ഇന്ന് ലോക പാമ്പ് ദിനമാണ്. നമ്മളെ പേടിപ്പിക്കുന്ന ഒരു ജീവിയാണ് പാമ്പ്. പാമ്പിനെ കുറിച്ച് നമ്മൾ അറിഞ്ഞിരിക്കേണ്ടുന്ന ഒരുപാട് വിവരങ്ങൾ ഉണ്ട്. മനുഷ്യനെ പാമ്പ് അനാവശ്യമായി ഉപദ്രവിക്കില്ലെങ്കിലും അത് അപകടകാരിയായ ജന്തു തന്നെയാണ്.

സംസ്ഥാനത്ത് പാമ്പുകളുടെ എണ്ണം ക്രമാതീതമായി വർദ്ധിക്കുന്നുവെന്നതാണ് മറ്റൊരു നിർണ്ണായകമായ കാര്യം. പാമ്പു കടി ഏൽക്കുന്നവരുടെ എണ്ണവും വർധിക്കുകയാണ്. കഴിഞ്ഞ അഞ്ചുവർഷത്തിനിടെ 450 പേർക്ക് പാമ്പുകടിയേറ്റ് മരിച്ചു. ഓരോ വർഷവും ശരാശരി 3000 പേർ ചികിത്സ തേടുന്നുണ്ടെന്നതും ശ്രദ്ധേയമായ കാര്യമാണ്.

കടിയേറ്റ ഉടൻ ചികിത്സ ലഭ്യമാക്കുക തന്നെ വേണം. താലൂക്കാശുപത്രികൾ മുതൽ ചികിത്സയ്ക്ക് ആവശ്യമായ ആന്റീവെനം കിട്ടും. ചികിത്സ വൈകുന്നത് മരണത്തിന് കാരണമാകും. രക്തപരിശോധന നടത്തി രക്തം കട്ട പിടിക്കാനുള്ള സാദ്ധ്യതകൾ പരിഗണിച്ച് ആന്റിവെനം നൽകാറുണ്ട്. പാർശ്വഫലങ്ങൾ കൂടുതലുള്ളതിനാൽ ഐ.സി.യു സംവിധാനവും 24 മണിക്കൂർ നിരീക്ഷണവും ആവശ്യമായി വരും.

പാമ്പ് കടിച്ചാൽ ചെയ്യേണ്ടുന്ന പ്രാഥമിക ശുശ്രൂക്ഷ എന്താണെന്ന് നോക്കാം ;

*കടിയേറ്റ സ്‌ഥലം നല്ല ശുദ്ധജലത്തിൽ വൃത്തിയായി കഴുകുക. സോപ്പ് ഉപയോഗിക്കാം.

*കടിയേറ്റ മുറിവിലൂടെ രക്‌തം ഞെക്കിക്കളയുക. മുറിവു കീറാൻ പാടില്ല. ബ്ലേഡ് ഉപയോഗിച്ച് മുറിവു വലുതാക്കി വിഷം കളയാൻ ചിലർ ശ്രമിക്കുന്നു. അതും ഗുണം ചെയ്യില്ലെന്നു മാത്രമല്ല കൂടുതൽ രക്‌ത നഷ്‌ടത്തിന് ഇടയാക്കും.

*കടിയേറ്റതിന്റെ രണ്ടോ മൂന്നോ സെ.മീറ്റർ മുകൾ ഭാഗത്തായി തുണി കെട്ടുക. കെട്ട് അധികം മുറുകാനോ അയയാനോ പാടില്ല. കടുംകെട്ടിട്ടു വയ്‌ക്കുന്നത് ഗുണത്തേക്കാളുപരി ദോഷമാണ് ചെയ്യുക. കെട്ടിനിടയിൽകൂടി ഒരു തീപ്പെട്ടിക്കൊള്ളി കടത്താനുള്ള ഇടം വേണം. ഇല്ലെങ്കിൽ രക്‌തസ്രവം നിലയ്‌ക്കും. പത്തു മിനിറ്റിനുള്ളിൽ അഴിച്ചു കെട്ടുകയും വേണം. കടിയേറ്റ് ഒരു മണിക്കൂറിലേറെ കെട്ട് നിലനിർത്തുകയുമരുത്. പേശികൾക്കു നാശം സംഭവിക്കുന്നത് ഒഴിവാക്കാനാണിത്.

*കുടിക്കാൻ ധാരാളം ശുദ്ധജലമോ ഉപ്പിട്ട കഞ്ഞിവെള്ളമോ നൽകുക. മധുരമുള്ള പാനീയങ്ങൾ ഒഴിവാക്കണം. ഒരു കാരണവശാലും ആൽക്കഹോൾ പാടില്ല. ചിലർ മൂത്രം വിഷമിറങ്ങാൻ ഉത്തമ പ്രതിവിധിയാണെന്നു പറഞ്ഞ് കുടിപ്പിക്കുന്നു. അത് അവശനായി കിടക്കുന്ന രോഗിയോട് ചെയ്യുന്ന കൊടും ക്രൂരതയാണ്.

*കടി കൊണ്ടയാൾ അധികം നടക്കാനും ഓടാനും പാടില്ല. ശരീരം ഇളകാതെ നോക്കണം. മുറിവേറ്റ ഭാഗത്ത് പൊള്ളിക്കുന്നതും അപകടകരമായ പ്രവണതയാണ്. രോഗിയുടെ മാനസിക ധൈര്യം വളരെ പ്രധാനമാണ്. എത്രയും പെട്ടെന്ന് ആശുപത്രിയിലെത്തിക്കുക എന്നതാണ് പ്രതിവിധികളിൽ പ്രധാനം. കടിയേറ്റ ആൾ പരിഭ്രമിക്കുന്നതും ഭയപ്പെടുന്നതും ഒഴിവാക്കുക എന്നതാണു ഏറ്റവും പ്രധാനപ്പെട്ട പ്രഥമശുശ്രൂഷ. കടിച്ചത് ഏതു പാമ്പാണ് എന്നു മനസ്സിലാക്കാൻ സാധിച്ചാൽ ചികിൽസയ്‌ക്കുണ്ടാകുന്ന കാലതാമസം ഒഴിവാക്കാം.