കണ്ണൂരില്‍ പേയിളകിയ പശു വിരണ്ടോടി. ഇതിന്റെ ആക്രമണത്തില്‍ നാലുപേര്‍ക്ക് പരിക്കേറ്റ സാഹചര്യത്തിൽ കൂടുതല്‍ ആളുകള്‍ക്ക് പരുക്കേല്‍ക്കാതിരിക്കാൻ ദയാവധം നടത്തി. അഴിച്ചുവിട്ട് വളര്‍ത്തുന്ന പശുവിന് പേയിളകിയത് വലിയ പരിഭ്രാന്തിയാണ് പരത്തിയത്.

അഴീക്കല്‍ ഭാഗത്താണ് പേയിളകിയ പശു വിരണ്ടോടി പരിഭ്രാന്തി പരത്തിയത്. പിന്നാലെ അക്രമവാസന കാണിച്ചിരുന്ന പശുവിനെ ദയാവധത്തിനിരയാക്കുകയായിരുന്നു. പശുവിന്റെ ശരീരത്ത് പലയിടത്തും മുറിവുകളുണ്ട്. പേപ്പട്ടി കടിച്ചതിന് സമാനമാണ് മുറിവുകളെന്ന് ഡോക്ടര്‍മാര്‍ വ്യക്തമാക്കി.

കഴിഞ്ഞ ദിവസം ചാലയിലും ചിറ്റാരിപറമ്പും പേയിളകിയ പശുവിനെ ദയാവധത്തിന് ഇരയാക്കിയിരുന്നു. മൂന്നാമത്തെ പശുവിനാണ് ജില്ലയില്‍ അജ്ഞാതകാരണങ്ങള്‍ കൊണ്ടു പേയിളകുന്നത്. തുടര്‍ച്ചയായി പട്ടികള്‍ക്കും പശുക്കള്‍ക്കും പേയിളകുന്നത് ജനങ്ങളെ പരിഭ്രാന്തിയിലാഴ്‌ത്തുന്നുണ്ട്.