പുതുമുഖ നടിയെ പീഡിപ്പിച്ചെന്ന കേസില്‍ നടനും നിര്‍മാതാവുമായ വിജയ് ബാബുവിനെ ഇന്ന് വീണ്ടും ചോദ്യം ചെയ്യും. കഴിഞ്ഞദിവസം 11 മണിക്കൂര്‍ നേരമാണ് വിജയ് ബാബുവിനെ ചോദ്യം ചെയ്തത്. വെള്ളിയാഴ്ച രാവിലെ ഒമ്ബതിന് ഹാജരാകാന്‍ നിര്‍ദേശം നല്‍കിയാണ് വിട്ടയച്ചത്.

വിദേശത്ത് ഒളിവിലായിരുന്ന വിജയ് ബാബു 39 ദിവസത്തിനുശേഷം ബുധനാഴ്ചയാണ് എറണാകുളം സൗത്ത് പൊലീസ് സ്‌റ്റേഷനില്‍ ഹാജരായത്. ആദ്യദിനം ഒമ്ബതര മണിക്കൂറാണ് ചോദ്യം ചെയ്തതിരുന്നു.വ്യാഴാഴ്ച രാവിലെ ഒമ്ബതോടെ വീണ്ടും സ്‌റ്റേഷനില്‍ എത്തിയ വിജയ് ബാബുവിന്റെ ചോദ്യം ചെയ്യല്‍ രാത്രി 8.15 വരെ നീണ്ടു.

കേസ് കെട്ടിച്ചമച്ചതാണെന്നും സിനിമയില്‍ അവസരം നല്‍കാത്തതിലുള്ള വൈരാഗ്യമാണ് പരാതിക്ക് പിന്നിലെന്നുമുള്ള മൊഴി വിജയ് ബാബു ആവര്‍ത്തിച്ചു. മാര്‍ച്ച് 16നും 22നും പീഡിപ്പിച്ചെന്നാണ് നടിയുടെ പരാതി. കേസെടുത്തതിന് പിന്നാലെയാണ് വിജയ് ബാബു ദുബൈയിലേക്ക് കടന്നത്.

കേസില്‍ വിജയ് ബാബുവിന്റെ മുന്‍കൂര്‍ ജാമ്യാപേക്ഷ പരിഗണിക്കുന്നത് ചൊവ്വാഴ്ചത്തേക്ക് മാറ്റി. അറസ്റ്റ് ചെയ്യുന്നതിന് വിലക്ക് തുടരും. നടന്‍ അന്വേഷണ സംഘത്തിന് മുന്നില്‍ ഹാജരായെന്നും കൂടുതല്‍ ചോദ്യം ചെയ്യേണ്ടതുണ്ടെന്നും പ്രോസിക്യൂഷന്‍ കോടതിയെ അറിയിച്ചതിനെ തുടര്‍ന്നാണ് മുന്‍കൂര്‍ ജാമ്യാപേക്ഷ പരിഗണിക്കുന്നത് മാറ്റിയത്.

പരാതിക്കാരിയെ കാണാനോ സ്വാധീനിക്കാനോ ശ്രമിക്കരുതെന്ന് വിജയ് ബാബുവിന് കോടതി നിര്‍ദേശം നല്‍കിയിട്ടുണ്ട്. 39 ദിവസത്തെ ഒളിവ് ജീവിതത്തിന് ശേഷം ബുധനാഴ്ചയാണ് വിജയ് ബാബു കൊച്ചിയില്‍ മടങ്ങിയെത്തിയത്. വിമാനമിറങ്ങിയതിന് പിന്നാലെ ക്ഷേത്ര ദര്‍ശനം നടത്തിയ ശേഷം അന്വേഷണ ഉദ്യോഗസ്ഥന് മുന്നില്‍ ഹാജരാകുകയായിരുന്നു.

എറണാകുളം സൗത്ത് പൊലീസ് സ്‌റ്റേഷനിലാണ് വിജയ് ബാബുവിന്റെ ഇന്നത്തെ ചോദ്യം ചെയ്യല്‍ തുടരുന്നത്. അസി.കമ്മിഷണര്‍ വൈ. നിസാമുദ്ദിന്റെ നേതൃത്വത്തിലായിരുന്നു ചോദ്യം ചെയ്യല്‍. ഉഭയ സമ്മതത്തോടെയാണ് ലൈംഗിക ബന്ധത്തിലേര്‍പ്പെട്ടതെന്നും സിനിമയില്‍ അവസരം നല്‍കാത്തതിലുള്ള വൈരാഗ്യമാണ് കേസിന് പിന്നിലെന്നുമാണ് വിജയ് ബാബു പൊലീസിന് മൊഴി നല്‍കിയത്.