ഡ്രൈവര്‍ക്കെതിരെ മനപ്പൂര്‍വമായ നരഹത്യാക്കേസ്... കെഎസ്ആര്‍ടിസി ബസ് ഇടിച്ച് യുവാക്കള്‍ മരിച്ച സംഭവത്തില്‍ ഡ്രൈവറുടെ ഭാഗത്ത് വീഴ്ചയുണ്ടായതായി കണ്ടെത്തല്‍...

കേസില്‍ അന്വേഷണ സംഘം സമര്‍പ്പിച്ച റിപ്പോര്‍ട്ടിലാണ് ഇത് പറയുന്നത്. ഡ്രൈവര്‍ ജാഗ്രത പുലര്‍ത്തണമായിരുന്നുവെന്നാണ് റിപ്പോര്‍ട്ടില്‍.

ഫെബ്രുവരി ഏഴിനാണ് കുഴല്‍ മന്ദത്ത് ദേശീയ പാതയില്‍ രണ്ടു യുവാക്കളുടെ ജീവനെടുത്ത അപകടം നടന്നത്.

ബസ് ഡ്രൈവര്‍ ഔസേപ്പിനെ സ്റ്റേഷന്‍ ജാമ്യത്തില്‍ വിട്ടതിന് എതിരെ യുവാക്കളുടെ കുടുംബം രംഗത്തെത്തിയിട്ടുണ്ടായിരുന്നു. മൂന്നു ദൃക്‌സാക്ഷികളുടെ മൊഴിയുടെയും സംഭവ സ്ഥലത്തുനിന്നും ലഭിച്ച വീഡിയോ ദൃശ്യങ്ങളുടെയും അടിസ്ഥാനത്തിലാണ് ഐപിസി 304 വകുപ്പ് കൂട്ടിച്ചേര്‍ത്തത്.

പത്തു വര്‍ഷം വരെ തടവു ലഭിക്കാവുന്ന കുറ്റമാണ് ചുമത്തിയിട്ടുള്ളത്. ബസ് ഡ്രൈവര്‍ പീച്ചി സ്വദേശി ഔസേപ്പ് ഇപ്പോള്‍ സസ്പന്‍ഷനിലാണ്. ഇയാളുടെ ഡ്രൈവിങ് ലൈസന്‍സ് മോട്ടോര്‍ വാഹന വകുപ്പ് റദ്ദാക്കിയിട്ടുണ്ടായിരുന്നു.