ഇങ്ങനെയാവണം സഹോ... ശ്രീറാം വെങ്കിട്ടരാമനെ മാറ്റാനുണ്ടായ കാരണം വ്യക്തമാക്കി കൊടിയേരി ബാലകൃഷ്ണന്; ന്യായമായ വിയോജിപ്പുകളെ എല്ഡിഎഫ് തള്ളില്ല; മാറ്റിയത് ജനവികാരം കണക്കിലെടുത്ത്; ശ്രീറാമിന് പകരമെത്തിയ വിആര് കൃഷ്ണ തേജ വരവ് മാസാക്കി; ജനം ഏറ്റെടുത്തു
മുസ്ലീം സംഘടനകള് ഒന്നടങ്കം ഇളകിയതോടെ ശ്രീറാം വെങ്കിട്ടരാമനെ ആലപ്പുഴ കളക്ടര് സ്ഥാനത്ത് നിന്നും മാറ്റിയിരുന്നു. ഇപ്പോഴിതാ അക്കാര്യം തുറന്ന് പറയുകയാണ് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്. ആലപ്പുഴ കളക്ടര് സ്ഥാനത്ത് നിന്ന് ശ്രീറാം വെങ്കിട്ടരാമനെ മാറ്റിയത് ജനവികാരം കണക്കിലെടുത്തെന്ന് കോടിയേരി ബാലകൃഷ്ണന് പറഞ്ഞു. ജനാധിപത്യപരമായ വിയോജിപ്പുകളെ എല്ഡിഎഫ് തള്ളില്ലെന്നും കോടിയേരി അറിയിച്ചു.
ദേശാഭിമാനിയിലെ ലേഖനത്തിലാണ് ശ്രീറാം വെങ്കിട്ടരാമനെ കളക്ടറാക്കിയത് സര്വീസ് നടപടിക്രമങ്ങളുടെ ഭാഗമായി മാത്രമെന്ന് കോടിയേരി ബാലകൃഷ്ണന് പറയുന്നത്.
അതേസമയം സിപിഎമ്മിനകത്തും എല്ഡിഎഫിനകത്തും എതിര്പ്പുണ്ടായതോടെയാണ് മാധ്യമപ്രവര്ത്തകന് കൊല്ലപ്പെട്ട കേസില് പ്രതിയായ ശ്രീറാം വെങ്കിട്ടരാമനെ ആലപ്പുഴ കളക്ടര് സ്ഥാനത്ത് നിന്ന് മാറ്റാന് സര്ക്കാര് നിര്ബന്ധിതമായത്. പത്രപ്രവര്ത്തക യൂണിയന് മുതല് കേരള മുസ്ലിം ജമാഅത്ത് വരെ സര്ക്കാര് തീരുമാനത്തിനെതിരെ രംഗത്തെത്തിയതിന് പിന്നാലെയാണ് ആലപ്പുഴ ജില്ലാ കളക്ടര് സ്ഥാനത്ത് നിന്നും ശ്രീറാം വെങ്കിട്ടരാമനെ നീക്കിയത്.
സിവില് സര്വീസിന്റെ ഭാഗമായ ഉദ്യോഗസ്ഥര്ക്ക് ഓരോ സമയത്തും ഓരോ ചുമതല നല്കണമെന്നായിരുന്നു മുഖ്യമന്ത്രിയുടെ വാദം. എന്നാല് ശ്രീറാം വെങ്കിട്ടരാമനെ കലക്ടറാക്കാന് 2028 വരെ സമയമുണ്ടെന്നിരിക്കെ ധൃതിപ്പെട്ടെടുത്ത തീരുമാനം കടുത്ത വിമര്ശനം ക്ഷണിച്ചുവരുത്തിയിരുന്നു.
അതേസമയം ശ്രീറാമിന് പകരം പട്ടികജാതി വികസനവകുപ്പ് ഡയറക്ടറായിരുന്ന വി ആര് കൃഷ്ണ തേജ ആലപ്പുഴ കളക്ടറായി ഇന്നലെ ചുമതല ഏറ്റെടുത്തു. ചുമതല കൈമാറാന് ശ്രീറാം വെങ്കിട്ടരാമന് എത്തിയില്ല. പ്രളയകാലത്ത് ആലപ്പുഴ സബ് കളക്ടറായി പ്രവര്ത്തിച്ചിരുന്ന ആളാണ് കൃഷ്ണ തേജ് ഐഎഎസ്. അതേസമയം വരവ് മാസാക്കിയിരിക്കുകയാണ് കളക്ടര്.
