ഒരു മാസം നീണ്ട പ്രചാരണത്തിനൊടുവില്‍ തൃക്കാക്കരയില്‍ നാളെ വിധിയെഴുത്ത്..... ഒരു മാസത്തോളം നീണ്ട പ്രചാരണമാണ് ഇന്നലെ സമാപിച്ചത്, നാളെ രാവിലെ 7 മുതല്‍ വൈകിട്ട് 6 വരെയാണ് വോട്ടെടുപ്പ്. 75 ഓക്‌സിലറി ബൂത്തുകള്‍ ഉള്‍പ്പെടെ 239 ബൂത്തുകള്‍ സജ്ജമാക്കി, ജൂണ്‍ മൂന്നിന് വോട്ടെണ്ണല്‍.


അതേസമയം വീറും വാശിയും നിറഞ്ഞ തൃക്കാക്കര ഉപതിരഞ്ഞെടുപ്പു പോരാട്ടത്തിന്റെ പരസ്യ പ്രചാരണത്തിനു ആഘോഷ മേളങ്ങളോടെ സമാപനമായി. ഇന്നൊരു ദിവസം വോട്ടുറപ്പിക്കാനുള്ള നിശബ്ദ പ്രചാരണം. നാളെ മണ്ഡലം പോളിങ് ബൂത്തിലേക്ക്. വെള്ളിയാഴ്ച തൃക്കാക്കരയുടെ പുതിയ പ്രതിനിധി ആരെന്ന് അറിയാന്‍ കഴിയും. ചെറു പ്രകടനങ്ങളായി പാലാരിവട്ടം ജംക്ഷനില്‍ എത്തിയ മൂന്നു മുന്നണികളുടെയും പ്രവര്‍ത്തകര്‍ വൈകിട്ട് 6 വരെ ആടിപ്പാടിയും മുദ്രാവാക്യം മുഴക്കിയും ഒരു മാസം നീണ്ട ശബ്ദ ഘോഷങ്ങള്‍ അവസാനിപ്പിച്ചു. നാളെ രാവിലെ 7 മുതല്‍ വൈകിട്ട് 6 വരെയാണു പോളിങ്.

പി.ടി.തോമസിന്റെ നിര്യാണം മൂലം ഒഴിവുവന്ന നിയമസഭാ സീറ്റില്‍ യുഡിഎഫ് സ്ഥാനാര്‍ഥി അദ്ദേഹത്തിന്റെ ഭാര്യ ഉമ തോമസും എല്‍ഡിഎഫ് സ്ഥാനാര്‍ഥി ഡോ. ജോ ജോസഫും എന്‍ഡിഎ സ്ഥാനാര്‍ഥി എ.എന്‍. രാധാകൃഷ്ണനുമാണു മത്സര രംഗത്തെ പ്രമുഖര്‍.

മുതിര്‍ന്ന നേതാക്കളും ജനപ്രതിനിധികളുമൊക്കെ മണ്ഡലത്തില്‍ അണിനിരന്നു. പരസ്യ പ്രചാരണം തീര്‍ന്നതോടെ മറ്റു പ്രദേശങ്ങളില്‍ നിന്നു വന്ന നേതാക്കളും പ്രവര്‍ത്തകരും മടങ്ങി. ശബ്ദ കോലാഹലമില്ലെങ്കിലും ഇന്നും മുന്നണി പ്രവര്‍ത്തകര്‍ക്കു വിശ്രമമില്ലാത്ത ജോലിയാണ്, ആടി നില്‍ക്കുന്ന വോട്ടുകള്‍ ഉറപ്പിക്കാനുള്ള അവസാന ദിവസം. വോട്ടര്‍മാര്‍ക്ക്, ആലോചിച്ച് തീരുമാനമെടുക്കാനുള്ള ദിവസവും ഇന്നു തന്നെ.



വോട്ടെടുപ്പിനുള്ള സാമഗ്രികളുടെ വിതരണം എറണാകുളം മഹാരാജാസ് കോളേജില്‍ ഇന്നു രാവിലെ 8ന് ആരംഭിക്കും. സമ്മതിദായകര്‍ആകെ: 1,96,805പുരുഷന്മാര്‍: 95,274സ്ത്രീകള്‍: 1,01,530ട്രാന്‍സ്ജെന്‍ഡര്‍: 1കന്നിവോട്ടര്‍മാര്‍: 3,633


സ്ഥാനാര്‍ത്ഥികള്‍ ഉമ തോമസ് (യു.ഡി.എഫ്)ഡോ. ജോ ജോസഫ് (എല്‍.ഡി.എഫ്)എ.എന്‍. രാധാകൃഷ്ണന്‍ (എന്‍.ഡി.എ) (സ്വതന്ത്രന്‍മാര്‍)അനില്‍ നായര്‍ ജോമോന്‍ ജോസഫ് സ്രാമ്പിക്കല്‍ സി.പി. ദിലീപ് നായര്‍ ബോസ്‌കോ ലൂയിസ്മന്മഥന്‍

അതേസമയം വന്‍ ഭൂരിപക്ഷത്തോടെ മണ്ഡലം നിലനിര്‍ത്തി തുടര്‍ പ്രവര്‍ത്തനങ്ങള്‍ക്കുള്ള കരുത്താണു യുഡിഎഫ് പ്രതീക്ഷയെങ്കില്‍, അട്ടിമറിയിലൂടെ 100 സീറ്റു തികയ്ക്കുകയെന്ന ലക്ഷ്യമാണ് ഇടതുമുന്നണിക്കുള്ളത്.