വിദ്യാര്‍ത്ഥികള്‍ക്ക് ലാപ്‌ടോപ്പും സൈക്കിളും... വീട്ടമ്മമാര്‍ക്ക് 1000 രൂപ സഹായധനം പ്രഖ്യാപിച്ച് പുതുച്ചേരി സര്‍ക്കാര്‍.... സര്‍ക്കാരിന്റെ മറ്റാനുകൂല്യങ്ങളൊന്നും ലഭിക്കാത്ത ദാരിദ്ര്യരേഖയ്ക്ക് താഴെയുള്ള 21-55 പ്രായപരിധിയുള്ള വീട്ടമ്മമാര്‍ക്കാണ് മുഖ്യമന്ത്രി എന്‍.രംഗസ്വാമി അവതരിപ്പിച്ച ബജറ്റില്‍ സഹായധനം പ്രഖ്യാപിച്ചത്.


ഒന്‍പതാംക്ലാസ് വിദ്യാര്‍ഥികള്‍ക്ക് സൈക്കിളും ഗവ.-എയ്ഡഡ് സ്‌കൂളിലെ പ്ലസ്വണ്‍, പ്ലസ്ടു വിദ്യാര്‍ഥികള്‍ക്ക് ലാപ്ടോപ്പും പ്രഖ്യാപിച്ചു. കാരയ്ക്കല്‍ തുറമുഖത്തു നിന്ന് ശ്രീലങ്കയിലെ കങ്കേശന്‍തുറൈ തുറമുഖത്തേക്ക് ഫെറി സര്‍വീസ് ആരംഭിക്കുമെന്നും കാര്‍ഗോ സര്‍വീസ് ആരംഭിക്കുന്നതിനായി പുതുച്ചേരി തുറമുഖം വികസിപ്പിക്കുമെന്നും മുഖ്യമന്ത്രി.

മാഹി മത്സ്യബന്ധന തുറമുഖം, ജനറല്‍ ആസ്പത്രി ട്രോമാകെയര്‍ കെട്ടിടം, പള്ളൂര്‍ ആസ്പത്രി കെട്ടിടനിര്‍മാണം തുടങ്ങിയ പദ്ധതികളൊന്നും പരാമര്‍ശിച്ചില്ല. പുതുച്ചേരി, കാരയ്ക്കാല്‍ മേഖലയിലെ സഹകരണ സ്ഥാപനങ്ങളെ പുനരുദ്ധരിക്കാന്‍ 30 കോടി രൂപ വകയിരുത്തിയപ്പോഴും മാഹിയെ അവഗണിച്ചു. 10,696.61 കോടി രൂപയുടെ ബജറ്റില്‍ മാഹിയുടെ പ്രധാന പദ്ധതികളൊന്നും പരിഗണിച്ചില്ല.

ബജറ്റില്‍ 2312.77 കോടി (21.62 ശതമാനം) ശമ്പളത്തിനും 1122.32 കോടി (10.49 ശതമാനം) പെന്‍ഷനും 2311.61 കോടി (21.61 ശതമാനം) വായ്പാ തിരിച്ചടവിനും 1440 കോടി വൈദ്യുതിക്കു (13.46 ശതമാനം) മാണ് നീക്കിവെച്ചത്. വാര്‍ധക്യപെന്‍ഷനും സാമൂഹികക്ഷേമ പദ്ധതികള്‍ക്കും 1400 കോടി (13.09 ശതമാനം), സൊസൈറ്റികള്‍ക്കും തദ്ദേശസ്ഥാപനങ്ങള്‍ക്കും സഹകരണസ്ഥാപനങ്ങള്‍ക്കും ഗ്രാന്റ് നല്‍കാന്‍ 1333.19 കോടിയും (12.46 ശതമാനം) നീക്കിവെച്ചു.

സംസ്ഥാനത്തെ വരുമാനത്തിലേറെയും ശമ്പളവും പെന്‍ഷനും വായ്പാതിരിച്ചടവിനുമാണ് വിനിയോഗിക്കുന്നതെന്ന് ബജറ്റ് പ്രസംഗത്തില്‍ മുഖ്യമന്ത്രി എന്‍.രംഗസ്വാമി പറഞ്ഞു.