ഫേസ് ബുക്ക് പോസ്റ്റിലൂടെ കുട്ടികള്ക്ക് അവധി പ്രഖ്യാപിച്ചാണ് കളക്ടര് ജനഹൃദയം കീഴടക്കിയത്. മഴ വന്നാല് ജില്ലാ കലക്ടര്മാരുടെ പേജിനു താഴെ അപേക്ഷകളുടെ മേളമാണ്. ഒരു അവധി കിട്ടുമോ എന്ന് അന്വേഷിച്ചെത്തുന്ന കുട്ടികളുടെ ബഹളം. ഇതിനിടെ, കലക്ടറായി ചുമതല ഏറ്റെടുത്തതിനു പിന്നാലെ ആദ്യ ഉത്തരവില് തന്നെ വ്യാഴാഴ്ച കുട്ടികള്ക്ക് അവധി അനുവദിച്ചിരിക്കുകയാണ് ആലപ്പുഴ ജില്ലാ കലക്ടര് വി.ആര്.കൃഷ്ണ തേജ. ഒപ്പം കുട്ടികള്ക്കായി ഒരു കുറിപ്പും അദ്ദേഹം പങ്കുവച്ചു. ഈ കുറിപ്പ് വൈറലാണ്.
'പ്രിയ കുട്ടികളെ, ഞാന് ആലപ്പുഴ ജില്ലയില് കലക്ടറായി ചുമതല ഏറ്റെടുത്തത് നിങ്ങള് അറിഞ്ഞു കാണുമല്ലോ. എന്റെ ആദ്യ ഉത്തരവ് തന്നെ നിങ്ങള്ക്കു വേണ്ടിയാണ്. നിങ്ങളുടെ സുരക്ഷ ഉറപ്പാക്കാന് വേണ്ടിയാണ്. നാളെ നിങ്ങള്ക്ക് ഞാന് അവധി പ്രഖ്യാപിച്ചിട്ടുണ്ട്. എന്നു കരുതി വെള്ളത്തില് ചാടാനോ ചൂണ്ട ഇടാനോ പോകല്ലേ. നമ്മുടെ ജില്ലയില് നല്ല മഴയാണ്. എല്ലാവരും വീട്ടില്ത്തന്നെ ഇരിക്കണം. അച്ഛനമ്മമാര് ജോലിക്ക് പോയിട്ടുണ്ടാകും. അവരില്ലെന്നു കരുതി പുറത്തേക്കു ഒന്നും പോകരുത്. പകര്ച്ചവ്യാധി അടക്കം പകരുന്ന സമയമാണ്. പ്രത്യേകം ശ്രദ്ധിക്കണം. കൃത്യസമയത്ത് ഭക്ഷണം കഴിക്കണം. അവധിയെന്നു കരുതി മടി പിടിച്ച് ഇരിക്കാതെ പാഠഭാഗങ്ങള് മറിച്ചു നോക്കണം. നന്നായി പഠിച്ച് മിടുക്കരാകൂ... സ്നേഹത്തോടെ' – കലക്ടര്.
കളക്ടറുടെ ഈ വാക്കുകള് കേരളം ഏറ്റെടുത്തു. മാധ്യമപ്രവര്ത്തകന് കെ.എം.ബഷീറിനെ വാഹനമിടിച്ച് കൊലപ്പെടുത്തിയെന്ന കേസില് പ്രതിയായ ശ്രീറാം വെങ്കിട്ടരാമനെ മാറ്റി കഴിഞ്ഞ ദിവസമാണ് വി.ആര്.കൃഷ്ണ തേജയെ പുതിയ ആലപ്പുഴ കലക്ടറായി നിയമിച്ചത്. അതിനാല് തന്നെ പുതിയ കളക്ടര് ഇരട്ടി മധുരമായി.
https://www.facebook.com/Malayalivartha
