ഇടുക്കി തൊടുപുഴയിൽ ട്രൈബൽ ഹോസ്റ്റലിൽ നിന്നും പ്രായപൂർത്തിയാകാത്ത നാല് വിദ്യാർത്ഥികളെ കാണാതായതായി പരാതി. 12, 13 വയസുള്ള കുട്ടികളെ ചൊവ്വാഴ്ച രാവിലെ 8.30 മുതലാണ് കാണാതായത്. മാത്രമല്ല ഹോസ്റ്റൽ വിട്ട് പോകുമെന്ന് ഇവർ മറ്റ് കുട്ടികളോടു പറഞ്ഞിരുന്നതായി റിപ്പോർട്ടുണ്ട്. സംഭവത്തിൽ, പൊലീസ് അന്വേഷണം ആരംഭിച്ചു.

അതേസമയം ഓണപ്പരീക്ഷയ്ക്ക് മാര്‍ക്ക് കുറഞ്ഞതിന് വീട്ടുകാര്‍ വഴക്കുപറയുമെന്ന ഭയത്തിൽ വീടുവിട്ട പതിനഞ്ചുകാരനെ കണ്ടെത്തി. സംഭവത്തിൽ ഉപ്പുതറ പൊലീസ് ആണ് പതിനഞ്ചുകാരനെ കണ്ടെത്തി വീട്ടുകാരോടൊപ്പം അയച്ചത്. തിങ്കളാഴ്ചയാണ് സംഭവം നടന്നത്. പത്തനംതിട്ട കോന്നി സ്വദേശിയായ വിദ്യാര്‍ത്ഥിയാണ് സ്‌കൂള്‍ വിട്ടശേഷം നാട്ടുവിട്ടത്.

മാത്രമല്ല പത്താംക്ലാസ് വിദ്യാർത്ഥിയായ കുട്ടിയ്ക്ക് ഓണപ്പരീക്ഷയിൽ മലയാളത്തിന് മാര്‍ക്ക് കുറവായതിനെ തുടർന്ന് വീട്ടുകാർ വഴക്കുപറയുമെന്ന ഭയത്തിൽ വീടുവിട്ടിറങ്ങുകയായിരുന്നു.
ഇതോടെ റാന്നിയില്‍ നിന്ന് കട്ടപ്പനയ്ക്കുള്ള സ്വകാര്യബസില്‍ യാത്രചെയ്ത കുട്ടിയുടെ പെരുമാറ്റത്തില്‍ സംശയംതോന്നിയ ജീവനക്കാര്‍ ഉപ്പുതറ പൊലീസിനെ വിവരം അറിയിക്കുകയായിരുന്നു.

ഇതിനു പിന്നാലെ രാത്രി എട്ടുമണിയോടെ പരപ്പില്‍ എത്തിയപ്പോള്‍ പൊലീസ് കുട്ടിയെ സ്റ്റേഷനിലേക്ക് കൂട്ടിക്കൊണ്ടുവന്നു. തുടർന്ന് കാര്യങ്ങള്‍ ചോദിച്ചറിഞ്ഞശേഷം വീട്ടുകാരെ അറിയിച്ചു. രാത്രി പതിനൊന്നരയോടെ വീട്ടുകാര്‍ എത്തി കുട്ടിയെ ഏറ്റുവാങ്ങി.