കുരുന്നിനായി ഒരുരാത്രി നീണ്ട തിരച്ചിൽ, ഇടുക്കിയിൽ കാണാതായ നാലുവയസുകാരിയെ കാട്ടില്‍ കണ്ടെത്തി
ഇടുക്കി രാജകുമാരിയില്‍ കാണാതായ നാലുവയസുകാരിയെ കാടിനുള്ളില്‍ കണ്ടെത്തി. മധ്യപ്രദേശുകാരായ തൊഴിലാളികളുടെ മകള്‍ ജെസിക്കയെ ആണ് ഇന്നലെ വൈകീട്ട് മൂന്ന് മണിയോടെ കാണാതായത്. മാതാപിതാക്കള്‍ക്കൊപ്പം ഏലത്തോട്ടത്തില്‍ എത്തിയ പെണ്‍കുട്ടി മറ്റൊരു ബന്ധുവിന്റെ കുട്ടിക്കൊപ്പം കളിക്കുകയായിരുന്നു.
ഉച്ചയ്ക്ക് മൂന്ന് മണി കഴിഞ്ഞ് മാതാപിതാക്കള്‍ നോക്കിയപ്പോല്‍ കുഞ്ഞിനെ കാണാന്‍ ഇല്ലായിരുന്നു. തുടര്‍ന്ന് തൊഴിലാളികളെല്ലാം ചേര്‍ന്ന് പരിശോധന നടത്തിയെങ്കിലും കുഞ്ഞിനെ കണ്ടെത്താനായില്ല.തുടർന്ന് ശാന്തന്‍ പാറ പൊലീസ് സ്റ്റേഷനില്‍ പരാതി നല്‍കി.
പൊലീസിന്റെയും ഫയര്‍ഫോഴ്‌സിന്റെയും യൂണിറ്റുകള്‍ രാത്രി പ്രദേശമാകെ പരിശോധന നടത്തിയെങ്കിലും കുട്ടിയെ കണ്ടെത്താനായില്ല. തുടര്‍ന്ന് രാവിലെ ആറ് മണി മുതല്‍ തിരച്ചില്‍ ആരംഭിച്ചു. രാവിലെ ഒന്‍പതുമണിയോടെ ഏലത്തോട്ടത്തിന് സമീപത്തെ കാട്ടില്‍ വച്ച്‌ കുട്ടിയെ കണ്ടെത്തുകയായിരുന്നു. കുട്ടിയെ ആശുപത്രിയിലേക്ക് മാറ്റുമെന്ന് പൊലീസ് പറഞ്ഞു.
https://www.facebook.com/Malayalivartha
