ശ്രീവരാഹം മുക്കോലയ്ക്കല്‍ എസ്. കെ നിവാസില്‍ വാടകയ്ക്ക് താമസിച്ചിരുന്ന തൂത്തുക്കുടി സ്വദേശിനി കന്നിയമ്മാള്‍ (38) നെ വെട്ടിക്കൊലപ്പെടുത്തിയ കേസിലെ വിധി പ്രസ്താവം തിരുവനന്തപുരം ആറാം അഡീഷണല്‍ സെഷന്‍സ് ജഡ്ജ് കെ.വിഷ്ണു ഇന്ന് പ്രഖ്യാപിക്കും.

അന്യസംസ്ഥാനക്കാരനായ പ്രതി ശിക്ഷ ഭയന്ന് ഒളിവില്‍ പോകുമെന്ന സാധ്യത വിലയിരുത്തി പ്രതിയെ ഇരുമ്പഴിക്കുള്ളിലിട്ട് കോടതി കസ്റ്റോഡിയല്‍ വിചാരണ ചെയ്യുകയായിരുന്നു.

സംശയ രോഗത്തെ തുടര്‍ന്ന് ഭര്‍ത്താവ് മാരിയപ്പനാണ് (45) കന്നിയമ്മയെ വെട്ടിക്കൊന്നത്. 2018 സെപ്റ്റംബര്‍ രാത്രിയിലായിരുന്നു കേസിനാസ്പദമായ സംഭവം. മാരിയപ്പന് ഭാര്യയെ സംശയമായിരുന്നു.

കൃത്യ ദിവസം കന്നിയമ്മയും മാരിയപ്പനും തിരുവനന്തപുരം നഗരത്തിലെ തിയേറ്ററില്‍ സിനിമ കണ്ടതിനുശേഷം രാത്രി 9.45 മണിയോടുകൂടി ശ്രീ വരാഹത്തെ വാടക വീട്ടിലെത്തിയിരുന്നു. സിനിമ തിയേറ്ററില്‍ വച്ച് പരിചയക്കാരെ കണ്ടു ചിരിച്ചതില്‍വെച്ച് വീട്ടില്‍ വച്ച് പരസ്പരം സംസാരവും വാക്കുതര്‍ക്കവുമായി.


തുടര്‍ന്ന് കന്നിഅമ്മയെ കഴുത്തില്‍ ബലം പ്രയോഗിച്ചു പിടിച്ച് കിടപ്പുമുറിയില്‍ കൊണ്ടുവന്ന് ചുറ്റികകല്ല് കൊണ്ട് തലയ്ക്കടിച്ച് ബോധം കെടുത്തിയശേഷം വെട്ടു പിച്ചാത്തി കൊണ്ട് വെട്ടിക്കൊല്ലുകയായിരുന്നു. കൃത്യസമയം നഗരത്തില്‍ കനത്ത മഴ പെയ്തതിനാല്‍ പരിസരവാസികള്‍ ശബ്ദം കേട്ടിരുന്നില്ല.


കന്നിയമ്മയുടെ മരണം ഉറപ്പാക്കിയ ശേഷം രാത്രിതന്നെ മാരിയപ്പന്‍ തിരുനെല്‍വേലിയിലേക്ക് കടന്നുകളഞ്ഞു. നഗരത്തില്‍ പിസ്സ വിതരണക്കാരനായ മകന്‍ മണികണ്ഠന്‍ ജോലികഴിഞ്ഞ് രാത്രി 11.30 ന് എത്തിയപ്പോഴാണ് കന്നിയമ്മ ചോരയില്‍ കുളിച്ചുകിടക്കുന്നത് കണ്ടത്. മകന്റെ നിലവിളി കേട്ടെത്തിയ നാട്ടുകാര്‍ ഫോര്‍ട്ട് പോലീസില്‍ വിവരം അറിയിക്കുകയായിരുന്നു.


കൃത്യത്തിന് മൂന്നാം നാള്‍ തിരുന്നെല്‍വേലിയില്‍ നിന്നും ഫോര്‍ട്ട് പോലീസ് മാരിയപ്പനെ കസ്റ്റഡിയിലെടുക്കുകയായിരുന്നു.