ദുബായില് മരിച്ച നിലയില് കണ്ടെത്തിയ വ്ലോഗര് റിഫ മെഹ്നുവിന്റെ ഭര്ത്താവ് പോക്സോ കേസില് അറസ്റ്റില്
ദുബായില് മരിച്ച നിലയില് കണ്ടെത്തിയ വ്ലോഗര് റിഫ മെഹ്നുവിന്റെ ഭര്ത്താവ് പോക്സോ കേസില് അറസ്റ്റില്. റിഫയുടെ മരണവുമായി ബന്ധപ്പെട്ട് ഭര്ത്താവിന്റെ മൂന്കൂര് ജാമ്യാപേക്ഷ ഇന്ന് പരിഗണിക്കാനിരിക്കെയാണ് പോക്സോ കേസില് കോഴിക്കോട് കാക്കൂര് പൊലീസ് യുവാവിനെ അറസ്റ്റ് ചെയ്തത്.
വിവാഹസമയത്ത് റിഫയ്ക്ക് പ്രായപൂര്ത്തിയായിരുന്നില്ലെന്ന് കോഴിക്കോട് കാക്കൂര് പൊലീസ് പറഞ്ഞു. റിഫയുടെ ബന്ധുക്കളെത്തി പ്രതിയെ തിരിച്ചറിഞ്ഞതിനു പിന്നാലെ അറസ്റ്റ് രേഖപ്പെടുത്തുകയായിരുന്നു. മരണത്തില് തുടക്കം മുതലേ ദുരൂഹതകള് നിലനിന്നിരുന്നു. യുവതിയുടെ മരണത്തില് വ്ലോഗര് കൂടിയായ ഭര്ത്താവിനെതിരെ പൊലീസ് കേസെടുത്തിരുന്നു.
മാര്ച്ച് ഒന്നിനു പുലര്ച്ചെയാണ് റിഫയെ ദുബായ് ജാഹിലിയയിലെ ഫ്ലാറ്റില് മരിച്ച നിലയില് കണ്ടെത്തിയത്. മാനസികമായും ശാരീരികമായുമുള്ള പീഡനം റിഫയുടെ മരണത്തിനു കാരണമായതായി കാക്കൂര് പോലീസ് നടത്തിയ പ്രാഥമിക അന്വേഷണത്തില് വ്യക്തമായിരുന്നു.
റിഫയുടെ മരണം കൊലപാതകമാണെന്ന് സംശയിക്കുന്നതായി ചൂണ്ടിക്കാട്ടി കുടുംബം കോടതിയെ സമീപിച്ചതിനെത്തുടര്ന്ന് മൃതദേഹം പുറത്തെടുത്ത് പോസ്റ്റ്മോര്ട്ടം നടത്തിയിരുന്നു.ഭര്ത്താവ് ക്രൂരമായി ഉപദ്രവിച്ചിരുന്നുവെന്ന് കാണിക്കുന്ന റിഫയുടെ വോയിസ് ക്ലിപ്പുകള് അടക്കം പുറത്തുവന്നിരുന്നു.
https://www.facebook.com/Malayalivartha
