കേരളത്തിലെ പ്രമുഖ ഇലക്‌ട്രോണിക്‌സ്, ഗ്രോസറി റീട്ടെയില്‍ ശൃംഖലയായ ബിസ്മിയെ ഏറ്റെടുക്കാന്‍ ശതകോടീശ്വരന്‍ മുകേഷ് അംബാനിയുടെ ഉടമസ്ഥതയിലുള്ള റിലയന്‍സ് ഇന്‍ഡസ്ട്രീസ്. ഇലക്‌ട്രോണിക്, ഹൈപ്പര്‍മാര്‍ക്കറ്റ് ഫോര്‍മാറ്റുകള്‍ എന്നിവ സംയോജിപ്പിച്ച് സംസ്ഥാനത്ത് മുപ്പതോളം വലിയ സ്റ്റോറുകള്‍ നടത്തുന്ന ബിസ്മിയെ ഏറ്റെടുക്കാനുള്ള നടപടിക്കായി റിലയന്‍സ് സമീപിച്ചതായാണ് റിപ്പോര്‍ട്ട്.

ഫെസ്റ്റിവല്‍ സീസണ്‍ മുന്നില്‍ കണ്ടുകൊണ്ട് ദീപാവലിക്ക് മുമ്പ് ഏറ്റെടുക്കല്‍ കരാര്‍ പൂര്‍ത്തിയാക്കാനാണ് റിലയന്‍സ് ശ്രമിക്കുന്നത് എന്ന് ചര്‍ച്ചകളുടെ ഭാഗമായ രണ്ട് മുതിര്‍ന്ന വ്യവസായ എക്‌സിക്യൂട്ടീവുകള്‍ വ്യക്തമാക്കി. എന്നാല്‍ ഇതുവരെ ബിസ്മിയുടെ ഭാഗത്ത് നിന്നും പരാതികരങ്ങള്‍ ഉണ്ടായിട്ടില്ല.

വ്യവസായ പ്രമുഖനായ വി എ അജ്മലിന്റെ ഉടമസ്ഥതയിലുള്ള ഒരു കുടുംബ സംരംഭമാണ് ബിസ്മി. ഏകദേശം 800 കോടി രൂപയാണ് ബിസ്മിയുടെ ബിസ്മിയുടെ വരുമാനം. അതേസമയം, ഊഹാപോഹങ്ങളെയും കിംവദന്തികളെയും കുറിച്ച് കമ്പനി പ്രതികരിക്കില്ലെന്നും അജ്മല്‍ വ്യക്തമാക്കിയിട്ടുണ്ട്. .

ബിസ്മിയുടെ സ്റ്റോറുകളില്‍ മിക്കവയും 30,000 ചതുരശ്ര അടി മുതല്‍ 40,000 ചതുരശ്ര അടി വരെ വരുന്നവയാണ്. ഇലക്ട്രോണിക് വ്യാപാരത്തിനൊപ്പം തന്നെ ഹൈപ്പര്‍മാര്‍ക്കറ്റുകളും ഒരുക്കുന്നതാണ് ബിസ്മിയുടെ പ്രത്യേകത. ചില ഷോറൂമുകള്‍ 10,000 ചതുരശ്ര അടി വിസ്തീര്‍ണമുള്ളവയുണ്ട്.

റീടൈല്‍ വില്പനയിലുള്ള കുതിച്ചു കയറ്റമാണ് റിലയന്‍സിനെ ബിസ്മിയിലേക്ക് ആകര്‍ഷിക്കുന്നത്. ഈ കരാര്‍ യാഥാര്‍ഥ്യമായാല്‍ റിലയന്‍സിന് ദക്ഷിണേന്ത്യന്‍ വിപണിയില്‍ ഇത് വലിയ സ്വാധീനം നല്‍കും. റിലയന്‍സ് റീട്ടെയില്‍ മുമ്പ് ഇത്തരത്തിലുള്ള മൂന്ന് ഏറ്റെടുക്കലുകള്‍ നടത്തിയിട്ടുണ്ട്. തമിഴ്‌നാട്ടിലെ ശ്രീ കണ്ണന്‍ ഡിപ്പാര്‍ട്ട്‌മെന്റല്‍ സ്റ്റോര്‍ പ്രാദേശിക പലചരക്ക് ശൃംഖലയായ ജയ്‌സൂര്യസ് റീട്ടെയില്‍ എന്നിവ റിലയസ് ഏറ്റെടുത്തവയില്‍ ഉള്‍പ്പെടുന്നു.

വരുമാനം, സ്റ്റോറുകളുടെ എണ്ണം, ലാഭം എന്നിവ മാനദണ്ഡമാക്കി വിലയിരുത്തുമ്പോള്‍ റിലയന്‍സ് ഇന്ത്യയിലെ ഏറ്റവും വലിയ റീട്ടെയിലര്‍ ആണ്. ലക്ട്രോണിക്‌സ്, ഗ്രോസറി, ഫാഷന്‍ തുടങ്ങിയവയുടെ വില്പനയില്‍ റിലയന്‍സ് മുന്നിട്ട് നില്‍ക്കുന്നു.