ആര്‍.എം.പി നേതാവും വടകര എം.എല്‍.എയുമായ കെ.കെ. രമക്കെതിരെ കടുത്ത അധിക്ഷേപവുമായി സെക്രട്ടറിയേറ്റിലെ പൊതുഭരണ വകുപ്പ് മുന്‍ അഡീഷണല്‍ സെക്രട്ടറിയും സി.പി.എം അനുകൂല സംഘടന പ്രവര്‍ത്തകനുമായ നന്ദകുമാര്‍ കൊളത്താപ്പിള്ളി.

രമക്കെതിരെ എം.എം. മണി നടത്തിയ വിവാദ പരാമര്‍ശങ്ങളെ അനുകൂലിച്ച്‌ കൊണ്ടാണ് അതിനേക്കാള്‍ രൂക്ഷമായ ഭാഷയില്‍ ഇയാള്‍ ഫേസ്ബുക് കുറിപ്പുമായി രംഗത്തെത്തിയത്. രമ കേരളത്തിലെ ആസ്ഥാന വിധവയല്ലെന്നും വെട്ടുകളുടെ എണ്ണം നോക്കിയാണോ വിധവകളുടെ റേറ്റിങ് നിശ്ചയിക്കുന്നതെന്നും ഇയാള്‍ കുറിപ്പില്‍ പറയുന്നു.

രാഷ്ട്രീയ വിധവകളുടെ എണ്ണമെടുത്താല്‍ വൈധവ്യം പേറുന്ന ഏറ്റവുമധികം വനിതകള്‍ സി.പി.എമ്മിലാണ്. നഴ്സറി കുട്ടികളെ പോലെ അവരാരും എന്നെ നുള്ളിയേ പിച്ചിയേ എന്നു വിളിച്ച്‌ ചിണുങ്ങി നടക്കാറില്ല. രമയുടെ ഈ ചിണുങ്ങല്‍ വല്ലാതെ അരോചകമാകുന്നുണ്ട്. വി.ഡി. സതീശനോട് ചോദിക്കട്ടെ? നിങ്ങള്‍ വെട്ടി നുറുക്കിയ നിങ്ങളുടെ തന്നെ മണ്ഡലം സെക്രട്ടറിയായിരുന്ന മധു ഈച്ചരത്തിന്റെ വിധവയേക്കാള്‍ മികച്ച വിധവയാകുന്നതെന്തുകൊണ്ട് നിങ്ങള്‍ക്ക് കെ.കെ. രമ? വെട്ടുകളുടെ എണ്ണം നോക്കിയാണോ വിധവകളുടെ റേറ്റിംഗ്? -നന്ദകുമാര്‍ ചോദിക്കുന്നു.

"ആക്ഷന്‍ ഹീറോ ബിജു" എന്ന ചിത്രത്തില്‍ മദ്യപിച്ച്‌ ഉടുതുണിയുരിഞ്ഞു കാണിച്ച്‌ ഹൃദ്രോഗിയാണെന്ന മറവില്‍ രക്ഷപ്പെടുന്ന കഥാപാത്രത്തെയാണ് രമ ഓര്‍മിപ്പിക്കുന്നത്. ഭര്‍ത്താവ് മരിച്ച നാളുകളില്‍ ആസ്ഥാന വിധവയോട് അല്‍പം അനുകമ്ബ തോന്നിയിരുന്നു. ഇപ്പോള്‍ വിധവ എന്ന പ്രയോഗം അവര്‍ക്ക് അവഹേളനമായി തോന്നുന്നെങ്കില്‍ ആ പരിഗണന ഇനി അവര്‍ അര്‍ഹിക്കുന്നില്ലല്ലോ -ഇയാള്‍ മറ്റൊരു കുറിപ്പില്‍ പറയുന്നു.

നന്ദകുമാര്‍ എഴുതിയതിന്റെ പൂര്‍ണരൂപം:

വിധവകളുടെ റേറ്റിംഗ് നിശ്ചയിക്കുന്നതാരാണ്?

കെ.കെ. രമ കേരളത്തിലെ ആസ്ഥാന വിധവയൊന്നുമല്ല. ആദ്യത്തെ വിധവയുമല്ല. ടി.പി.യുടേത് ആദ്യത്തെ രാഷ്ട്രീയ കൊലപാതകവുമല്ല. രാഷ്ട്രീയ വിധവകളുടെ എണ്ണമെടുത്താല്‍ വൈധവ്യം പേറുന്ന ഏറ്റവുമധികം വനിതകള്‍ സി.പി.എം ലാണ്. നഴ്സറി കുട്ടികളെ പോലെ അവരാരും എന്നെ നുള്ളിയേ പിച്ചിയേ എന്നു വിളിച്ച്‌ ചിണുങ്ങി നടക്കാറില്ല. ധീരജിന്റെ കൊലപാതകം ഇരന്നു വാങ്ങിയതാണെന്ന് നാഴികയ്ക്കു നാല്‍പതു വട്ടം ആവര്‍ത്തിക്കുന്ന കെ.സുധാകരന്റെ ഭാഷയില്‍ പറഞ്ഞാല്‍ ഈ വൈധവ്യവും ഇരന്നുവാങ്ങിയതാണെന്നു സി.പി.എം നു പറയാം.

അവരതു പറയാതിരിക്കുന്നത് അവരുടെ മര്യാദ. എന്തായാലും രമയുടെ ഈ ചിണുങ്ങല്‍ വല്ലാതെ അരോചകമാകുന്നുണ്ട്. പ്രിയപ്പെട്ട വി.ഡി. സതീശനോട് ചോദിക്കട്ടെ? അയ്യന്തോള്‍ ക്ഷേത്രമുറ്റത്തിട്ട് ഭാര്യയുടെയും പിഞ്ചു മകന്റെയും മുന്‍പില്‍ നിങ്ങള്‍ വെട്ടി നുറുക്കിയ നിങ്ങളുടെ തന്നെ മണ്ഡലം സെക്രട്ടറിയായിരുന്ന മധു ഈച്ചരത്തിന്റെ വിധവയേക്കാള്‍ മികച്ച വിധവയാകുന്നതെന്തുകൊണ്ട് നിങ്ങള്‍ക്ക് കെ.കെ. രമ? വെട്ടുകളുടെ എണ്ണം നോക്കിയാണോ വിധവകളുടെ റേറ്റിംഗ് ?