കേരളത്തില് നിക്ഷേപ താല്പര്യങ്ങളുള്ള നോര്വീജിയന് കമ്പനികളുടെ ഇന്ത്യന് ചുമതലക്കാരുടെ സംഗമം ജനുവരിയില് കേരളത്തില് സംഘടിപ്പിക്കുമെന്ന് മുഖ്യമന്ത്രി പിണറായി വിജയന്
കേരളത്തില് നിക്ഷേപ താല്പര്യങ്ങളുള്ള നോര്വീജിയന് കമ്പനികളുടെ ഇന്ത്യന് ചുമതലക്കാരുടെ സംഗമം ജനുവരിയില് കേരളത്തില് സംഘടിപ്പിക്കുമെന്ന് മുഖ്യമന്ത്രി പിണറായി വിജയന്.
കേരളത്തിലെ നിക്ഷേപ സാധ്യതകളെ സംബന്ധിച്ച് ഓസ് ലെയില് സംഘടിപ്പിച്ച ബിസിനസ് മീറ്റില് സംസാരിക്കുകയായിരുന്നു മുഖ്യമന്ത്രി. ഇന്നോവേഷന് നോര്വ്വേ, നോര്വ്വേ ഇന്ത്യ ചേമ്പര് ഓഫ് കോമേഴ്സ് ആന്റ് ഇന്ഡസ്ട്രി, നോര്വ്വീജിയന് ബിസിനസ് അസോസിയേഷന് ഇന്ത്യ, എന്നീ സംഘടനകളുമായി ചേര്ന്ന് ഇന്ത്യന് എംബസിയും ഇന്ത്യയിലെ നോര്വ്വീജിയന് എംബസിയും ചേര്ന്നാണ് ബിസിനസ്സ് മീറ്റ് സംഘടിപ്പിച്ചിരുന്നത്. അമ്പത് പ്രധാന കമ്പനികളിലെ പ്രതിനിധികള് പങ്കെടുക്കുകയുണ്ടായി.
ഹൈഡ്രജന് പ്രോയുടെ സിഇഒ എറിക് ബോള്സ്റ്റാഡ്, മാലിന്യം വെന്ഡിംഗ് മെഷ്യനുകളിലൂടെ സംഭരിച്ച് സംസ്കരിക്കുന്ന പ്രശസ്ത കമ്പനിയായ ടോംറയുടെ വൈസ് പ്രസിഡന്റ് ജേക്കബ് റോഹന് ഹോഗ്, മാലിന്യ സംസ്കരണത്തിലെ ആഗോള സ്ഥാപനമായ കാമ്പിയുടെ സിഇഒ എറിക് ഫാഡ്സ്, എം ടി ആര് കമ്പനിയുടെ സിഇഒ സഞ്ജയ് ശര്മ്മ എന്നിവര് അവരവരുടെ സാധ്യതകളെ സംബന്ധിച്ച പ്രസന്റേഷനുകള് അവതരിപ്പിച്ചു.
ഹൈഡ്രജന് ഇന്ധനം, ഭക്ഷ്യ സംസ്കരണം, മത്സ്യമേഖല, ഷിപ്പിംഗ്, മാലിന്യ സംസ്കരണം തുടങ്ങിയ മേഖലകളില് നോര്വ്വീജിയന് കമ്പനികള് താല്പര്യം പ്രകടിപ്പിച്ചു. ഈ മേഖലകളിലെ കേരളത്തിന്റെ സാധ്യതകള് വിശദീകരിച്ച മുഖ്യമന്ത്രി. പുതിയ കരട് വ്യവസായ നയത്തെ സംരംഭകര് സ്വാഗതം ചെയ്തു.
കേരളത്തില് ഭക്ഷ്യസംസ്കരണ മേഖലയില് 150 കോടി രൂപയുടെ തുടര്നിക്ഷേപം നടത്തുമെന്ന് നോര്വീജിയന് കമ്പനി ഓര്ക്കലെ ബ്രാന്ഡഡ് കണ്സ്യൂമര് ഗുഡ്സ് അറിയിച്ചതായും മുഖ്യമന്ത്രി കഴിഞ്ഞ ദിവസം പറഞ്ഞിരുന്നു. സി.ഇ.ഒ. ആറ്റ്ലെ വിഡര് ആണ് മുഖ്യമന്ത്രി പിണറായി വിജയന് ഇക്കാര്യത്തില് ഉറപ്പു നല്കിയിട്ടുള്ളത്.
ഭക്ഷ്യസംസ്കരണ ഗവേഷണകേന്ദ്രം സ്ഥാപിക്കുന്നതിനും കര്ഷകര്ക്ക് വരുമാനം ഉറപ്പുവരുത്തുന്ന സംവിധാനം ഏര്പ്പെടുത്താനുമാണ് ഓര്ക്കലെ തീരുമാനിച്ചിരിക്കുന്നത്. പാരമ്പര്യേതര ഊര്ജരംഗത്തും നിക്ഷേപംനടത്താന് കമ്പനിക്ക് ലക്ഷ്യമുണ്ടെന്ന് നോര്വേയില്നടന്ന വ്യവസായ അവസരങ്ങളെക്കുറിച്ചുള്ള ചര്ച്ചയില് ആറ്റ്ലെ വ്യക്തമാക്കി.
കേരളത്തിലെ പ്രമുഖ ബ്രാന്ഡായ ഈസ്റ്റേണിന്റെ 67 ശതമാനം ഓഹരി വാങ്ങിയ ഓര്ക്കലെ ഇന്ത്യയില് പ്രവര്ത്തനം വ്യാപിപ്പിക്കാനാണ് ലക്ഷ്യമിടുന്നത്. കേരളം സുഗന്ധവ്യഞ്ജന മൂല്യവര്ധിത ഉത്പന്നങ്ങളുടെ കേന്ദ്രമാണെന്ന് മുഖ്യമന്ത്രി പിണറായി വിജയന് പറഞ്ഞു.
അതേസമയം മത്സ്യകയറ്റുമതിയില് മൂന്നാം സ്ഥാനത്തുള്ള കേരളത്തിലാണ് ഇന്ത്യയിലെ യൂറോപ്യന് അംഗീകാരമുള്ള സീ ഫുഡ് കമ്പനികളുടെ 75 ശതമാനവുമുള്ളത്. നേന്ത്രക്കായ, മരച്ചീനി, ചക്ക തുടങ്ങിയവയുടെ ഉത്പാദനത്തിലും കേരളം മുന്പിലാണ്. ഈ സാധ്യതകള് പ്രയോജനപ്പെടുത്താനായി ഭക്ഷ്യസംസ്കരണ മേഖലയ്ക്ക് പ്രാധാന്യം നല്കുന്നുണ്ടെന്നും വ്യക്തമാക്കി മുഖ്യമന്ത്രി .
"
https://www.facebook.com/Malayalivartha
