ത്യാഗത്തിന്റെയും ആത്മ സമര്‍പ്പണത്തിന്റെയും ഓര്‍മ്മകളുമായി വിശ്വാസികള്‍ ഇന്ന് ബലി പെരുന്നാള്‍ ആഘോഷിക്കും. രാവിലെ പള്ളികളില്‍ പെരുന്നാള്‍ നമസ്‌കാരവും പ്രത്യേക പ്രാര്‍ഥനയും നടക്കും. വിശുദ്ധ ഹജ്ജ് കര്‍മ്മവും ഈ സമയം നടക്കുന്നതിനാല്‍ ഹജ്ജുപെരുന്നാള്‍ എന്നും വിളിക്കാറുണ്ട്.

കോവിഡ് ഭീതി ഒഴിഞ്ഞതിന്റെ ആശ്വാസത്തിലാണ് ഏവരും. കനത്ത മഴ ഭീഷണിയിലും പറ്റുന്ന ഇടങ്ങളില്‍ ഈദ്ഗാഹുകള്‍ നടത്താനാണ് തീരുമാനം. പെരുന്നാള്‍ വിപണിയും സജീവമാണ്.

പ്രവാചകന്‍ ഇബ്രാഹിം നബിയുടെ ത്യാഗത്തിന്റെ ഓര്‍മ്മ പുതുക്കുകയാണ് ബലി പെരുന്നാള്‍. ഏറെ നാളത്തെ കാത്തിരിപ്പിന് ശേഷം ലഭിച്ച മകന്‍ ഇസ്മയിലിനെ ദൈവ കല്‍പ്പനപ്രകാരം ബലി കൊടുക്കാന്‍ തീരുമാനിച്ചെങ്കിലും നബിയുടെ ത്യാഗ സന്നദ്ധത കണ്ട് മകന് പകരം ആടിനെ ബലി നല്‍കാന്‍ ദൈവം നിര്‍ദേശിച്ചു. ഇതാണ് വിശ്വാസികള്‍ ബലി പെരുന്നാള്‍ ആയി ആഘോഷിക്കുന്നത്. പരസ്പരം ആശ്ലേഷിച്ച് പള്ളികളില്‍നിന്ന് പിരിയുന്ന വിശ്വാസികള്‍ പിന്നീട് ബലികര്‍മ്മത്തിലേക്ക് കടക്കും.

കോവിഡ് ഭീതി ഒഴിഞ്ഞതോടെ ആഘോഷം കെങ്കേമമാകും. കനത്ത മഴ തുടരുകയാണെങ്കിലും പരമാവധി ഈദ്്ഗാഹുകള്‍ നടത്തും. പെരുന്നാള്‍ വിപണി തിരക്കിലമര്‍ന്നു കഴിഞ്ഞു. കോഴിക്കോട് മിഠായിത്തെരുവിലടക്കം സാധാരണയിലധികം ആളുകള്‍ എത്തിയിട്ടുണ്ട്.

അതിജീവന നാളുകളില്‍ പരസ്പ്പപരം കരുതലോടെ താങ്ങായും തണലായും ആഘോഷിച്ച പെരുന്നാളില്‍ നിന്നും വ്യത്യസ്തമായി ,മൈലാഞ്ചിചുവപ്പോടുകൂടിയും ,പുത്തനുടുപ്പോടും , തക്ബീര്‍ ധ്വനികളുമായി പെരുന്നാളിനെ വരവേറ്റ് വിശ്വാസികള്‍.

ബലിപെരുന്നാള്‍ ആശംസ നേര്‍ന്ന് മുഖ്യമന്ത്രി പിണറായി വിജയന്‍. മനുഷ്യത്വത്തിന്റെ ഏറ്റവും ഉദാത്തമായ ആവിഷ്‌കാരം ത്യാഗമാണെന്ന് ഓര്‍മിപ്പിക്കുന്ന ദിനമാണ് ബലിപെരുന്നാള്‍. സ്വന്തം സുഖസന്തോഷങ്ങള്‍ ഉപേക്ഷിച്ച് മറ്റുള്ളവന്റെ നന്മയ്ക്കായി ആത്മാര്‍പ്പണം ചെയ്ത മനുഷ്യരുടെ ത്യാഗമാണ് ലോകത്തെ പ്രകാശമാനമാക്കുന്നതെന്ന സന്ദേശമാണ് ഈ ദിനം പകരുന്നത്. അതുള്‍ക്കൊള്ളാനും പങ്കുവയ്ക്കാനും ആ വിധം ബലി പെരുന്നാള്‍ ആഘോഷം സാര്‍ത്ഥകമാക്കാനും ഏവര്‍ക്കും സാധിക്കണമെന്ന് അദ്ദേഹം സന്ദേശത്തില്‍ പറഞ്ഞു.


