കായംകുളത്ത് നിന്നും കാണാതായ വിദ്യാര്‍ത്ഥികളെ കണ്ടെത്തി.....ഇന്നലെ വൈകിട്ട് എസ്.എസ്.എല്‍.സി പരീക്ഷാഫലം വന്നതിന് ശേഷമാണ് രണ്ട് വിദ്യാര്‍ത്ഥികളേയും കാണാതായത്
കായംകുളത്ത് നിന്നും ഇന്നലെ കാണാതായ രണ്ട് വിദ്യാര്‍ത്ഥികളെ എറണാകുളത്ത് കണ്ടെത്തി. ഇരുവരേയും എറണാകുളം എളമക്കര പൊലീസ് സ്റ്റേഷനില്‍ എത്തിച്ചതായി കായംകുളം പൊലീസ് സ്ഥിരീകരിച്ചു.
ഇന്നലെ വൈകിട്ട് എസ്.എസ്.എല്‍.സി പരീക്ഷാഫലം വന്നതിന് ശേഷമാണ് രണ്ട് വിദ്യാര്‍ത്ഥികളേയും കാണാതായത്. എരുവ കോട്ടപ്പുറത്ത് പടീറ്റതില്‍ അനിയുടെ മകന്‍ അക്‌സം, കായംകുളം കളീക്കല്‍ തെക്കതില്‍ അബ്ദുല്‍ വാഹിദിന്റെ മകന്‍ ലുക്ക്മാന്‍ എന്നിവരെയാണ് കാണാതായത്
കായംകളം ബോയ്‌സ് ഹൈസ്‌കൂളിലെ വിദ്യാര്‍ത്ഥികളാണ് ഇരുവരും. പരീക്ഷയില്‍ ഇരുവരും വിജയിച്ചെങ്കിലും കിട്ടിയ ഗ്രേഡുകള്‍ കുറവായിരുന്നു. ഇതിലുള്ള മനോവിഷമം കാരണം ഇരുവരും വീട് വിട്ടു പോയിരിക്കാം എന്ന സംശയത്തിലാണ് ബന്ധുക്കള്‍.
കുട്ടികളെ കാണാനില്ലെന്ന് കാണിച്ച് രണ്ടു കുട്ടികളുടേയും മാതാപിതാക്കള്‍ കായംകുളം പൊലീസ് സ്റ്റേഷനില്‍ പരാതി നല്‍കിയിരുന്നു. കുട്ടികളുടെ ബന്ധുക്കളും നാട്ടുകാരും പ്രദേശത്ത് ഇരുവര്‍ക്കുമായി തെരച്ചില്‍ നടത്തുന്നുണ്ടായിരുന്നു. തെരച്ചിലിനിടെ ഇന്നലെ രാത്രിയോടെ കായംകുളം റെയില്‍വേ സ്റ്റേഷന് സമീപത്ത് നിന്നും കുട്ടികളുടെ സൈക്കിളുകള്‍ പൊലീസ് കണ്ടെത്തിയിരുന്നു.
ഇവര്‍ക്കായി പൊലീസ് ബസ് സ്റ്റാന്‍ഡുകളും റെയില്‍വേ സ്റ്റേഷനുകളും കേന്ദ്രീകരിച്ച് തെരച്ചില്‍ നടത്തിവരുന്നതിനിടെയാണ് ഇരുവരേയും എറണാകുളത്ത് കണ്ടെത്തിയത്..
"
https://www.facebook.com/Malayalivartha
