മരണത്തിലേക്കും ഒരുമിച്ച്.... കണ്ടു നില്‍ക്കാനാവാതെ നാട്ടുകാര്‍......ഒന്നിച്ച് ജോലിക്ക് പോകുന്ന ഉറ്റസുഹൃത്തുക്കളുടെ വേര്‍പാട് നാടിനെ തീരാ ദുഖത്തിലാഴ്ത്തി, ജോലി ചെയ്തു കൊണ്ടിരിക്കെ കുഴിയില്‍ നില്‍ക്കുകയായിരുന്ന വിനിലിന്റെയും ഷിബുവിന്റെയും മുകളിലേക്ക് മണ്ണിടിഞ്ഞുവീണു, രക്ഷാപ്രവര്‍ത്തനം ഉടന്‍ നടത്തിയെങ്കിലും ഇരുവരുടെയും ജീവന്‍ രക്ഷിക്കാനായില്ല

ഊരൂട്ടമ്പലം കിളിക്കോട്ടുകോണം വി.എസ്.ഭവനില്‍ ഉണ്ണി എന്നു വിളിക്കുന്ന വിനില്‍കുമാറും(39), വെള്ളൂര്‍ക്കോണം ഇടത്തറ വാഴവിള ഷാനുഭവനില്‍ ഷിബു(47) വുമാണ് കരകുളത്തുണ്ടായ മണ്ണിടിച്ചിലില്‍ മരണപ്പെട്ടത്.

വിനില്‍കുമാറിന്റെ ബൈക്കിലാണ് ഇരുവരും ജോലിക്ക് പോകുന്നത്. ഒരാളിന് ഒരുദിവസം പോകാന്‍ കഴിഞ്ഞില്ലെങ്കില്‍ രണ്ടുപേരും അവധിയെടുക്കുന്നതും പതിവായിരുന്നു. എല്ലാ ദിവസവും വെള്ളൂര്‍ക്കോണത്തുള്ള വീട്ടില്‍ നിന്നു മറ്റൊരു സുഹൃത്തിന്റെ ബൈക്കില്‍ കയറി രാവിലെ എട്ടുമണിയോടെ ഊരൂട്ടമ്പലം അയണിമൂട് കവലയില്‍ ഷിബു എത്തും. അവിടെ കാത്തുനില്‍ക്കുന്ന വിനില്‍കുമാറിന്റെ ബൈക്കിലാണ് പിന്നീട് പോകുന്നത്. ബുധനാഴ്ചയും ഇവര്‍ ഒരുമിച്ചാണ് പോയത്.

മടക്കയാത്രയില്‍ വിനില്‍കുമാര്‍ ഷിബുവിനെ വീട്ടില്‍ കൊണ്ടാക്കിയശേഷമാകും പലപ്പോഴും വീട്ടിലേക്ക് മടങ്ങുന്നത്. ബുധനാഴ്ച രാവിലെ 11-ഓടെയായിരുന്നു അപകടം നടന്നത്. കാട്ടാക്കടയിലെ പ്രമുഖ സ്വകാര്യ ആശുപത്രിക്ക് പുതിയ കെട്ടിടം നിര്‍മിക്കാനുള്ള പണിക്കിടെയായിരുന്നു ദുരന്തമുണ്ടായത്.

കഴിഞ്ഞ ദിവസങ്ങളില്‍ വലിയ കുന്നുകളിടിച്ച് ഇവിടെ പ്ലാറ്റ്‌ഫോം നിര്‍മിച്ചിരുന്നു. നാലു തൊഴിലാളികള്‍ അടിസ്ഥാനം കെട്ടുന്നതിനുള്ള കുഴികളെടുത്തുകൊണ്ടിരിക്കുന്നതിനിടെയാണ് മണ്ണിടിഞ്ഞുവീണത്. കുഴിയില്‍ നില്‍ക്കുകയായിരുന്ന വിനിലിന്റെയും ഷിബുവിന്റെയും മുകളിലേക്കാണ് മണ്ണിടിഞ്ഞുവീണത്. ഇരുവരെയും പുറത്തുകാണാനാകാത്ത വിധം മണ്ണുമൂടിപ്പോയെന്ന് ഒപ്പമുണ്ടായിരുന്ന തൊഴിലാളികളായ പറയുന്നു. ഇവരാണ് പെട്ടെന്നുതന്നെ നാട്ടുകാരെ വിളിച്ചുകൂട്ടി രക്ഷാപ്രവര്‍ത്തനം നടത്തിയത്.

പുറത്തെടുത്ത വിനിലിനെ നെടുമങ്ങാട് ജില്ലാ ആശുപത്രിയിലും ഷിബുവിനെ പേരൂര്‍ക്കട ജില്ലാ ആശുപത്രിയിലും എത്തിച്ചെങ്കിലും രക്ഷിക്കാനായില്ല. . സീനയാണ് ഷിബുവിന്റെ ഭാര്യ. മക്കള്‍: ഷാനു, സോന. വിനില്‍ അവിവാഹിതനാണ്


നെടുമങ്ങാട് ആര്‍.ഡി.ഒ. കെ.പി.ജയകുമാര്‍, തഹസില്‍ദാര്‍ ജെ.അനില്‍കുമാര്‍, ഡിവൈ.എസ്.പി. സ്റ്റുവര്‍ട്ട് കീലര്‍ എന്നിവര്‍ സ്ഥലത്തെത്തി മേല്‍നടപടികള്‍ സ്വീകരിച്ചു