തൃക്കാക്കര മണ്ഡലത്തില്‍ തെരഞ്ഞെടുപ്പ് പ്രചാരണം അവസാന ഘട്ടത്തിലേക്ക് കടന്നിരിക്കുകയാണ്. അതിനിടെ തങ്ങളുടെ സ്ഥാനാര്‍ത്ഥികള്‍ക്ക് വിജയം ഉറപ്പിച്ച് മുന്നണികള്‍ പതിവ് പോലെ രംഗത്ത് വന്നിട്ടുണ്ട്. ഇപ്പോഴിതാ ബിജെപി നേതാവായ ശോഭാ സുരേന്ദ്രന്‍ നടത്തിയ പ്രസ്താവനയാണ് വൈറലായിക്കൊണ്ടിരിക്കുന്നത്.

തൃക്കാക്കരയിലെ ബിജെപി ഓഫീസ് സന്ദര്‍ശിച്ച ഉമ തോമസിന്റെ പ്രവര്‍ത്തിക്ക് പിന്നില്‍ സിപിഎം ഗൂഢാലോചനയുണ്ടെന്ന് ആവര്‍ത്തിച്ച് പറയുകയാണ് ശോഭാ സുരേന്ദ്രന്‍. ഉമാ തോമസ് ബിജെപി ഓഫീസിലെത്തിയ ദൃശ്യങ്ങള്‍ ആദ്യമെത്തിയത് സിപിഎം കേന്ദ്രങ്ങളിലാണ്. ഇതുവഴി ബിജെപിയെ ചെളി വാരിയെറിയാനാണ് ശ്രമമെന്ന് ശോഭ സുരേന്ദ്രന്‍ ഒരു പ്രമുഖചാനലിനോട് പറഞ്ഞു..

അതേസമയം തൃക്കാക്കരയിലെ ബിജെപി സ്ഥാനാര്‍ത്ഥിയായ എഎന്‍ രാധാകൃഷ്ണനെ കേരള നിയമസഭയിലെത്തിക്കുമെന്നും പ്രധാനമന്ത്രി നരേന്ദ്ര മോദിയുടെ വികസനമാണ് തൃക്കാക്കരയില്‍ ചര്‍ച്ചയാകുന്നതെന്നും ശോഭ സുരേന്ദ്രന്‍ കൂട്ടിച്ചേര്‍ത്തു. ഭീകരവാദികള്‍ക്കെതിരായ പിസി ജോര്‍ജിന്റെ നിലപാടിനെയാണ് ബിജെപി പിന്തുണച്ചത്. അദ്ദേഹം പറഞ്ഞ കാര്യങ്ങളില്‍ സര്‍ക്കാര്‍ ഒരു പരിശോധനയും നടത്തിയിട്ടില്ല എന്നും ശോഭ കുറ്റപ്പെടുത്തി.

മാത്രമല്ല പോപ്പുലര്‍ ഫ്രണ്ട് റാലിക്കിടെ കുട്ടി വിദ്വേഷ മുദ്രാവാക്യം വിളിച്ച സംഭവത്തെ സര്‍ക്കാര്‍ അനുകൂലിക്കുന്നെന്ന് ചൂണ്ടിക്കാട്ടിയ ശോഭ സിപിഎമ്മിന്റെ പതനമാണ് ഇവിടെ കാണുന്നതെന്ന് പറഞ്ഞു. മാത്രമല്ല നിലവില്‍ ഇടതുപക്ഷക്കാര്‍ പോലും എഎന്‍ രാധാകൃഷ്ണന് വോട്ടുകൊടുക്കുന്ന സാഹചര്യമാണ് ഉള്ളതെന്നും അവര്‍ വ്യക്തമാക്കി.

ഒരു മാസത്തോളം നീണ്ട പരസ്യ പ്രചാരണം ഇന്ന് അവസാനിക്കുമ്പോള്‍ പി.സി ജോര്‍ജിന്റെ വിദ്വേഷപ്രസംഗവും, പോപ്പുലര്‍ ഫ്രണ്ട് റാലിയിലെ കുട്ടിയുടെ കൊലവിളി മുദ്രാവാക്യവും കെറെയിലും എല്ലാം പുറത്തിറക്കി പയറ്റാനുള്ള ശ്രമത്തിലാണ് മുന്നണികള്‍. പരസ്യ പ്രചാരണ സമയം തീരും മുമ്പ് അവസാന വോട്ടറിലേക്കും തിരഞ്ഞെടുപ്പ് ആവേശം നിറയ്ക്കാനുളള ഓട്ടത്തിലാണ് മുന്നണികള്‍.

അതേസമയം ഇടത് സ്ഥാനാര്‍ത്ഥിയുടെ വ്യാജ വീഡിയോ വിവാദം അവസാന ഘട്ടത്തിലും ആളിക്കത്തിക്കുകയാണ് സിപിഎം. വികസനം പറഞ്ഞ് പ്രചാരണം തുടങ്ങിയ ഇടതുമുന്നണി അവസാന ഘട്ടത്തിലെത്തുമ്പോള്‍ സ്ഥാനാര്‍ഥിയുടെ പേരിലിറങ്ങിയ വീഡിയോയുടെ സഹതാപം വോട്ടാക്കി മാറ്റാനുളള തന്ത്രങ്ങളിലേക്കാണ് ഊന്നുന്നത്.

ബിജെപിയാണെങ്കില്‍ സുരേഷ് ഗോപിയുടെ റോഡ് ഷോയായിരുന്നു അവസാന ലാപ്പിലെ ബിജെപി പ്രചാരണത്തിന്റെ ഇന്നലത്തെ ഹൈലൈറ്റ്. എന്നാല്‍ പൊലീസ് ഹാജരാകാന്‍ ആവശ്യപ്പെട്ടിട്ടും ബിജെപി സ്ഥാനാര്‍ത്ഥിക്കൊപ്പം പ്രചാരണത്തിനിറങ്ങുമെന്ന് പറഞ്ഞ പിസി ജോര്‍ജായിരിക്കും ബിജെപിയുടെ കൊട്ടിക്കലാശത്തിലെ ഹൈലൈറ്റ്.