കേരളത്തെ ഞെട്ടിച്ച ആലുവ കൂട്ടക്കൊലപാതകക്കേസിലെ പ്രതി ആന്റണിക്ക് പരോള്‍.... ഒരു കുടുംബത്തിലെ മുഴുവന്‍ പേരുടെയും ജീവന്‍ എടുത്ത ആന്റണി പതിനെട്ട് വര്‍ഷമായി ജയിലിലായിരുന്നു.കേരളത്തെ നടുക്കിയ ആലുവ കൂട്ടക്കൊലകേസിലെ ഏക പ്രതിയാണ് ആന്റണി.

പലപ്പോഴായി പരോളിന് ശ്രമിച്ചിരുന്നെങ്കിലും സര്‍ക്കാര്‍ അപേക്ഷ പരിഗണിച്ചിരുന്നില്ല. വര്‍ഷങ്ങള്‍ക്ക് ശേഷമാണ് ഇപ്പോള്‍ ആന്റണിക്ക് പരോള്‍ കിട്ടുന്നത്. മുപ്പത് ദിവസത്തെ പരോളാണ് സര്‍ക്കാര്‍ ആന്റണിക്ക് അനുവദിച്ചിരിക്കുന്നത്.

2001 ജൂണ്‍ ആറിനാണ് കേരളത്തെ ഞെട്ടിച്ച ആലുവ കൂട്ടക്കൊലപാതകം നടന്നത്. ആലുവയിലെ മാഞ്ഞൂരാന്‍ വീട്ടിലെ 6 പേരെയാണ് ആന്റണി മണിക്കൂറുകളുടെ വ്യത്യാസത്തില്‍ കൊലപ്പെടുത്തിയത്. പണം നല്‍കാത്തതിന്റെ പേരിലായിരുന്നു കൊലപാതകം നടത്തിയത്.

മാഞ്ഞൂരാന്‍ വീട്ടില്‍ അഗസ്റ്റിന്‍, ഭാര്യ മേരി, മക്കള്‍ ദിവ്യ, ജെസ്‌മോന്‍, അഗസ്റ്റിന്റെ അമ്മ ക്ലാര, കൊച്ചുറാണി എന്നിവരെയാണ് ഇയാള്‍ കൊല ചെയ്തത്. കൊലപാതകം നടത്തിയതിന് ശേഷം ആന്റണി സൗദിയിലേയ്ക്ക് കടന്നിരുന്നു. പിന്നീട് പോലീസ് ഇയാളെ പിടികൂടി നിയമത്തിന് മുന്‍പില്‍ ഹാജരാക്കുകയായിരുന്നു.

പോലീസിന് പിന്നാലെ സിബിഐ കേസ് ഏറ്റെടുത്തതിന് ശേഷം ആന്റണിക്ക് കോടതി വധശിക്ഷ വിധിച്ചിരുന്നു. എന്നാല്‍ പിന്നീട് 2018 ല്‍ സുപ്രീംകോടതി ശിക്ഷയില്‍ ഇളവ് വരുത്തി ശിക്ഷ ജീവപര്യന്തമായി സുപ്രീകോടതി വിധിച്ചു.

പലപ്പോഴായി പരോളിന് അപേക്ഷിച്ചെങ്കിലും പോലീസ് റിപ്പോര്‍ട്ട് അനുകൂലമല്ലാത്തതിനാല്‍ പരോള്‍ നിഷേധിക്കപ്പെടുകയായിരുന്നു. നിലവില്‍ ഇതുവരെ പരോള്‍ ലഭിക്കാത്തവരുടെ പട്ടികയില്‍പ്പെടുത്തിയാണ് ആന്റണിക്ക് ജാമ്യം അനുവദിച്ചിരിക്കുന്നത്. പരോള്‍ വ്യവസ്ഥ അനുസരിച്ച് ജൂലൈ 17ന് തിരികെ ജയിലിലെത്തേണ്ടതാണ്.