തൃശ്ശൂർ ജില്ലയിൽ മഴ കനത്തതോടെ പെരിങ്ങൽക്കുത്ത് ഡാമിന്റെ നാലാമത്തെ ഷട്ടർ ഉടൻ തുറക്കുമെന്ന് കളക്ടർ അറിയിച്ചു. ഈ സാഹചര്യത്തിൽ ചാലക്കുടി പുഴയിൽ ജലനിരപ്പ് ഉയരുമെന്നും പുഴക്കരയിലുള്ളവരെ എത്രയും വേഗം ഒഴിപ്പിക്കണമെന്നും ജില്ലാ കളക്ടർ നിർദ്ദേശം നൽകി.തമിഴ്‌നാട്ടിലെ പറമ്പിക്കുളം, തൂണക്കടവ് ഡാമുകളില്‍ നിന്ന് ഇന്ന് രാവിലെ മുതല്‍ പൊരിങ്ങല്‍ക്കുത്ത് ഡാമിലേക്ക് ജലം ഒഴുകി വരികയാണ്.

ഡാം കൂടുതല്‍ തുറക്കുന്നതോടെ ചാലക്കുടി പുഴയില്‍ ഒന്നര മീറ്ററോളം വെള്ളം ഉയരാന്‍ സാധ്യതയുണ്ട്. അതോടൊപ്പം വേലിയേറ്റ സമയം ആവുന്ന പക്ഷം കടലിലേക്ക് വെള്ളം ഒഴുകിപ്പോവാതിരിക്കാനുള്ള സാധ്യതയുമുണ്ട്. ആയതിനാല്‍ പുഴക്കരയില്‍ താമസിക്കുന്നവരെ എത്രയും വേഗം വീടുകളില്‍ നിന്ന് സുരക്ഷിത സ്ഥാനങ്ങളിലേക്ക് മാറ്റിത്താമസിപ്പിക്കാനാണ് ജില്ലാ കലക്ടര്‍ നിര്‍ദ്ദേശം നല്‍കിയത്.

നടൻ കലാഭവൻ മണിയുടെ നാടായ ചേനത്ത് നാട്ടിൽ നാട്ടുകാർ തോണിയിറക്കി തയാറായിരിക്കുകയാണ്. ഉച്ചയ്ക്ക് ശേഷം ഈ പ്രദേശത്ത് വലിയ രീതിയിൽ വെള്ളം ഉയരാനുള്ള സാധ്യത മുന്നിൽ കണ്ടാണ് തയാറെടുപ്പുകൾ നടത്തുന്നത്. ജനങ്ങളെല്ലാം ആശങ്കയിലാണെന്ന് കലാഭവൻ മണിയുടെ സഹോദരൻ ആർഎൽവി രാമകൃഷ്ണൻ മാധ്യമങ്ങളോട് പ്രതികരിച്ചു.

2018 ൽ ചേനത്ത് നാട് പ്രദേശം ആകെ മുങ്ങിയിരുന്നു. ഇന്നത്തെ ആവസ്ഥ ആശങ്കയുണ്ടാക്കുന്നുണ്ട്. പ്രദേശത്ത് നിന്ന് മാറേണ്ട അവസ്ഥയാണ്. ഞങ്ങളെല്ലാം വീട്ടിൽ നിന്ന് സാധനങ്ങളല്ലൊം സുരക്ഷിത സ്ഥാനത്തേക്ക് മാറ്റിയെന്നും രാമകൃഷ്ണൻ പറയുന്നു.