ഈ നിലപാടിലാണ് ഇപ്പോള്‍ മാറ്റം വന്നിരിക്കുന്നത്. ഒരു പക്ഷേ അമ്മയില്‍ നിന്ന് നടിക്ക് നീതി ലഭിക്കില്ല എന്ന് അദ്ദേഹത്തിന് ഉറപ്പായിട്ടുണ്ടാകും. അതല്ലെങ്കില്‍ വിജയ്ബാബുവിനെതിരെയും പീഡനപരാതി ഉയര്‍ന്ന സാഹചര്യത്തില്‍ പ്രതികരിക്കാതിരുന്നിട്ട് കാര്യമില്ല, ഇനിയും നിശബ്ദത പാലിച്ചാല്‍ പെണ്‍കുട്ടികള്‍ക്ക് നേരെ നടക്കുന്ന അതിക്രമങ്ങള്‍ വര്‍ധിക്കുമെന്ന് തോന്നിയിട്ടുമാകാം.

എന്തായാലും എറണാകുളം ഗാന്ധിക്വയറില്‍ വെള്ളിയാഴ്ച രാവിലെ പരിപാടി സംഘടിപ്പിക്കും എന്നാണ് ലഭിക്കുന്ന വിവരം. ഈയടുത്ത് മരണമടഞ്ഞ മുന്‍ എം.എല്‍.എ പി.ടി. തോമസിന്റെ സുഹൃത്തുക്കളുടെ നേതൃത്വത്തിലുള്ള സംഘടനയാണ് ഫ്രണ്ട്‌സ് ഓഫ് പി.ടി ആന്റ് നേച്ചര്‍. പ്രതിഷേധ പരിപാടിയില്‍ രവീന്ദ്രന്‍ ഉള്‍പ്പടെയുള്ള പ്രമുഖര്‍ക്ക് പുറമെ വിവിധ സാമൂഹികസാംസ്‌കാരിക പ്രവര്‍ത്തകരും പങ്കെടുക്കും.

അതിജീവിതയ്ക്ക് നീതികിട്ടാന്‍ നമ്മള്‍ അണിനിരക്കണമെന്ന് ഫ്രണ്ട്‌സ് ഓഫ് പി.ടി ആന്റ് നേച്ചര്‍ ഭാരവാഹി കൂടിയായ രവീന്ദ്രന്‍ പറഞ്ഞു. മാത്രമല്ല സ്ത്രീകള്‍ ഏതു നാട്ടിലാണെങ്കിലും എപ്പോഴും സുരക്ഷിതരായിരിക്കണം എന്നും അവര്‍ അക്രമിക്കപ്പെടാന്‍ പാടില്ല എന്നുമാണ് രവീന്ദ്രന്‍ നേരത്തെ ചൂണ്ടിക്കാട്ടിയിരുന്നത്. മാത്രമല്ല അമ്മ എന്ന സംഘടനയിലെ ഭാരവാഹിത്വത്തില്‍ വനിതാ പ്രാതിനിധ്യം കൂട്ടേണ്ടതുണ്ടെന്നും അദ്ദേഹം വ്യക്തമാക്കിയിരുന്നു.