രഹസ്യവിവരത്തിനൊടുവില്‍....  വയനാട് പുല്‍പ്പള്ളി സ്റ്റേഷന്‍ പരിധിയിലെ സ്വകാര്യ റിസോര്‍ട്ടില്‍ ലഹരി പാര്‍ട്ടി നടത്തിയെന്ന കേസില്‍ ഒന്‍പത് യുവാക്കളെ അറസ്റ്റ് ചെയ്ത് പോലീസ്.

റിസോര്‍ട്ടില്‍ റൂമെടുത്ത യുവാക്കളില്‍ നിന്ന് 2.42 ഗ്രാം ഹാഷിഷ് ഓയിലടക്കം പുല്‍പ്പള്ളി ഇന്‍സ്‌പെക്ടറുടെ നേതൃത്വത്തിലുള്ള പൊലീസ് സംഘം പിടിച്ചെടുത്തു. വടകര കോട്ടപ്പള്ളി സ്വദേശികളായ വള്ളിയാട് പയിങ്ങാട്ട് വീട്ടില്‍ ബിവിന്‍ (32), വള്ളിയാട് കിഴക്കേച്ചാലില്‍ ഹൗസ് നിധീഷ് (27), വള്ളിയാട് മാളികത്താഴെ വീട്ടില്‍ മിഥുന്‍ (29), പുത്തന്‍കോയിലോത്ത് വിഷ്ണു (27), അക്ഷയ് (24), വാനക്കണ്ടിപ്പൊയില്‍ വീട്ടില്‍ വിഷ്ണു (26), വരവുകണ്ടിയില്‍ വീട്ടില്‍ സംഗീത് (29), വള്ളിയാട് ജിതിന്‍ (31), വള്ളിയാട് റെജീഷ് (32) എന്നിവരാണ് പോലീസിന്റെ പിടിയിലകപ്പെട്ടത്.


സംഘം വയനാട്ടിലേക്ക് യാത്ര ചെയ്യാനായി ഉപയോഗിച്ച ഇന്നോവ കാറും പൊലീസ് കസ്റ്റഡിയില്‍ എടുത്തിട്ടുണ്ട്. ഇവര്‍ക്കെതിരെ എന്‍ ഡി പി എസ് നിയമപ്രകാരം പ്രകാരം കേസ് രജിസ്റ്റര്‍ ചെയ്തിട്ടുണ്ട്. രഹസ്യവിവരം ലഭിച്ചതിനെ തുടര്‍ന്ന് പോലീസ് റിസോര്‍ട്ടിലെത്തി പരിശോധന നടത്തുകയായിരുന്നുവെന്നാണ് വിവരം.

അതേസമയം, ബാലുശ്ശേരി, കാക്കൂര്‍, താമരശ്ശേരി, അത്തോളി പൊലീസ് സ്റ്റേഷന്‍ പരിധിയിലെ സ്ഥിരം മയക്കുമരുന്ന് വിതരണക്കാരായ മൂന്നുപേര്‍ ബാലുശ്ശേരിയില്‍ പിടിയിലായി.

നിരവധി കേസുകളില്‍ ഉള്‍പ്പെട്ട നന്മണ്ട താനോത്ത് സ്വദേശി അനന്തു, കണ്ണങ്കര പുല്ലു, മലയില്‍ സ്വദേശി ജാഫര്‍, അമ്പായത്തോട് പുല്ലുമലയില്‍ സ്വദേശി മിര്‍ഷാദ് എന്നിവരാണ് ഇന്ന് പിടിയിലായത്. ഇവര്‍ മുമ്പ് ഇത്തരം കേസുകള്‍ക്ക് ജയിലിലായി അടുത്തിടെ ജയിലില്‍ നിന്നിറങ്ങിയവരാണ്.