പാനൂരിൽ എസ്.ഡി.പി.ഐ. പ്രവര്‍ത്തകന്റെ വീടിനുനേരെ ബോംബാക്രമണം. കുന്നോത്തുപറമ്പ് പഞ്ചായത്തിലെ നോര്‍ത്ത് പാറാട് പാറേമ്മല്‍ അജ്മലിന്റെ വീടിനുനേരേയാണ് ബോംബെറിഞ്ഞ്. വീടിന്റെ മുറ്റത്താണ് സ്‌ഫോടനമുണ്ടായത്. സംഭവ ദിവസം അഞ്ചുപേരടങ്ങുന്ന സംഘമാണ് അക്രമം നടത്തിയതെന്നും രണ്ട് സ്റ്റീല്‍ബോംബുകള്‍ എറിഞ്ഞതായും അജ്മല്‍ പറഞ്ഞു.

അതേസമയം ബോംബുകള്‍എറിഞ്ഞതിനെ തുടർന്ന് മുന്‍ഭാഗത്തെ ജനല്‍ച്ചില്ലുകളും വീട്ടിലേക്കുള്ള ചവിട്ടുപടിയും തകര്‍ന്നു. തുടർന്ന് പൊട്ടാതെ കിടന്നിരുന്ന ഒരു ബോംബ് കണ്ണൂരില്‍നിന്നുള്ള ബോംബ് സ്‌ക്വാഡ് എത്തി നിര്‍വീര്യമാക്കി. ഇന്നലെ പുലര്‍ച്ചെ രണ്ടോടെയാണ് സംഭവം നടന്നത്. പാനൂര്‍ പോലീസ് ഇന്‍സ്‌പെക്ടര്‍ എം.പി. ആസാദിന്റെ നേതൃത്വത്തിലുളള സംഘം സ്ഥലം സന്ദര്‍ശിച്ചു. ഇതോടെ സംഭവത്തില്‍ കേസെടുത്ത് അന്വേഷണം തുടങ്ങി.

മാത്രമല്ല ശനിയാഴ്ച രാവിലെ മൊകേരി പഞ്ചായത്ത് മുസ്ലിം ലീഗ് കമ്മിറ്റി പ്രസിഡന്റ് കാങ്ങാട് അസീസിന്റെ വീട്ടിനുനേരേ ബോംബെറിഞ്ഞിരുന്നു. സംഭവത്തിൽ കുറ്റവാളികളെ കണ്ടെത്താന്‍ അന്വേഷണം ഊര്‍ജിതമാക്കിയതായി ഇന്‍സ്‌പെക്ടര്‍ പറഞ്ഞു. സമീപത്തെ നിരീക്ഷണക്യാമറകള്‍ കേന്ദ്രീകരിച്ചും അന്വേഷണം തുടരുകയാണ്.