നീറ്റ് ചോദ്യപേപ്പര്‍ ചോര്‍ച്ചയ്ക്ക് പിന്നാലെ നടന്ന പുനഃപരീക്ഷയില്‍ രണ്ടാംറാങ്ക് നേടിയ അനുഭവം പങ്കുവച്ച് പന്‍ഷുല്‍ ബന്‍സാലി. 99.9999 ശതമാനം മാര്‍ക്കോടെയാണ് ഹരിയാന സ്വദേശിയായ പന്‍ഷുല്‍ രണ്ടാംറാങ്ക് സ്വന്തമാക്കിയത്. ചോദ്യപേപ്പര്‍ ചോര്‍ച്ചയെ തുടര്‍ന്ന് ആദ്യം പരീക്ഷ റദ്ദാക്കിയപ്പോള്‍ വലിയ നിരാശ തോന്നിയെങ്കിലും പിന്നീട് അതൊരു അവസരമായി കണ്ടുവെന്ന് പന്‍ഷുല്‍ പറഞ്ഞു. ' പഠിക്കാന്‍ കഴിയുമ്പോള്‍ ഞാന്‍ എന്തിന് പ്രതിഷേധിക്കാന്‍ പോകണം? പകരം വീട്ടിലിരുന്ന് പഠിച്ച് മാര്‍ക്ക് മെച്ചപ്പെടുത്താമെന്നാണ് ഞാന്‍ ചിന്തിച്ചത്' പന്‍ഷുല്‍ വ്യക്തമാക്കി.

ചോദ്യപേപ്പര്‍ ചോര്‍ച്ചയില്‍ കേന്ദ്ര വിദ്യാഭ്യാസ മന്ത്രി ധര്‍മ്മേന്ദ്ര പ്രധാന്‍ രാജിവയ്ക്കണമെന്ന് ആവശ്യപ്പെട്ട് പ്രതിഷേധം ശക്തമാകുന്നതിനിടെയാണ് പന്‍ഷുലിന്റെ വേറിട്ട പ്രതികരണം. ഡല്‍ഹി ഗ്രേറ്റര്‍ കൈലാഷിലെ കെആര്‍ മംഗളം വേള്‍ഡ് സ്‌കൂളിലെ വിദ്യാര്‍ത്ഥിയായ പന്‍ഷുല്‍ പുനഃപരീക്ഷയില്‍ 720ല്‍ 715 മാര്‍ക്ക് നേടിയാണ് രണ്ടാംറാങ്ക് നേടിയത്. ആദ്യ പരീക്ഷയില്‍ 706 മാര്‍ക്കായിരുന്നു.

മേയ് 3ന് നടന്ന ആദ്യ പരീക്ഷ ചോദ്യപേപ്പര്‍ ചോര്‍ച്ചാ ആരോപണത്തെ തുടര്‍ന്ന് മേയ് 12നാണ് റദ്ദാക്കിയത്. തുടര്‍ന്ന് കനത്ത സുരക്ഷയില്‍ ജൂണ്‍ 21ന് പുനഃപരീക്ഷ നടത്തുകയും ജൂലയ് 16ന് ഫലം പ്രഖ്യാപിക്കുകയുമായിരുന്നു. 'മുന്‍പത്തെ അതേ പഠനരീതി തുടര്‍ന്നതോടെ മികച്ച വിജയം നേടാനായി. എല്ലാം മറന്ന് ലക്ഷ്യത്തില്‍ മാത്രം ശ്രദ്ധ കേന്ദ്രീകരിച്ചു. എന്ത് സംഭവിച്ചാലും അത് നല്ലതിനായിരിക്കുമെന്ന് ഉറച്ച് വിശ്വസിച്ചു' പന്‍ഷുല്‍ വിശദീകരിച്ചു. അതേസമയം നിലവില്‍ രാജ്യത്ത് നടക്കുന്ന പ്രതിഷേധങ്ങളില്‍ പ്രതികരിക്കാന്‍ പന്‍ഷുല്‍ തയ്യാറായില്ല.