ഡോ. എം. ലീലാവതിക്ക് കേന്ദ്ര സാഹിത്യ അക്കാദമി ഫെലോഷിപ്പ് ... 'ഇത് വ്യക്തിപരമായ നേട്ടമായി കാണുന്നില്ല, മലയാളഭാഷയ്ക്കും സാഹിത്യത്തിനുമുള്ള അംഗീകാരമാണിത്'' കേന്ദ്ര സാഹിത്യ അക്കാദമിയുടെ വിശിഷ്ടാംഗത്വം സ്വീകരിച്ച് ഡോ. എം ലീലാവതി

മലയാളത്തിന്റെ എഴുത്തമ്മയുടെ വാക്കുകള്‍ക്ക് നിറഞ്ഞ സദസ്സ് ഹൃദയാഭിവാദ്യം അര്‍പ്പിക്കുകയുണ്ടായി. കൊച്ചി സര്‍വകലാശാലയുടെ ഹിന്ദി വിഭാഗം സെമിനാര്‍ ഓഡിറ്റോറിയത്തില്‍ ഇന്നലെ വൈകിട്ട് നാലിനായിരുന്നു വിശിഷ്ടാംഗത്വ സമര്‍പ്പണം.

ബഹുമതി സ്വീകരിച്ച് നടത്തിയ പ്രസംഗത്തിലുടനീളം ഡോ. എം ലീലാവതി തന്റെ ജീവിതമുഹൂര്‍ത്തങ്ങള്‍ അനുസ്മരിച്ചു. 1947ല്‍ ഇന്റര്‍മീഡിയറ്റ് സയന്‍സ് ഗ്രൂപ്പ് ഒന്നാംറാങ്കോടെ വിജയിച്ച തന്നെ സാഹിത്യപഠനത്തിലേക്ക് വഴിമാറ്റിവിട്ടത് മഹാരാജാസ് കോളേജ് പ്രിന്‍സിപ്പലായിരുന്ന പ്രൊഫ. ശങ്കരന്‍ നമ്പ്യാരാണ്.

ബിഎസ്സി കെമിസ്ട്രിക്കുചേര്‍ന്ന തന്നെ അദ്ദേഹം ബിഎ മലയാളത്തിലേക്കു മാറ്റി. കവിത ഇഷ്ടമായിരുന്ന അമ്മയാണ് ആദ്യഗുരു. അക്കാലത്തെ പ്രശസ്ത കവികളുടെ രചനകള്‍ അമ്മ നോട്ബുക്കില്‍ പകര്‍ത്തിയെഴുതി സൂക്ഷിച്ചിരുന്നു. ഈ കുറിപ്പുകളാണ് സാഹിത്യത്തിലേക്ക് അടുപ്പിച്ചത്. വഴികാട്ടികളായ ഗുരുക്കന്മാര്‍ക്കും നിരന്തരം പ്രോത്സാഹിപ്പിച്ച തന്റെ വായനക്കാര്‍ക്കും പ്രണാമം അര്‍പ്പിച്ചുകൊണ്ടാണ് ഡോ. എം ലീലാവതി പ്രസംഗം അവസാനിപ്പിച്ചത്.