വിഴിഞ്ഞം ഉച്ചക്കടയിലെ ലേബര്‍ക്യാമ്പില്‍ ഇതര സംസ്ഥാന ജാര്‍ഖണ്ഡുകാരനായ തൊഴിലാളിയെ കമ്പിപ്പാരകൊണ്ട് തലയ്ക്കടിച്ച് കൊലപ്പെടുത്തിയ കേസിലെ പ്രതി ലഖാന്ത്ര സാഹിനെ കോടതി 14 ദിവസത്തേക്ക് റിമാന്റ് ചെയ്തു. ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് മഹേഷ് ആണ് പ്രതിയെ റിമാന്റ് ചെയ്തത്.


വിഴിഞ്ഞം പൊലീസ് പ്രതിയെ ഝാര്‍ഖണ്ഡിലെ വിട്ടില്‍ നിന്ന് സെപ്റ്റംബര്‍ 25 നാണ് അറസ്റ്റുചെയ്തത്. തുടര്‍ന്ന് തൊട്ടടുത്ത് ഉള്ള ഝാര്‍ഖണ്ഡ് കോടതിയില്‍ ഹാജരാക്കി ട്രാന്‍സിറ്റ് വാറണ്ട് ഉത്തരവു പ്രകാരം 28 ന് കേരളത്തിലെത്തിക്കുകയായിരുന്നു.



ഝാര്‍ഖണ്ഡിലെ ബാല്‍ബദ്ധ പൊലീസ് സ്റ്റേഷന്‍ പരിധിയില്‍ താമസക്കാരനായ ലഖാന്ത്ര സാഹിന്‍(44) ആണ് അറസ്റ്റിലായത്. ഝാര്‍ഖണ്ഡ് സ്വദേശിയായ കന്താ ലൊഹ്റനാണ് (36) അടിപിടിക്കിടെ കമ്പിപ്പാരകൊണ്ട് തലയ്ക്കടിയേറ്റതിനെ തുടര്‍ന്ന് മരണപ്പെട്ടത്.



ഇക്കഴിഞ്ഞ 17 ന് രാത്രി 9 ന് പുളിങ്കുടി നെട്ടത്താന്നി റോഡിലെ ലേബര്‍ ക്യാമ്പിലാണ് സംഭവം നടന്നത്. ഗുരുതര പരിക്കേറ്റ കന്താ ലൊഹ്റയെ പ്രതിയും ക്യാമ്പിലെ മറ്റൊരു മറുനാടന്‍ തൊഴിലാളിയായ സുനിലും ആദ്യം പയറുംമൂടുളള സ്വകാര്യ ആശുപത്രിയിലും പിന്നീട് മെഡിക്കല്‍ കോളേജ് ആശുപത്രിയിലുമെത്തിച്ചെങ്കിലും ചികിത്സയിലിരിക്കെ പിറ്റേന്ന് രാവിലെ മരണപ്പെട്ടു. മരണ വിവരമറിഞ്ഞ പ്രതിയും സുഹ്യത്തും വൈകിട്ടോടെ കേരളം വിട്ടു. പ്രതി മെഡിക്കല്‍ കോളേജ് ആശുപത്രിയില്‍ തെറ്റായ മേല്‍വിലാസം നല്‍കിയതിനാല്‍ വിഴിഞ്ഞം പൊലീസും വിവരമറിയാന്‍ വൈകി.


തലക്കടിക്കാന്‍ ഉപയോഗിച്ച ഇരുമ്പ് പാരയും രക്തക്കറ തുടച്ചു മാറ്റിയ തുണിയും കൃത്യ സ്ഥലത്ത് നിന്ന് പോലീസ് കണ്ടെത്തി.

പ്രതി ജാര്‍ഖണ്ഡ് നാട്ടിലെത്തിയതായി മനസിലാക്കിയ വിഴിഞ്ഞം പൊലീസിന്റെ പ്രത്യേക അന്വേഷണ സംഘം ഝാര്‍ഖണ്ഡിലെത്തി ബാല്‍ബദ്ദ പൊലീസിന്റെ സഹായത്തോടെ പ്രതിയുടെ വീട് കണ്ടെത്തി. തുടര്‍ന്ന് ദ്രുത കര്‍മ്മ സേനയുടെ സഹായത്തോടെ വീടുവളഞ്ഞ സമയത്ത് ഗ്രാമവാസികളില്‍ ഒരുവിഭാഗം പ്രതിയെ കൊണ്ടുപോകുന്നത് തടഞ്ഞെങ്കിലും ഝാര്‍ഖണ്ഡ് പൊലീസ് കൂടുതല്‍ സേനയെ വരുത്തി പ്രതിയെ വീടിനുളളില്‍ നിന്ന് പിടികൂടുകയായിരുന്നു.


തുടര്‍ന്ന് പ്രതിയെ വിഴിഞ്ഞം പൊലീസിന് കൈമാറി. വിഴിഞ്ഞത്തെ എസ്.ഐ.മാരായ ജി.വിനോദ്, ദിനേശ്, സീനിയര്‍ സി.പി.ഒ. ഷിനു, സി.പി.ഒ,മാരായ രാമു, ഷിബു എന്നിവരുള്‍പ്പെട്ട അഞ്ചംഗ സംഘമാണ് പ്രതിയെ അറസ്റ്റുചെയ്തത്.