യാത്രക്കാരും ജീവനക്കാരും പ്രതിഷേധത്തില്‍....സര്‍വീസ് മുടങ്ങിയതോടെ പ്രതിഷേധം ഭയന്ന് ആലപ്പുഴ കെഎസ്ആര്‍ടിസി ഡിപ്പോയിലെ പമ്പ് അടച്ചുപൂട്ടി.

ഡിപ്പോയില്‍ രണ്ടു ദിവസമായി ഇന്ധനമില്ല. കഴിഞ്ഞ ദിവസം സര്‍വീസുകള്‍ മുടങ്ങിയതിനെതിരെ യാത്രക്കാരും ജീവനക്കാരും പ്രതിഷേധിച്ചിരുന്നു. ഇന്നലെയും ഇന്ധനമെത്തിയില്ല. തുടര്‍ന്നാണു പ്രതിഷേധം ഭയന്ന് പമ്പ് അടച്ചുപൂട്ടിയത്. ഡിപ്പോയിലെ ആകെ സര്‍വീസ് 64 എണ്ണമാണ്. നാളെ 45 സര്‍വീസുകള്‍ മാത്രം. പുതിയ സ്റ്റോക്ക് ഇന്ധനം ഇന്നു പുലര്‍ച്ചെ എത്തിയെങ്കില്‍ മാത്രമേ ഈ സര്‍വീസുകളും നടത്താനാകൂകയുള്ളൂ.

ജില്ലയില്‍ ഏറ്റവും കൂടുതല്‍ വരുമാനം ലഭിക്കുന്നത് എടത്വ ഡിപ്പോയിലാണ് . അതുകൊണ്ട് സര്‍വീസ് ചുരുക്കാത്തത് ഇവിടെ മാത്രം. 17 ബസുകള്‍ ഇന്നും സര്‍വീസ് നടത്തും. സ്വന്തമായി പമ്പ് ഇല്ലാത്തതിനാല്‍ മറ്റു ഡിപ്പോകളെ ആശ്രയിച്ചാണ് ഇന്ധന ലഭ്യത ഉറപ്പാക്കുന്നത്. ചെങ്ങന്നൂര്‍ ഡിപ്പോയിലാകട്ടെ ആകെയുള്ളത് 36 സര്‍വീസുകള്‍. ഇന്നലെ ഒരു ബസ് കേടായതിനെത്തുടര്‍ന്ന് കന്യാകുമാരി സര്‍വീസ് നടത്തിയില്ല. ബാക്കി 35 സര്‍വീസുകളും നടത്തി. ഇന്നു മുഴുവന്‍ സര്‍വീസുകളുണ്ടാകും. 3000 ലീറ്റര്‍ ഡീസല്‍ സ്റ്റോക്കുണ്ട്.

മാവേലിക്കര ഡിപ്പോയിലെ 28 സര്‍വീസുകളില്‍ ഇന്നലെ നടത്തിയത് 23 സര്‍വീസുകളാണ്. ഇന്ന് 25 സര്‍വീസുകളുണ്ടാകും. 4000 ലീറ്റര്‍ ഡീസല്‍ സ്റ്റോക്കുണ്ടെങ്കിലും പുതിയ സ്റ്റോക്ക് എന്നെത്തുമെന്ന കാര്യത്തില്‍ തീരുമാനമായിട്ടില്ല. കായംകുളം ഡിപ്പോയില്‍ ഡീസല്‍ സ്റ്റോക്കുണ്ട്. ഇന്ന് 40 സര്‍വീസുണ്ടാകും. കായംകുളംപുനലൂര്‍ റോഡില്‍ രാത്രി 7.30 ന് ശേഷം ഓര്‍ഡിനറി സര്‍വീസുകള്‍ ഇല്ലാത്തത് യാത്രക്കാരെ വലയ്ക്കുന്നുണ്ട്.

ചേര്‍ത്തല ഡിപ്പോയിലെ 56 സര്‍വീസുകളില്‍ ഇന്ന് 53 സര്‍വീസുകള്‍ നടത്തും. ഹരിപ്പാട് ഡിപ്പോയിലെ 35 സര്‍വീസുകളുള്ളതില്‍ മുഴുവന്‍ സര്‍വീസുകളും ഇന്നും നടത്തും. ഒന്നിടവിട്ട ദിവസങ്ങളിലാണ് ഇവിടെ ഇന്ധനമെത്തുന്നത്.


അതേസമയം തലയോലപ്പറമ്പില്‍ വൈകിയാണ് ഡീസല്‍ ക്ഷാമം കാരണം ബസ് സര്‍വീസുകള്‍ പലതും മുടങ്ങിയെന്ന വിവരം യാത്രക്കാര്‍ അറിയുന്നത്. ബസ് കിട്ടാതിരുന്നതിനാല്‍ പലരും വീട്ടിലേക്കു മടങ്ങി.