കാലപ്പഴക്കം കാരണം കൂടുതല്‍ ഇടങ്ങളില്‍ ചോര്‍ച്ച ഉണ്ടാകുമെന്നുള്ള വിലയിരുത്തല്‍... ശബരിമല ശ്രീകോവിലിലെ മേല്‍ക്കൂരയില്‍ സമ്പൂര്‍ണ അറ്റകുറ്റപ്പണിക്ക് ദേവസ്വം ബോര്‍ഡ് തീരുമാനം... ഹൈക്കോടതിയുടെ അനുമതി വാങ്ങിയശേഷം 22-ന് പണികള്‍ ആരംഭിക്കുമെന്ന് ദേവസ്വം ബോര്‍ഡ് പ്രസിഡന്റ്.

ശ്രീകോവിലിന് മുന്‍വശത്തായി കോടിക്കഴുക്കോലിന്റെ ഭാഗത്തായി കണ്ടെത്തിയ ചോര്‍ച്ച കഴിഞ്ഞദിവസം താത്കാലികമായി അടച്ചിരുന്നു. ഈ ഭാഗത്തെ നാല് സ്വര്‍ണപ്പാളികള്‍ ഇളക്കി എം. സീലും സിലിക്കന്‍പശയും ഉപയോഗിച്ചാണ് വിടവ് അടച്ചിട്ടുള്ളത്. സ്വര്‍ണപ്പാളികള്‍ക്ക് താഴെയുള്ള ചെമ്പ് പാളികള്‍ക്കോ തടിക്കോ കേടുപാടില്ല. ശ്രീകോവിലിനകത്ത് ചോര്‍ച്ചയില്ലെന്നും പരിശോധനയില്‍ വ്യക്തമായിട്ടുണ്ട്. ശ്രീകോവിലില്‍ ഇടതുവശത്തായി കണ്ടെത്തിയ ചോര്‍ച്ചക്ക് പ്രധാനകാരണം ദ്രവിച്ച ചെമ്പാണിയാണെന്നാണ് പരിശോധനയില്‍ കണ്ടെത്തിയത്.

സ്വര്‍ണപാളികള്‍ക്കിടയില്‍ വിടവ് കൂടിയതും, മുമ്പ് ഉപയോഗിച്ച പശയുടെ കാലപ്പഴക്കവും ചോര്‍ച്ചയ്ക്ക് കാരണമായിട്ടുണ്ട്. കഴുക്കോലിന് മുകളില്‍ തേക്ക് പലക ഉറപ്പിച്ച് ചെമ്പുപാളി അടിച്ചതിനുശേഷം 33 സെന്റീമീറ്റര്‍ വ്യാപ്തിയിലാണ് സ്വര്‍ണ പാളികള്‍ സ്ഥാപിച്ചിട്ടുള്ളത്. ശ്രീകോവിലിന്റെ മേല്‍ക്കൂരയില്‍ സ്വര്‍ണം പൂശിയ ശേഷം അറ്റകുറ്റപ്പണി നടക്കുന്നത് ഇതാദ്യം. 1997-ലാണ് ശബരിമല ശ്രീകോവിലിലെ മേല്‍ക്കൂര സ്വര്‍ണം പൊതിയുന്നത്. തമിഴ്നാട്ടില്‍ നിന്നുള്ള ശില്പികളാണ് സ്വര്‍ണം പൊതിഞ്ഞത്.

തമിഴ്നാട് ശൈലിയിലാണ് നിര്‍മാണം . 36 കിലോ സ്വര്‍ണമാണ് ഉപയോഗിച്ചത്. 1904 കിലോ ചെമ്പും വേണ്ടിവന്നു. 18 കോടിയോളം ചെലവായെന്നാണ് കണക്കിലുള്ളത്. ശ്രീകോവിലിന് മുകളില്‍ കരിങ്കല്ല് കൊണ്ടുള്ള മേല്‍ക്കൂരയും അതിനു മുകളില്‍ തേക്ക് തടി കൊണ്ടുള്ള കഴുക്കോലും സ്ഥാപിച്ചു. ഇതിനുമുകളിലായി തേക്ക് പലക ഉറപ്പിച്ച് ചെമ്പുപാളി അടിച്ചശേഷമാണ് സ്വര്‍ണം പൊതിഞ്ഞിട്ടുള്ളത്.

അതേസമയം മേല്‍ക്കൂരയിലെ സ്വര്‍ണപ്പാളികള്‍ ഉറപ്പിച്ചിട്ടുള്ള മുഴുവന്‍ ചെമ്പ് ആണികളും മാറ്റി പുതിയത് സ്ഥാപിക്കും. സ്വര്‍ണപ്പാളികള്‍ക്കിടയിലെ വിടവുകള്‍ നികത്താനായി മികച്ച ഇനം പശ ഉപയോഗിക്കും.

സെപ്റ്റംബര്‍ ആറിന് ഓണ പൂജകള്‍ക്കായി നട തുറക്കുന്നതിന് മുന്നേ പണികള്‍ പൂര്‍ത്തിയാക്കാനാണ് ധാരണ. ശ്രീകോവിലിന് മുന്നിലെ സ്വര്‍ണം പൂശിയ മുഴുവന്‍ ഭാഗങ്ങളും മിനുക്കിയെടുക്കും.