കോടിയേരിയുമായി എയര് ആംബുലന്സ് കണ്ണൂര് വിമാനത്താവളത്തിലെത്തി; മുഖ്യമന്ത്രി വിമാനത്താവളത്തില്, നേതാക്കള് കോടിയേരിയുടെ മൃതദേഹം ഏറ്റുവാങ്ങും
മുതിർന്ന സിപിഎം നേതാവും കേരളത്തിലെ മുൻ സംസ്ഥാന സെക്രട്ടറിയുമായിരുന്ന കോടിയേരി ബാലകൃഷ്ണന്റെ മൃതദേഹവുമായി എയര് ആംബുലന്സ് കണ്ണൂര് വിമാനത്താവളത്തിലെത്തി. മുഖ്യമന്ത്രി പിണറായി വിജയന് വിമാനത്താവളത്തിലെത്തി.
ഉടനെ തന്നെ നടപടിക്രമങ്ങള് പൂര്ത്തിയാക്കി മൃതദേഹം 15 മിനിറ്റിനുള്ളില് പുറത്തിറക്കും. നിലവിൽ നൂറോളം റെഡ് വോളണ്ടിയര്മാരാണ് വിമാനത്താവളത്തിലുള്ളത്. മൃതദേഹം നേതാക്കള് ഏറ്റുവാങ്ങുന്നതിന് പിന്നാലെ തലശ്ശേരിയിലേക്കുള്ള വിലാപയാത്ര ആരംഭിക്കും. നേരത്തെ തീരുമാനിച്ചത് പോലെ തുറന്ന വാഹനത്തില് പ്രവര്ത്തകരുടെ അകമ്പടിയോടയായിരിക്കും വിലാപയാത്ര.
തുടർന്ന് നൂറോളം വാഹനങ്ങളും വിലാപയാത്രയെ അനുഗമിക്കും. ഇതിനായി ഗതാഗതം തടസം ഉണ്ടാകാത്ത വിധത്തില് ക്രമീകരണം ഏര്പ്പെടുത്തിയതായി നേതാക്കള് അറിയിച്ചു. കൂടാതെ വിലാപയാത്ര 14 കേന്ദ്രങ്ങളില് ജനങ്ങള്ക്ക് ആദരമര്പ്പിക്കാന് നിര്ത്തും. ഇന്ന് മുഴുവനും തലശ്ശേരി ടൗണ് ഹാളില് മൃതദേഹം പൊതുദര്ശനത്തിന് വെക്കും.
https://www.facebook.com/Malayalivartha
