അറു വഷളത്തരം പറഞ്ഞിട്ടും മണിയെ പിന്തുണച്ച് പിണറായി വിജയന് വിശദീകരണം വേറെ
കെ.കെ. രമ എം.എല്.എ.യ്ക്കെതിരായ പരാമര്ശത്തില് നിലപാട് ആവര്ത്തിച്ച് എം.എം. മണി. നിയമസഭയില് നിയമപരമായി മാത്രമേ പ്രവര്ത്തിക്കാറുള്ളൂ എന്നും കാര്യങ്ങള് പറയുക എന്നത് തന്റെ ചുമതലയാണെന്നും മണി മാധ്യമങ്ങളോട് പറഞ്ഞു.
കഴിഞ്ഞ ഒരു വര്ഷമായി കെ.കെ. രമ മുഖ്യമന്ത്രിയേയും എല്.ഡി.എഫ്. സര്ക്കാരിനേയും ആക്ഷേപിക്കുകയാണ്. നേരത്തെത്തന്നെ കരുതിക്കൂട്ടി ഇത്തരത്തില് അവര്ക്കെതിരെ സംസാരിക്കണമെന്ന് വിചാരിച്ചിരുന്നു. എന്നാല് പറഞ്ഞ് പൂര്ത്തീകരിക്കാനുള്ള സമയം കിട്ടിയില്ലെന്നും എം.എം. മണി കൂട്ടിച്ചേര്ത്തു.
തിരഞ്ഞെടുക്കപ്പെടുന്ന പ്രതിനിധി, മന്ത്രി ആണേലും എം.എല്.എ. ആണേലും വിമര്ശനം ഉണ്ടാകും. അതിലൊന്നും തര്ക്കമില്ല. പക്ഷെ സാമാന്യ മര്യാദ വേണ്ടേ. അവര്ക്ക് മറുപടിയായി ചില വര്ത്തമാനം പറയാന് തന്നെ ഉദ്ദേശിച്ചതാണ്. അതിന് അവര് അവസരം തന്നില്ല. എനിക്ക് മുമ്പ് പ്രസംഗിച്ച മഹതി എന്ന് പറഞ്ഞപ്പോള് തന്നെ കോണ്ഗ്രസിന്റെ എം.എല്.എ.മാരില് നിന്ന് അവര് ഒരു വിധവയാണ് എന്ന് പറഞ്ഞു. ഞാന് പറഞ്ഞു അത് അവരുടെ ഒരു വിധിയാണ്, ഞങ്ങള് അതിന് ഉത്തരവാദികളല്ല എന്ന്. ഇതില് എന്താണ് തെറ്റ്? അപമാനിക്കാന് ഉദ്ദേശിച്ചിട്ടില്ലെന്നും മണി പറഞ്ഞു. അവരെ ആക്ഷേപിക്കാനാണെങ്കില് പണ്ടേ ആക്ഷേപിക്കേണ്ടതാണ്. അതിന് മാത്രം പറഞ്ഞിട്ടുണ്ട്. അങ്ങനെ ഒന്നും ചെയ്തില്ലല്ലോ എന്നും അദ്ദേഹം കൂട്ടിച്ചേര്ത്തു.
എംഎം മണിയുടെ വിവാദ പരാമര്ശത്തില് പ്രതികരിക്കാതെ മുഖ്യമന്ത്രി പിണറായി വിജയന്. ഡല്ഹി എകെജി ഭവനില് നിന്ന് മടങ്ങുമ്പോള് മുഖ്യമന്ത്രിയോട് എംഎം മണിയുടെ സ്ത്രീവിരുദ്ധ പരാമര്ശത്തെക്കുറിച്ച് പരാമര്ശത്തെക്കുറിച്ച് മാദ്ധ്യമങ്ങള് ചോദിച്ചെങ്കിലും മുഖ്യമന്ത്രിയുടെ മറുപടി മഴയെക്കുറിച്ച് ആയിരുന്നു.
'നല്ല മഴ വന്നില്ലേ, ഏതായാലും ഇവിടെ വന്നപ്പോള്. കുറേ നാളായിട്ട് മഴ ഇല്ലാത്തതിനെക്കുറിച്ച് നിങ്ങള് പറഞ്ഞുകൊണ്ടിരിക്കുകയാണല്ലോ.' എന്നായിരുന്നു മുഖ്യമന്ത്രിയുടെ പ്രതികരണം. എംഎം മണിയെപ്പറ്റി വീണ്ടും വീണ്ടും ചോദ്യങ്ങള് ഉയര്ത്തിയെങ്കിലും ഒന്നു പറയാന് പിണറായി വിജയന് തയ്യാറായില്ല. എംഎം മണിയെ മുഖ്യമന്ത്രി നിയന്ത്രിക്കണമെന്ന ആവശ്യം പ്രതിപക്ഷം ശക്തമാക്കിയിട്ടും ഇത് സംബന്ധിച്ച ചോദ്യങ്ങളോട് പിണറായി പ്രതികരിക്കാഞ്ഞതും ചര്ച്ചകള്ക്ക് വഴിയൊരുക്കിയിട്ടുണ്ട്
നിയമസഭയില് കെകെ രമ എംഎല്എയ്ക്കെതിരെ എംഎം മണി നടത്തിയ പരാമര്ശം ഏറെ വിവാദങ്ങള്ക്ക് വഴിവെച്ചിരുന്നു. 'ഇവിടെ ഒരു മഹതി സര്ക്കാരിന് എതിരെ പ്രസംഗിച്ചു. ആ മഹതി വിധവയായിപ്പോയി. അത് അവരുടെ വിധി. ഞങ്ങള് ആരും ഉത്തരവാദികള് അല്ല' എന്നായിരുന്നു എംഎം മണിയുടെ പരാമര്ശം. മണിയുടെ വാവിട്ട പരാമര്ശത്തിനെതിരെ പ്രതിപക്ഷ നേതാക്കള് ഒന്നാകെ രംഗത്തെത്തി. നിയമസഭയില് നടത്തിയ വിവാദ പരാമര്ശം പിന്വലിക്കണമെന്ന ആവശ്യവും പ്രതിപക്ഷം ഉയര്ത്തി. എന്നാല് മുഖ്യമന്ത്രി ഉള്പ്പെടെയുള്ളവര് മണിയെ ന്യായീകരിക്കുന്ന സമീപനമാണ് സ്വീകരിച്ചത്. എംഎം മണി പറഞ്ഞത് അവര് വിധവയായതില് തങ്ങള്ക്ക് പങ്കില്ലെന്നാണ് എന്നും അതില് ഒരു തെറ്റുമില്ലെന്നും മുഖ്യമന്ത്രി സഭയില് വിശദീകരിച്ചു. ഇതോടെ നിയമസഭയില് പ്രതിപക്ഷ ബഹളം വീണ്ടും രൂക്ഷമായി.
https://www.facebook.com/Malayalivartha
