ഇനിയുള്ള നീക്കം രഹസ്യമായി.. . ശ്രീജിത്തിനു പകരം ക്രൈംബ്രാഞ്ച് മേധാവിയായി ചുമതലയേറ്റ എഡിജിപി ഷേഖ് ദര്വേഷ് സാഹിബ് അന്വേഷണ സംഘത്തിലെ ഉദ്യോഗസ്ഥരെ തിരുവനന്തപുരത്തെ ക്രൈംബ്രാഞ്ച് ആസ്ഥാനത്ത് വിളിച്ചുവരുത്തി; നിര്ണായക നിര്ദേശങ്ങള് നല്കി ക്രൈംബ്രാഞ്ച് മേധാവി
കൊച്ചിയില് നടിയ ആക്രമിച്ച കേസും അന്വേഷണ ഉദ്യോഗസ്ഥര്ക്കെതിരായ വധശ്രമ കേസും ഏതാണ്ട് തണുത്ത മട്ടിലാണ്. വിവാദങ്ങള്ക്കിടെ എഡിജിപി എസ്. ശ്രീജിത്തിനു പകരം എഡിജിപി ഷേഖ് ദര്വേഷ് സാഹിബ് ക്രൈംബ്രാഞ്ച് മേധാവിയായി ചുമതലയേറ്റു. എഡിജിപി ഷേഖ് ദര്വേഷ് സാഹിബ് അന്വേഷണ സംഘത്തിലെ ഉദ്യോഗസ്ഥരെ തിരുവനന്തപുരത്തെ ക്രൈംബ്രാഞ്ച് ആസ്ഥാനത്തു വിളിച്ചുവരുത്തി നിര്ദേശങ്ങള് നല്കി.
ക്വട്ടേഷന് പ്രകാരം നടിയെ തട്ടിക്കൊണ്ടു പോയി പീഡിപ്പിച്ചെന്ന കേസില് കോടതികളെയും അഭിഭാഷകരെയും പ്രതിരോധത്തിലാക്കുന്ന അന്വേഷണവിവരങ്ങള് പുറത്തു വരാതെ നോക്കണമെന്ന് അന്വേഷണ സംഘത്തിനു നിര്ദേശം ലഭിച്ചു. നടിയെ പീഡിപ്പിച്ചെന്ന കേസും അന്വേഷണ സംഘത്തെ വകവരുത്താന് എട്ടാം പ്രതി ദിലീപും കൂട്ടാളികളും ഗൂഢാലോചന നടത്തിയെന്ന കേസും സമയബന്ധിതമായി പൂര്ത്തിയാക്കാനും എഡിജിപി നിര്ദേശം നല്കി.
അന്വേഷണ ഉദ്യോഗസ്ഥര് വിചാരണക്കോടതിയുടെ വിമര്ശനം കേള്ക്കാതെ നോക്കണമെന്ന നിര്ദേശവും അന്വേഷണ സംഘത്തിനു ലഭിച്ചു. കേസില് ഹാജരാകേണ്ട സ്പെഷല് പ്രോസിക്യൂട്ടറുടെ കാര്യത്തില് അന്തിമ തീരുമാനമായില്ല. കേസില് വിചാരണക്കോടതിക്ക് എതിരെ കടുത്ത വിമര്ശനം ഉയര്ത്തി 2 സ്പെഷല് പ്രോസിക്യൂട്ടര്മാര് രാജി വച്ചിരുന്നു. കേസില് പുതുതായി ചോദ്യം ചെയ്യേണ്ട 12 പേരുടെ പട്ടിക അന്വേഷണ സംഘം തയാറാക്കി.
പട്ടികയില് ദിലീപിന്റെ ഭാര്യ കാവ്യ മാധവനും ഉള്പ്പെടുന്നുണ്ട്. കാവ്യയുടെ മൊഴി എവിടെവച്ചു രേഖപ്പെടുത്തണമെന്ന കാര്യത്തില് അന്തിമ തീരുമാനം എടുത്തിട്ടില്ല. കേസില് പുതുതായി മൊഴിയെടുത്ത 80 പേരില് ആരെയെല്ലാമാണു പ്രോസിക്യൂഷന്റെ സാക്ഷിപ്പട്ടികയില് ഉള്പ്പെടുത്തേണ്ടതെന്ന് അടുത്ത ദിവസങ്ങളില് തീരുമാനമാവും. മേയ് 30ന് അന്വേഷണം പൂര്ത്തിയാക്കി 31നു വിചാരണക്കോടതി മുന്പാകെ റിപ്പോര്ട്ട് സമര്പ്പിക്കണം. അന്വേഷണം പൂര്ത്തിയാക്കാന് കോടതിയോടു കൂടുതല് സമയം ആവശ്യപ്പെടാന് കഴിയില്ലെന്നാണു വിലയിരുത്തല്.
ദിലീപിന്റെ അഭിഭാഷകര്ക്കെതിരെ വീണ്ടും അതിജീവിത രംഗത്തെത്തി. ദീലിപിന്റെ അഭിഭാഷകര്ക്കെതിരെ അതിജീവിത ബാര് കൗണ്സിലില് തെളിവുകള് സമര്പ്പിച്ചു. അഭിഭാഷകരുടെ ശബ്ദരേഖയുടെ പകര്പ്പ് അതിജീവിത ബാര് കൗണ്സിലിനു കൈമാറിയിട്ടുണ്ട്. അഭിഭാഷകര് ചട്ടങ്ങള് ലംഘിച്ചു സാക്ഷികളെ കണ്ടെന്നും മൊഴിമാറ്റിക്കാന് നേരിട്ടിറങ്ങിയെന്നുമാണു അതിജീവിതയുടെ പരാതി.
അഭിഭാഷകരായ ബി. രാമന്പിള്ള, ഫിലിപ് ടി. വര്ഗീസ്, സുജേഷ് മേനോന് എന്നിവര്ക്കെതിരേ നടപടി ആവശ്യപ്പെട്ടുകൊണ്ട് നടി ബാര് കൗണ്സിലിന് നേരത്തേ പരാതി നല്കിയിരുന്നു. അഭിഭാഷകര് കേസ് അട്ടിമറിക്കാന് ശ്രമിച്ചെന്നായിരുന്നു അതിജീവിതയുടെ ആരോപണം. നടിയുടെ പരാതിയില് അഭിഭാഷകരോടു ബാര് കൗണ്സില് വിശദീകരണം തേടിയിരുന്നു.
അതേസമയം നടിയെ പീഡിപ്പിച്ചെന്ന കേസിലും അന്വേഷണ ഉദ്യോഗസ്ഥരെ വധിക്കാന് ഗൂഢാലോചന നടത്തിയെന്ന കേസിലും നടന് ദിലീപിന്റെ സഹോദരീഭര്ത്താവ് ടി.എന്.സുരാജിനെക്കുറിച്ചു കോടതി ഉത്തരവുകളല്ലാതെ മറ്റൊന്നും സംപ്രേഷണം ചെയ്യരുതെന്ന ഇടക്കാല ഉത്തരവിന്റെ കാലാവധി ഹൈക്കോടതി ഒരു മാസം കൂടി നീട്ടി. ജസ്റ്റിസ് ബസന്ത് ബാലാജിയാണ് ഒരു സ്വകാര്യ ചാനലുമായി ബന്ധപ്പെട്ട ഇടക്കാല ഉത്തരവിന്റെ കാലാവധി നീട്ടിയത്. ഹര്ജി 24നു വീണ്ടും പരിഗണിക്കും.
https://www.facebook.com/Malayalivartha
