അട്ടപ്പാടി മധുകൊലക്കേസില്‍ കോടതിയെ കബളിപ്പിച്ച 29-ാം സാക്ഷി സുനില്‍ കുമാറിനെതിരെ നടപടി വേണമെന്ന ഹര്‍ജി വിചാരണക്കോടതി ഇന്ന് കോടതി പരിഗണിക്കും. സുനില്‍ കുമാറിനെതിരായ നടപടി തീരുമാനിക്കുന്നതിന്റെ ഭാഗമായി അന്വേഷണ ഉദ്യോഗസ്ഥന്‍ എസ്പി ടി.കെ.സുബ്രഹമണ്യനോട് ഹാജരാകാനും കോടതി നിര്‍ദേശിച്ചിട്ടുണ്ട്.

സ്വന്തം ദൃശ്യം കോടതിയില്‍ പ്രദര്‍ശിപ്പിച്ചപ്പോള്‍ നിഷേധിച്ച 36-ാം സാക്ഷി അബ്ദുല്‍ ലത്തീഫിനോട് ഇന്ന് പാസ്‌പ്പോര്‍ട്ട് , ഫോട്ടോ എന്നിവ സഹിതം ഹാജരാക്കാനും കോടതി ആവശ്യപ്പെട്ടിട്ടുണ്ട്.

11 പ്രതികളുടെ ജാമ്യഹര്‍ജിയും മണ്ണാര്‍ക്കാട് എസ് സി എസ് ടി കോടതി ഇന്ന് പരിഗണിക്കും. സാക്ഷികളെ സ്വാധീനിക്കാനായി ശ്രമിച്ചെന്ന് കണ്ടെത്തിയതിന് പിന്നാലെയാണ് പ്രതികളുടെ ജാമ്യം വിചാരണക്കോടതി റദ്ദാക്കിയത്. പ്രതികള്‍ ഹൈക്കോടതിയില്‍ അപ്പീല്‍ പോയെങ്കിലും വിചാരണക്കോടതി ഉത്തരവ് ഹൈക്കോടതി ശരിവയ്ക്കുകയായിരുന്നു.

90, 91 സാക്ഷികളുടെ വിസ്താരമാണ് കോടതി ഇന്ന് നിശ്ചയിച്ചിട്ടുള്ളത്. തൊണ്ണൂറാം സാക്ഷി ഡോ.എന്‍.എ ബല്‍റാം മധുവിന്റെ പോസ്റ്റുമോര്‍ട്ടം നടത്തിയ ഡോക്ടര്‍മാരുടെ സംഘത്തിലെ തലവന്‍ ആണ്. ഇന്ന് ഹാജരാകാന്‍ അസൌകര്യം ഉണ്ടെന്ന് അദ്ദേഹം കോടതിയെ അറിയിച്ചിട്ടുണ്ട്. ഇന്ന് വിസ്തരിക്കുന്ന മറ്റൊരു സാക്ഷി കോട്ടത്തറ ആശുപത്രിയിലെ നഴ്‌സിങ് അസിസ്റ്റന്റ് നിജാമുദ്ദീന്‍ ആണ്.. 122 സാക്ഷികളാണ് കേസില്‍ ആകെയുള്ളത്. 25 സാക്ഷികള്‍ ഇതുവരെ കൂറുമാറി.