കേരളത്തിലെ സ്ത്രീകളുടെ ആയുസ്സ് വര്‍ദ്ധിക്കുന്നതിന്റെ കാരണം കുടുംബാസൂത്രണമെന്ന് സിപിഎം സംസ്ഥാന സെക്രട്ടറി എം.വി ഗോവിന്ദന്‍. പത്തും പതിനഞ്ചും മക്കളെ പ്രസവിക്കുന്നതിനാല്‍ പണ്ട് കാലങ്ങളില്‍ സ്ത്രീകള്‍ക്ക് ആയുസ്സ് കുറവായിരുന്നു എന്നാണ് സിപിഎം നേതാവിന്റെ നിരീക്ഷണം. കുടുംബാസൂത്രണം ഫലപ്രദമായി നടപ്പാക്കിയതോടെ ആ സ്ഥിതിയ്ക്ക് മാറ്റം വന്നു എന്നും സ്ത്രീകളുടെ ആയുസ്സ് വര്‍ദ്ധിച്ചുവെന്നും എം.വി ഗോവിന്ദന്‍ പറഞ്ഞു. ഡോ. എ കെ അബ്ദുല്‍ ഹക്കീം എഴുതിയ 'ആഫ്രിക്കന്‍ യാത്രകളുടെ സാംസ്‌കാരിക ദൂരങ്ങള്‍' എന്ന പുസ്തകത്തിന്റെ പ്രകാശന ചടങ്ങില്‍ സംസാരിക്കുകയായിരുന്നു അദ്ദേഹം.

വിവാഹം കഴിക്കുന്ന സ്ത്രീകള്‍ക്ക് പുരുഷന്മാരേക്കാള്‍ പത്ത് വയസ്സ് എങ്കിലും കുറവായിരിക്കണം എന്നായിരുന്നു പണ്ട് കാലത്ത് നിലനിന്നിരുന്ന പൊതുബോധം. പത്തും പതിനഞ്ചും മക്കളെ പ്രസവിക്കുന്നതിനാല്‍ സ്ത്രീകള്‍ക്ക് ആയുസ് കുറവായതുകൊണ്ടാണ് വിവാഹത്തിന് അത്രയും പ്രായ വ്യത്യാസം നിര്‍ബന്ധമായിരുന്നത് എന്ന് എം.വി.?ഗോവിന്ദന്‍ പറഞ്ഞു.

ഒപ്പം മരിക്കണമെങ്കില്‍ ഒറ്റ വഴിയേ ഉള്ളൂ, രണ്ടാളും ഒരു പത്തു വയസിന്റെ വ്യത്യാസത്തില്‍ വിവാഹം കഴിക്കുക. ഈ ചിന്തയിലാണ് പണ്ടു കാലത്ത് വിവാഹം നടത്തിയിരുന്നത്. കുടുംബാസൂത്രണം ഫലപ്രദമായി നടപ്പിലാക്കിയതോടെ ആ സ്ഥിതി മാറി. ഇതോടെ, സ്ത്രീകളുടെ ആയുസ് വര്‍ദ്ധിക്കുകയും ചെയ്തു. ഇപ്പോള്‍ അഞ്ചോ ആറോ വയസ് അങ്ങോട്ടും ഇങ്ങോട്ടും കൂടിയാലും കുറഞ്ഞാലും പ്രശ്‌നമില്ലെന്നും എം.വി.?ഗോവിന്ദന്‍ അഭിപ്രായപ്പെട്ടു.