വീടുകുത്തിത്തുറന്ന് സ്വര്‍ണവും പണവും കവര്‍ന്ന കേസിലെ കൂട്ടുപ്രതിയെ പിടികൂടിയത് 15 വര്‍ഷങ്ങള്‍ക്കു ശേഷം.... കാഞ്ഞാര്‍ പോലീസ് തമിഴ്‌നാട്ടിലെ കാമാക്ഷിപുരത്തുനിന്നാണ് പിടികൂടിയത്. സംഭവം നടന്ന് വര്‍ഷങ്ങള്‍ക്ക് ശേഷമാണ് മോഷ്ടാവിനെ പൊക്കിയത്. കേസിലെ മുഖ്യ പ്രതി ഷോളയപ്പ(42)നെയാണ് അറസ്റ്റുചെയ്തത്.

2007-ല്‍ അറക്കുളം ഇന്റര്‍മീഡിയറ്റ് ഭാഗത്ത് തുരുത്തിക്കരയില്‍ ഷിബുവിന്റെ വീട്ടില്‍ നിന്നാണ് പതിനഞ്ചര പവന്‍ സ്വര്‍ണവും 1500 രൂപയും കവര്‍ന്നത്. നാലുപേരുള്‍പ്പെട്ട സംഘമായിരുന്നു കവര്‍ച്ച നടത്തിയത്.

കേസില്‍ പ്രതികളായ കാമാക്ഷിപുരം സ്വദേശികളായ യേശുദാസ്, വടിവേലു, പളനിവേലു എന്നിവര്‍ 2007-ല്‍ത്തന്നെ മറ്റൊരു മോഷണക്കേസില്‍ തമിഴ്‌നാട് പോലീസിന്റെ പിടിയിലായിരുന്നു. ഇവരുടെ മൊഴിയില്‍ നിന്ന് ഷോളയപ്പനും മോഷണത്തിനുണ്ടായിരുന്നുവെന്ന വിവരം കിട്ടിയിട്ടുണ്ടായിരുന്നു.

എന്നാല്‍, കേസന്വേഷണം പലവിധ കാരണങ്ങളാല്‍ മുടങ്ങിപ്പോയി. ഒടുവില്‍ ദീര്‍ഘകാലമായി മുടങ്ങിക്കിടക്കുന്ന കേസുകളുടെ കൂട്ടത്തിലേക്ക് ഈ കേസുമെത്തി.

എന്നാല്‍, ഇത്തരം കേസുകള്‍ തെളിയിക്കുന്നതിന് പ്രത്യേക ടീമിനെ നിയോഗിച്ചതോടെയാണ് ഒന്നരദശാബ്ദത്തിന് ശേഷം മോഷ്ടാവിനെ പിടികൂടിയത്. കാമാക്ഷിപുരം പോലീസിന്റെ സഹായത്തോടെയാണ് ഇരുവരും ചേര്‍ന്ന് ഷോളയപ്പനെ അറസ്റ്റുചെയ്തത്. കോടതി പ്രതിയെ റിമാന്‍ഡിലാക്കി.