സ്‌കൂള്‍ മാനേജര്‍ വൈദ്യുതി മോഷ്ടിച്ചെന്ന കേസില്‍ കെ എസ് ഇ ബി എഞ്ചിനീയര്‍ സ്‌കൂള്‍ മാനേജരെ കുറ്റപ്പെടുത്തുന്ന സാക്ഷിമൊഴി നല്‍കി. തിരുവനന്തപുരം രണ്ടാം അഡീ. ജില്ലാ സെഷന്‍സ് കോടതി മുമ്പാകെ നടക്കുന്ന വൈദ്യുതി മോഷണ കേസ് വിചാരണയിലാണ് വെള്ളറട കെ എസ് ഇ ബി സബ് എഞ്ചിനീയര്‍ ജയരാജ് നിര്‍ണ്ണായക മൊഴി നല്‍കിയത്.

വെള്ളറട ചൂണ്ടിക്കല്‍ - മണത്തോട്ടം റോഡിലുള്ള ശ്രീ ശങ്കര സ്‌കൂള്‍ മാനേജര്‍ ബാലചന്ദ്രന്‍ നായരാണ് വിചാരണ നേരിടുന്ന ഏക പ്രതി. ഇലക്ട്രിസിറ്റി നിയമത്തിലെ വകുപ്പ് 135 (1) ചുമത്തിയാണ് പ്രതിയെ ജഡ്ജി എ. ഇജാസ് വിചാരണ ചെയ്യുന്നത്.



2011 ഫെബ്രുവരി 24 ന് മോഷണം കണ്ടെത്തിയതിനെ തുടര്‍ന്ന് സ്‌കൂളിലേക്കുള്ള വൈദ്യുതി ബന്ധം വിച്ഛേദിച്ചിട്ടും മോഷണം തുടര്‍ന്നതായി സബ് എഞ്ചിനീയര്‍ മൊഴി നല്‍കി. 6,864 രൂപയുടെ വൈദ്യുതി മോഷണമാണ് നടന്നത്. തൊട്ടടുത്ത ആറാട്ടുകുഴി വാര്‍ഡിലെ കെട്ടിട നമ്പര്‍ ഉപയോഗിച്ച് കെ എസ് ഇ ബി യെ തെറ്റിദ്ധരിപ്പിച്ച് സ്‌കൂള്‍ കെട്ടിടത്തിലേക്ക് നിയമ വിരുദ്ധമായി കണക്ഷന്‍ എടുക്കുകയായിരുന്നു. 2011 ല്‍ താന്‍ വെള്ളറട സബ് എഞ്ചിനീയറായിരുന്നു.



കെ എസ് ഇ ബി ചീഫ് വിജിലന്‍സ് ഓഫീസറുടെ നിര്‍ദ്ദേശപ്രകാരം അസി.എഞ്ചിനീയറും താനും ഓവര്‍സിയറും വര്‍ക്കറും ഒന്നിച്ചാണ് കൃത്യ സ്ഥലത്ത് പോയത്. സ്‌കൂള്‍ നടക്കുന്ന കെട്ടിടത്തിലാണ് പോയത്. വര്‍ക്കറാണ് ഇലക്ട്രിക് പോസ്റ്റില്‍ കയറി വൈദ്യുതി ബന്ധം വിഛേദിച്ചത്. അസി. എഞ്ചിനീയര്‍ കെട്ടിടത്തിനകത്ത് കയറി ഫ്യൂസൂരി നിലവിലുള്ള റീഡിംഗ് എടുത്തു പോയി.വീണ്ടും കണക്ഷന്‍ നിലനില്‍ക്കുന്നതായി പരാതി ലഭിച്ചതനുസരിച്ച് എ ഇ യുടെ നിര്‍ദ്ദേശപ്രകാരം വീണ്ടും ചെന്നു.


അപ്പോള്‍ മുമ്പ് ഡിസ്‌കണക്റ്റ് ചെയ്തത് വീണ്ടും അതേ വിദ്യാഭ്യാസ സ്ഥാപനത്തിലേയ്ക്ക് കണക്റ്റ് ചെയ്ത് ഇലക്ട്രിസിറ്റി ഉപയോഗിക്കുന്നതായും സപ്ലേ ഉള്ളതായും ബോധ്യപ്പെട്ടു. കൂടെയുണ്ടായിരുന്ന സബ് എഞ്ചിനീയര്‍ സൈറ്റ് മഹസര്‍ തയ്യാറാക്കി വീണ്ടും കണക്ഷന്‍ കട്ട് ചെയ്തു. സംഭവത്തില്‍ വെളളറട പോലീസിന് മൊഴി കൊടുത്തതായും സബ് എഞ്ചിനീയര്‍ മൊഴി നല്‍കി.



2013 ല്‍ വെള്ളറട പോലീസ് കുറ്റപത്രം സമര്‍പ്പിച്ച കേസില്‍ നെയ്യാറ്റിന്‍കര ജുഡീഷ്യല്‍ ഫസ്റ്റ് ക്ലാസ്സ് മജിസ്‌ട്രേട്ട് കോടതി പ്രതിയെ വരുത്തി കുറ്റപത്ര പകര്‍പ്പ് നല്‍കിയ ശേഷം വിചാരണക്കായി 2014 ജനുവരി 29 ന് കമ്മിറ്റ് ചെയ്ത് ജില്ലാ സെഷന്‍സ് കോടതിക്കയക്കുകയായിരുന്നു.