പുരാവസ്തു തട്ടിപ്പ് കേസിലെ പ്രതി മോന്സണ് മാവുങ്കല്ലിന്റെ ജാമ്യാപേക്ഷ ഇന്ന് സുപ്രീംകോടതി പരിഗണനയില്.... തനിക്കെതിരായ പീഡനക്കേസുകള് ക്രൈംബ്രാഞ്ച് കെട്ടിച്ചമച്ചതെന്ന് ഹര്ജിയില് പ്രതി മോന്സണ്
പുരാവസ്തു തട്ടിപ്പ് കേസിലെ പ്രതി മോന്സണ് മാവുങ്കല്ലിന്റെ ജാമ്യാപേക്ഷ സുപ്രീംകോടതി ഇന്ന് പരിഗണിക്കും . ഹൈക്കോടതി ജാമ്യം നിഷേധിച്ചതോടെയാണ് സുപ്രീംകോടതിയില് എത്തിയത്. തനിക്കെതിരായ പീഡനക്കേസുകള് ക്രൈംബ്രാഞ്ച് കെട്ടിച്ചമച്ചതെന്ന് ഹര്ജിയില് ആരോപിക്കുന്നുണ്ട്.
ജീവനക്കാരിയുടെ കോടതിയിലെ മൊഴിയും ഐ പാഡിന്റെ ഫോറന്സിക് റിപ്പോര്ട്ടും ഹാജരാക്കിയാണ് ജാമ്യാപേക്ഷ സമര്പ്പിച്ചിരിക്കുന്നത്. കേസില് കൂട്ടുപ്രതി ആകുമെന്ന ക്രൈംബ്രാഞ്ച് ഭീഷണിയെ തുടര്ന്നാണ് പീഡന കേസില് യുവതി തനിക്കെതിരെ മൊഴി നല്കിയതെന്നും മോന്സണ് അപേക്ഷയില് ആരോപിക്കുന്നു.
പുരാവസ്തു തട്ടിപ്പ് കേസ് പ്രതി മോന്സണ് മാവുങ്കലിന്റെ ജാമ്യാപേക്ഷ ഇക്കഴിഞ്ഞ 14ാം തിയതിയാണ് ഹൈക്കോടതി തളളിയത്. ബലാത്സംഗ പോക്സോ കേസുകളിലാണ് മോന്സണ് കോടതിയെ സമീപിച്ചിരുന്നത്. വിവാഹിതയായ യുവതിയെയും പ്രായപൂര്ത്തിയാകാത്ത പെണ്കുട്ടിയേയും ബലാത്സംഗം ചെയ്തെന്നായിരുന്നു കുറ്റം.
രണ്ടു കേസുകളിലും കുറ്റപത്രം സമര്പ്പിച്ചെന്നും വിചാരണ ഉടന് തുടങ്ങുമെന്നും സര്ക്കാര് അറിയിച്ചിരുന്നു. ഇതുകൂടി പരിഗണിച്ചാണ് ജാമ്യാപേക്ഷ തളളിയത്. പ്രായപൂര്ത്തിയാകാത്ത പെണ്കുട്ടിയെ പീഡിപ്പിച്ചെന്ന പരാതിയില് എറണാകുളം നോര്ത്ത് പൊലീസാണ് മോന്സണ് മാവുങ്കലിനെതിരെ കേസ് എടുത്തത്.
2019 ലായിരുന്നു കേസിനാസ്പദമായ സംഭവം. തുടര് വിദ്യാഭ്യാസം വാഗ്ദാനം ചെയ്ത് കലൂരിലെ വീട്ടില് വച്ച് പ്രായപൂര്ത്തിയാവാത്ത പെണ്കുട്ടിയെ പീഡിപ്പിച്ചെന്നാണ് കേസ്. പുരാവസ്തു തട്ടിപ്പ് കേസില് പിടിയിലായ മോന്സണ് മാവുങ്കല് നിലവില് ജുഡിഷ്യല് കസ്റ്റഡിയിലാണ്.
"
https://www.facebook.com/Malayalivartha
