ഒഡീഷയില്‍നിന്ന് ട്രെയിനില്‍ കഞ്ചാവെത്തിക്കുന്ന സംഘത്തിലെ കണ്ണികളായ യുവദമ്പതികള്‍ ആര്‍.പി.എഫിന്റെ പിടിയിലായി.ഞായറാഴ്ച വൈകിട്ടാണ് ഇരുവരും പിടിയിലായത്.ഒഡീഷ സ്വദേശികളായ ഗോപബന്ധു ബെഹ്‌റ (25), ഭാര്യ ഭര്‍സാ സാഹു (22) എന്നിവരാണ് എറണാകുളം സൗത്ത് റെയില്‍വെ സ്റ്റേഷനില്‍വച്ച്‌ പിടിയിലായത്.

31000 രൂപ വിലമതിക്കുന്ന മൂന്ന് കിലോ കഞ്ചാവ് ഇവരിൽ നിന്ന് കണ്ടെടുത്തു. മാന്യമായ വേഷംധരിച്ച്‌ യാത്രചെയ്തിരുന്ന ഇവരുടെ ബാഗ് കണ്ട് സംശയം തോന്നിയ ആര്‍.പി.എഫ് ഉദ്യോഗസ്ഥര്‍ ഇത് തുറന്നു പരിശോധിക്കുകയായിരുന്നു. കൊച്ചിയിലുള്ള സംഘത്തിനായാണ് ഇവര്‍ കഞ്ചാവ് കൊണ്ടുവന്നതെന്നാണ് വിവരം. പ്രതികള്‍ കാക്കനാട് ഭാഗത്ത് വാടകയ്ക് താമസിക്കുകയാണ്.

റെയില്‍വെ സ്റ്റേഷന് പുറത്ത് ഒരാള്‍ കാത്തുനില്‍ക്കുമെന്നാണ് ഇവരോട് പറഞ്ഞിരുന്നത്. ഇയാള്‍ക്കായി അന്വേഷണം ആരംഭിച്ചിട്ടുണ്ട്.മുമ്പും കഞ്ചാവ് എത്തിച്ചിട്ടുണ്ടാകാമെന്ന് സംശയിക്കുന്നു. ജോലി സംബന്ധിച്ച്‌ വ്യക്തമായ വിവരവും ഇവര്‍ നല്‍കിയിട്ടില്ല.

എ.എസ്.ഐ.പി.എഫ് കെ.എസ്. മണികണ്ഠന്റെ നേതൃത്വത്തിലുള്ള സംഘമാണ് പിടികൂടിയത്. കെ.എസ്. സുനില്‍, പി. ഷിജു, ജി. വിപിന്‍ എന്നിവരും അന്വേഷണ സംഘത്തിലുണ്ടായിരുന്നു. എക്‌സൈസ് റേഞ്ച് ഇന്‍സ്‌പെക്ടര്‍ ഹനീഫയാണ് കേസന്വേഷിക്കുന്നത്. പ്രതികളെ കസ്റ്റഡിയില്‍ വാങ്ങി ചോദ്യംചെയ്യും.