ഒത്തുചേരാനും സാഹോദര്യത്തിന്റെ മാധുര്യം നുണയാനുമുള്ള ഒരു അവസരം കൂടിയായി ഈ സുദിനം മാറട്ടെ. മനുഷ്യരെ പല കള്ളികളിലാക്കുന്ന സങ്കുചിതാശയങ്ങളുടെ അതിര്‍വരമ്പുകള്‍ മായ്ച്ച് സന്തോഷം പരസ്പരം പങ്കുവയ്ക്കാനും വേദനകള്‍ മറന്ന് പുഞ്ചിരിക്കാനും ഏവര്‍ക്കും സാധിക്കട്ടെ. സമൃദ്ധവും സമത്വസുന്ദരവുമായ നാളേയ്ക്ക് വേണ്ടി ഒരുമിച്ച് നില്‍ക്കാന്‍ ഈ ആഘോഷം പ്രചോദനമാകട്ടെ. ഏവര്‍ക്കും ഹൃദയപൂര്‍വ്വം ബലി പെരുന്നാള്‍ നേരുന്നു, മുഖ്യമന്ത്രിയുടെ സന്ദേശത്തില്‍ പറയുന്നു.

അതേസമയം ത്യാഗത്തിന്റെയും സ്‌നേഹത്തിന്റെയും വെളിച്ചമാണ് വലിയ പെരുന്നാളിനെ സവിശേഷമാക്കുന്നത്. പ്രിയപ്പെട്ടതെന്തും വിട്ടുനല്‍കാന്‍ തയ്യാറായ ഒരുപാട് മനുഷ്യരുടെ നന്‍മയാണ് ലോകത്തെ പ്രകാശമാനമാക്കുന്നത്. സാഹോദര്യത്തില്‍ കൂടിയിരിക്കുന്നതിലും എന്റേത്, നിന്റേത് എന്ന സ്വാര്‍ത്ഥത വെടിഞ്ഞ് ഉള്ളതെന്തും പങ്കിടുന്ന സമത്വബോധത്തിലുമാണ് മനുഷ്യനന്മ ഉണര്‍ന്നിരിക്കുന്നതെന്ന ഓര്‍മ്മപ്പെടുത്തലാണ് ഓരോ ബലി പെരുന്നാളും. സമത്വസാഹോദര്യങ്ങള്‍ പുലരുന്ന ഒരു ലോകത്തിനായി ഒരുമിക്കാനുള്ളതാകട്ടെ ഈ ബലി പെരുന്നാളെന്ന് ആശംസിച്ച് നിയമസഭാസ്പീക്കര്‍

ത്യാഗനിര്‍ഭരമായ ജീവിതം നയിക്കാനും പ്രതിസന്ധികളില്‍ തളരാതെ മുന്നേറാനുമുള്ള പ്രചോദനമാണ് നമുക്ക് ബലിപെരുന്നാള്‍ നല്‍കുന്ന സന്ദേശം. പ്രകോപനങ്ങളെയും സാമൂഹിക പ്രതിസന്ധികളെയും സംയമനത്തോടെ നേരിടുകയും വിശ്വാസം കൊണ്ട് പ്രതിരോധിക്കുകയും വേണം. മാനവിക സ്‌നേഹത്തിന്റെയും വിശ്വ സാഹോദര്യത്തിന്റെയും സ്‌നേഹാര്‍ദ്രമായ സന്ദേശമാണ് ഹജ്ജ് കര്‍മവും അതിന്റെ പരിസമാപ്തിയോടെ ആഘോഷിക്കുന്ന ബലിപെരുന്നാളും. ആയതിനാല്‍ ബലിപെരുന്നാള്‍ സാമൂഹിക ഐക്യവും പരസ്പരസ്‌നേഹവും പകരാനുള്ളതാകണമെന്ന് കാന്തപുരം.