പ്രവേശനോത്സവം ഇന്ന്.... പുതിയ അധ്യയന വര്‍ഷത്തില്‍ ഒന്നാം ക്ലാസിലേക്ക് നാലു ലക്ഷത്തോളം കുട്ടികള്‍, മാസ്‌കും കോവിഡ് പെരുമാറ്റച്ചട്ടവും നിര്‍ബന്ധം, പ്രവേശനോത്സവത്തിന്റെ സംസ്ഥാനതല ഉദ്ഘാടനം തിരുവനന്തപുരം കഴക്കൂട്ടം ഗവ. എച്ച്.എസ്.എസില്‍ രാവിലെ 9ന് മുഖ്യമന്ത്രി പിണറായി വിജയന്‍ നിര്‍വഹിക്കും.

കൊവിഡ് നഷ്ടപ്പെടുത്തിയ രണ്ടു വര്‍ഷങ്ങള്‍ക്കുശേഷം പഴയ പ്രതാപത്തോടെ സ്‌കൂളുകളില്‍ പുതിയ അദ്ധ്യയന വര്‍ഷത്തിന് ഇന്ന് തുടക്കമാകുന്നു. ഒന്നാം ക്‌ളാസ് മുതല്‍ പന്ത്രണ്ടാം ക്‌ളാസ് വരെയുള്ള ക്‌ളാസുകളാണ് ഇന്ന് തുടങ്ങുന്നത്. എസ്.എസ്.എല്‍.സി ഫലം വരാത്തതിനാല്‍ പ്‌ളസ് വണ്‍ ക്‌ളാസ് തുടങ്ങാനാവില്ല. നാലു ലക്ഷം നവാഗതരാണ് ഒന്നാം ക്‌ളാസിലെത്തുന്നത്.

പ്രവേശനോത്സവത്തില്‍ സമ്മാനപ്പൊതികളും മധുരവും ബാഗും കുടയും പാട്ടും നൃത്തവുമൊക്കെയായാണ് എല്ലാ ക്‌ളാസുകാരെയും വരവേല്‍ക്കുക. പ്രവേശനോത്സവത്തിന്റെ സംസ്ഥാനതല ഉദ്ഘാടനം തിരുവനന്തപുരം കഴക്കൂട്ടം ഗവ. എച്ച്.എസ്.എസില്‍ രാവിലെ 9ന് മുഖ്യമന്ത്രി പിണറായി വിജയന്‍ നിര്‍വഹിക്കും.

പൊതുവിദ്യാഭ്യാസ മന്ത്രി വി. ശിവന്‍കുട്ടി അദ്ധ്യക്ഷനാകുന്ന ചടങ്ങില്‍ മന്ത്രിമാരായ ആന്റണി രാജു, അഡ്വ. ജി.ആര്‍. അനില്‍, പൊതുവിദ്യാഭ്യാസ പ്രിന്‍സിപ്പല്‍ സെക്രട്ടറി മുഹമ്മദ് ഹനീഷ്, ഡയറക്ടര്‍ ജീവന്‍ ബാബു, റസൂല്‍ പൂക്കുട്ടി, കടകംപള്ളി സുരേന്ദ്രന്‍ എം.എല്‍.എ, മേയര്‍ ആര്യാരാജേന്ദ്രന്‍, ജില്ലാ കളക്ടര്‍ നവ്ജ്യോത് ഖോസ, ജില്ലാ പഞ്ചായത്ത് പ്രസിഡന്റ് അഡ്വ. ഡി. സുരേഷ് കുമാര്‍, എസ്.എസ്.കെ ഡയറക്ടര്‍ ഡോ. സുപ്രിയ, വാര്‍ഡ് കൗണ്‍സിലര്‍ എല്‍.എസ്. കവിത, സ്‌കൂള്‍ പ്രിന്‍സിപ്പല്‍ ഐ. ബിന്ദു തുടങ്ങിയവര്‍ പങ്കെടുക്കും.
ആകെ 42.9 ലക്ഷം കുട്ടികളാണ് പുതിയ അധ്യയനവര്‍ഷം സ്‌കൂളുകളിലെത്തുകയെന്ന് മന്ത്രി വി. ശിവന്‍കുട്ടി പറഞ്ഞു.

കൈറ്റ് വിക്ടേഴ്‌സില്‍ ഇതിന്റെ തത്സമയ സംപ്രേഷണം ഉണ്ടാകും. എല്ലാ സ്‌കൂളുകളിലും ചടങ്ങ് തത്സമയം വീക്ഷിക്കാന്‍ ക്രമീകരണമൊരുക്കും. സംസ്ഥാനതല പ്രവേശനോത്സവ ഉദ്ഘാടന ചടങ്ങ് കണ്ടതിനുശേഷം പത്തേകാലിന് ജില്ലാ, സ്‌കൂള്‍തല പ്രവേശനോത്സവ പരിപാടികള്‍ ആരംഭിക്കാനാണ് നിര്‍ദ്ദേശം.

ഒന്നാംവാള്യം പാഠപുസ്തകങ്ങളും കൈത്തറി യൂണിഫോമുകളും സ്‌കൂളുകളില്‍ എത്തിച്ചു. പി.എസ്.സി. നിയമനം ലഭിച്ച 353 അദ്ധ്യാപകര്‍ പുതിയതായി ജോലിയില്‍ പ്രവേശിക്കും.

സ്‌കൂളുകളില്‍ വിദ്യാര്‍ത്ഥികളും അദ്ധ്യാപകരും നിര്‍ബന്ധമായും മുഖാവരണം ധരിക്കണമെന്ന് മന്ത്രി ശിവന്‍കുട്ടി നിര്‍ദേശിച്ചു. സംസ്ഥാനം കോവിഡില്‍നിന്ന് പൂര്‍ണമുക്തമായിട്ടില്ലെന്നും വിദ്യാര്‍ത്ഥികള്‍ക്കും അദ്ധ്യാപകര്‍ക്കും രക്ഷിതാക്കള്‍ക്കും കരുതല്‍ ആവശ്യമാണെന്നും മന്ത്രി വീണാ ജോര്‍ജ് പറഞ്ഞു.

മുഖാവരണം നിര്‍ബന്ധമായും ധരിക്കണം. രോഗലക്ഷണങ്ങളുള്ളവര്‍ സ്‌കൂളില്‍ പോകരുത്. കുട്ടികളുടെ ആരോഗ്യസ്ഥിതി അദ്ധ്യാപകരും രക്ഷിതാക്കളും ശ്രദ്ധിക്കണം.

വാക്സിനെടുക്കാന്‍ ശേഷിക്കുന്ന 12 വയസ്സിനുമുകളിലുള്ള കുട്ടികള്‍ക്ക് വാക്സിന്‍ നല്‍കണം. നനഞ്ഞതോ കേടായതോ ആയ മുഖാവരണം ധരിക്കരുത്. കൈകള്‍ വൃത്തിയാക്കാതെ കണ്ണ്, മൂക്ക്, വായ് എന്നിവിടങ്ങളില്‍ സ്പര്‍ശിക്കരുത്. പനി, ചുമ, ജലദോഷം, മൂക്കൊലിപ്പ്, തൊണ്ടവേദന തുടങ്ങിയ രോഗലക്ഷണങ്ങള്‍ ഉള്ളവരും കോവിഡ് ബാധിച്ച ആരെങ്കിലും വീട്ടിലുള്ളവരും സ്‌കൂളില്‍ പോകരുത്. അദ്ധ്യാപകരും ജീവനക്കാരും രണ്ട് ഡോസ് വാക്സിന്‍ എടുത്തിരിക്കേണ്ടതാണ്.