പെരിയാറില്‍ ചാടി മരിച്ച യുവാവിനെയും തായിക്കാട്ടുകര ഗാരിജിനു സമീപം ട്രെയിനിനു മുന്നില്‍ ചാടി മരിച്ച യുവതിയെയും തിരിച്ചറിഞ്ഞു. വ്യാഴാഴ്ച വൈകുന്നേരം മാര്‍ത്താണ്ഡവര്‍മ പാലത്തില്‍ നിന്നു പെരിയാറിലേക്ക് ചാടി മരിച്ച യുവാവിനെയും തായിക്കാട്ടുകര ഗാരിജിനു സമീപത്തായി ട്രെയിനിനു മുന്നില്‍ ചാടി മരിച്ച യുവതിയെയും തിരിച്ചറിഞ്ഞു. എടത്തല സ്വദേശികളായ താഴത്തേടത്ത് ശ്രീകാന്ത് (34), പുത്തന്‍വീട്ടില്‍ മഞ്ജു (42) എന്നിവരാണു മരിച്ചത്.

മഞ്ജു നൊച്ചിമയില്‍ സ്വകാര്യ കമ്പനി ഉദ്യോഗസ്ഥയായിരുന്നു. ഇവര്‍ക്ക് ഭര്‍ത്താവും രണ്ടു മക്കളുമുണ്ട്.. ഇവര്‍ ജോലി കഴിഞ്ഞു സ്‌കൂട്ടറില്‍ ഗാരിജിനു സമീപം എത്തി ട്രെയിനിനു മുന്നിലേക്കു ചാടുകയായിരുന്നു. സംഭവസ്ഥലത്ത് ഉണ്ടായിരുന്ന ശ്രീകാന്ത് ഉടന്‍ തന്നെ അവിടെ നിന്ന് ഓട്ടോയില്‍ ആലുവയില്‍ എത്തിയാണു പുഴയില്‍ ചാടിയതെന്നു പൊലീസ് പറഞ്ഞു. മൃതദേഹം മുങ്ങല്‍ വിദഗ്ധര്‍ കണ്ടെടുത്തു.

ഡ്രൈവറായ ശ്രീകാന്ത് മൂന്നു മാസമായി മഞ്ജുവിന്റെ വീടിനടുത്തു വാടകയ്ക്ക് താമസിക്കുകയായിരുന്നു. ഒരേ ദിവസം ആത്മഹത്യ ചെയ്യാനായി ഇരുവരും തീരുമാനിച്ചതായി ഫോണ്‍ സംഭാഷണങ്ങളില്‍ നിന്നു വ്യക്തമായതായി പൊലീസ് പറഞ്ഞു. രണ്ടു പേരുടെയും സംസ്‌കാരം നടത്തി.

പിറളി മാളേക്കപ്പടി താഴത്തേടത്ത് ജയചന്ദ്രന്റെയും കോമളത്തിന്റെയും മകനാണു ശ്രീകാന്ത്. അവിവാഹിതനാണ്. പയ്യന്നൂര്‍ സ്വദേശി ചന്ദ്രന്‍ പിള്ളയുടെയും വിജിയുടെയും മകളാണു മഞ്ജു.