യുവതി ഹാളിലെ കട്ടിലില്‍ പുതച്ചു മൂടിയ നിലയില്‍.... തട്ടി വിളിച്ചിട്ടും പ്രതികരണമില്ല.... ഇരുകൈകളുടെയും ഞരമ്പുകള്‍ ചെറുതായി മുറിച്ച നിലയിലും കഴുത്തില്‍ വയര്‍ കുരുക്കിട്ട നിലയിലും കയ്യില്‍ കത്തിയുമായി ഭര്‍ത്താവ് .


മണിയാര്‍ ഇടക്കുന്നിലാണ് യുവതി വീട്ടിനുള്ളില്‍ കൊല്ലപ്പെട്ട നിലയില്‍ കണ്ടെത്തിയത്. കൈത്തണ്ട മുറിച്ച് കത്തിയും കേബിളുമായി ആത്മഹത്യക്കു ശ്രമിച്ച നിലയില്‍ ഭര്‍ത്താവിനെ വീട്ടില്‍ നിന്നു പൊലീസ് പിടികൂടി. മണിയാറില്‍ വാടകയ്ക്ക് താമസിക്കുന്ന ഇടക്കുന്ന് മുളവട്ടിക്കോണം മഞ്ജു ഭവനില്‍ മഞ്ജു(35)വാണ് കൊല്ലപ്പെട്ടത്.

ഭര്‍ത്താവ് അച്ചന്‍കോവില്‍ സ്വദേശിയായ മണികണ്ഠനാണ് (38) കസ്റ്റഡിയിലായത്. കഴുത്തില്‍ ഷാള്‍ മുറുക്കിക്കൊലപ്പെടുത്തിയ ശേഷം കൈത്തണ്ട മുറിച്ച് ആത്മഹത്യ ചെയ്യാന്‍ ശ്രമിച്ചെന്നാണ് പൊലീസിന്റെ പ്രാഥമിക നിഗമനത്തിലുള്ളത്. മണികണ്ഠനെ പൊലീസ് വിശദമായി ചോദ്യം ചെയ്തുവരുന്നു.

മഞ്ജുവിന്റെ കുടുംബവീടിന് സമീപത്താണ് ഇവര്‍ വാടകയ്ക്ക് താമസിക്കുന്നത്. ഇന്നലെ രാവിലെ മഞ്ജുവിന്റെ സഹോദരന്‍ പ്രമോദ് ഇവരുടെ വീട്ടിലെത്തി. മഞ്ജുവിനെ വിളിച്ചിട്ട് പ്രതികരണമുണ്ടായില്ല. അകത്തേക്ക് നോക്കിയപ്പോള്‍ ഹാളില്‍ കട്ടിലില്‍ മഞ്ജു പുതച്ചുമൂടി കിടക്കുന്നതാണ് കണ്ടത്. തട്ടിവിളിച്ചിട്ടും പ്രതികരണമൊന്നുമില്ലായിരുന്നു. ഈ സമയം അടുക്കളയില്‍ നിന്ന് ഇരുകൈകളുടെയും ഞരമ്പുകള്‍ ചെറുതായി മുറിച്ച നിലയിലും കഴുത്തില്‍ വയര്‍ കുരുക്കിട്ട നിലയിലും കയ്യില്‍ കത്തിയുമായി മണികണ്ഠനെയും കണ്ടെത്തി.

മഞ്ജുവിന്റെ സഹോദരന്‍ വിവരം അറിയിച്ചതിനെത്തുടര്‍ന്ന് ഉടന്‍ പൊലീസെത്തി മഞ്ജുവിന്റെ മൃതദേഹം പുനലൂര്‍ താലൂക്ക് ആശുപത്രി മോര്‍ച്ചറിയിലേക്കു മാറ്റി.

മണികണ്ഠനെ കസ്റ്റഡിയിലെടുത്ത് ചികിത്സയ്ക്കായി താലൂക്ക് ആശുപത്രിയിലാക്കി. പെയിന്റിങ് തൊഴിലാളിയായ മണികണ്ഠന്‍ മദ്യപിച്ചെത്തി ഭാര്യയെ സ്ഥിരമായി മര്‍ദിക്കാറുണ്ടായിരുന്നെന്നും പൊലീസ് . വെള്ളിയാഴ്ച വൈകിട്ടും ഇവരുടെ വീട്ടില്‍ ബഹളം കേട്ടിരുന്നതായി സമീപവാസികള്‍ പറയുന്നു.

പുനലൂര്‍ പൊലീസ് ഇന്‍ക്വസ്റ്റ് തയാറാക്കിയ മഞ്ജുവിന്റെ മൃതദേഹം പാരിപ്പള്ളി മെഡിക്കല്‍ കോളജ് ആശുപത്രിയില്‍ പോസ്റ്റ്‌മോര്‍ട്ടം നടത്തി. വിവാഹം കഴിഞ്ഞ് 15 വര്‍ഷത്തോളമായ മഞ്ജുവും മണികണ്ഠനും വര്‍ഷങ്ങളായി മണിയാറിലാണ് വാടകയ്ക്ക് താമസിച്ചുവരുന്നത്. ഇവര്‍ക്ക് രണ്ടു മക്കളുണ്ട്.