മഴ ശക്തമാകുന്നു....അതീവ ജാഗ്രതയോടെ.... അഞ്ച് ജില്ലകളില്‍ ഓറഞ്ച് അലര്‍ട്ട് , ഏഴ് ജില്ലകളില്‍ യെല്ലോ അലര്‍ട്ട് , ഒമ്പത് ജില്ലകളിലെ വദ്യാഭ്യാസ സ്ഥാപനങ്ങള്‍ക്ക് ഇന്ന് അവധി, മുല്ലപ്പെരിയാറില്‍ ജലനിരപ്പ് ഉയരുന്നു, മുല്ലപ്പെരിയാര്‍ അണക്കെട്ട് ഇന്ന് തുറന്നേക്കും

പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്‍, പാലക്കാട്, വയനാട്, കണ്ണൂര്‍ ജില്ലകളിലെ എല്ലാ വിദ്യാഭ്യാസ സ്ഥാപനങ്ങള്‍ക്കും ഇന്ന് അവധി. കാസര്‍കോട് ജില്ലയിലെ വെള്ളരിക്കുണ്ട്, ഹൊസ്ദുര്‍ഗ് താലൂക്കുകളിലും മലപ്പുറം ജില്ലയിലെ നിലമ്പൂര്‍, ഏറനാട് താലൂക്കുകളിലും അവധി. എംജി സര്‍വകലാശാല ഇന്നു നടത്താനിരുന്ന എല്ലാ പരീക്ഷകളും മാറ്റി. പുതുക്കിയ തീയതി പിന്നീട് അറിയിക്കും.

കനത്ത മഴയില്‍ ജലനിരപ്പ് ഉയര്‍ന്ന് 27 ഡാമുകള്‍ തുറക്കേണ്ടിവന്നതോടെ പ്രളയ സാഹചര്യം മുന്നില്‍കണ്ട് നദീതീരങ്ങളില്‍ താമസിക്കുന്നവരെ അടിയന്തരമായി മാറ്റിപ്പാര്‍പ്പിക്കാന്‍ തുടങ്ങി. ചാലക്കുടിയിലാണ് അപകടകരമായ സാഹചര്യം.

പെരിങ്ങല്‍കുത്ത്, ഷോളയാര്‍ ഡാമുകള്‍ തുറന്നതോടെയാണ് ചാലക്കുടി കനത്ത ആശങ്കയിലായത്. ചാലക്കുടിപ്പുഴയില്‍ ജലനിരപ്പ് ക്രമാതീതമായി ഉയര്‍ന്നതോടെ പ്രദേശവാസികള്‍ പ്രളയ ഭീതിയിലാണ്. പുഴയോരത്തുള്ള ജനങ്ങളെ മാറ്റിപ്പാര്‍പ്പിച്ച് തുടങ്ങി. 33 ക്യാമ്പുകള്‍ തുറന്ന് അയ്യായിരത്തോളംപേരെയാണ് ഒഴിപ്പിച്ചത്. മന്ത്രി കെ. രാജന്‍ ചാലക്കുടിയിലെത്തി സാഹചര്യം വിലയിരുത്തി.

പമ്പയിലും ജലനിരപ്പ് അപകടകരമാംവിധത്തില്‍ ഉയര്‍ന്നു. ജലനിരപ്പ് 136.06 അടിയിലെത്തിയ മുല്ലപ്പെരിയാര്‍ ഡാം ഇന്നു രവിലെ 10ന് തുറന്നേക്കും.

മലമ്പുഴ ഡാമും രാവിലെ തുറക്കും.തിങ്കളാഴ്ചവരെ ശക്തമായ മഴ തുടരു കൊല്ലത്ത് തെന്മല ഡാം ഇന്നുരാവിലെ 11ന് തുറക്കുന്നതോടെ കല്ലടയാറ്റില്‍ 90 സെ.മീറ്റര്‍ വരെ ജലനിരപ്പുയരും. കുട്ടനാട്, അപ്പര്‍ കുട്ടനാട് മേഖലകളില്‍ ജലനിരപ്പ് അപകടകരമായി ഉയര്‍ന്നു.



പത്തനംതിട്ടയില്‍ മണിമല, അച്ചന്‍കോവില്‍ നദികളിലും ജലനിരപ്പ് ഉയര്‍ന്നു. മൂഴിയാര്‍, മണിയാര്‍ ഡാമുകള്‍ തുറന്നു. ഗവി പാതയില്‍ അരണമുടിയില്‍ മണ്ണിടിച്ചിലുണ്ടായതിനെ തുടര്‍ന്ന് ഗതാഗതം നിരോധിച്ചിരിക്കുകയാണ്. പെരിയാറിലും മുവാറ്റുപുഴയാറിലും ജലനിരപ്പ് അപകടകരമായ നിലയിലാണ്.പെരിങ്ങല്‍കുത്ത് ഡാമിലെ നാല് എമര്‍ജന്‍സി ഷട്ടറുകളും ഷോളയാര്‍ ഡാമിന്റെ നാല് ഷട്ടറുകളും തുറന്നതോടെയാണ് ചാലക്കുടിപ്പുഴയില്‍ ജലനിരപ്പ് ക്രമാതീതമായി ഉയര്‍ന്നു.

അതേസമയം കനത്ത മഴതുടരുന്ന സാഹചര്യത്തില്‍ മുല്ലപ്പെരിയാല്‍ ഡാം ഇന്ന് തുറന്നേക്കും. ഡാമിലേക്കുള്ള നീരൊഴുക്ക് നിലവിലെ സ്ഥിതി തുടര്‍ന്നാല്‍ രാവിലെ 10 മണിക്ക് തുറക്കുമെന്നാണ് ബന്ധപ്പെട്ടവര്‍ അറിയിച്ചിരിക്കുന്നത്. ജലനിരപ്പ് 136 അടിയില്‍ എത്തിയപ്പോഴാണ് ജാഗ്രതാ നിര്‍ദേശം പുറപ്പെടുവിച്ചിരിക്കുന്നത്. നീരൊഴുക്കിന്റെ ഇനിയുള്ള അവസ്ഥ നോക്കിയാവും തുറക്കുന്നതിനുള്ള നടപടി സ്വീകരിക്കുക.