കേരള പോലീസില്‍ പോപ്പുലര്‍ ഫ്രണ്ടിന്റെ പ്രവര്‍ത്തകരും ചാരന്മാരുമുണ്ടെന്ന് തെളിഞ്ഞതോടെ കേന്ദ്ര അന്വേഷണ ഏജന്‍സികള്‍ക്ക് വീണ്ടു പണിയായി. പോപ്പുലര്‍ ഫ്രണ്ടിന്റെ അടിവേര് പിഴുതെടുത്ത് വാരിവലിച്ചെറിഞ്ഞ കേന്ദ്ര ഏജന്‍സികള്‍ അവരെ പൂണ്ടടങ്ങും പൂട്ടാന്‍ തന്നെ ഇറങ്ങിയിരിക്കുകയാണ്. കൂട്ടത്തില്‍ കേരളത്തില്‍ ആഴത്തില്‍ വേരൂന്നിയിട്ടുള്ള വര്‍ഗ്ഗീയ വിധ്വംസക ശക്തികള്‍ക്ക് നേരെയും അന്വേഷത്തിന്റെ കുന്തമുനകള്‍ പാഞ്ഞ് അടുക്കുന്ന ദിവസങ്ങളാണ് വരാന്‍ പോകുന്നത്. അതിലുമേറെ ഗൗരമായ കാര്യം കേരള പോലീസിലുണ്ടെന്ന ഇന്റലിജന്‍സ് വിഭാഗം പോപ്പുലര്‍ ഫ്രണ്ട് പോലീകാരെ സംസ്ഥാന സര്‍ക്കര്‍ വെള്ളപൂശിയെങ്കിലും കേന്ദ്രഏജന്‍സികള്‍ വിടുന്ന ലക്ഷണമില്ല. പോലീസ് സേനയില്‍ നിന്ന് കാണാതായ 25 തോക്കുകളും 12061 വെടിയുണ്ടകളും പോപ്പുലര്‍ ഫ്രണ്ടിന്റെ കൈകളിലെത്തിയോയെന്നുള്ള അന്വേഷണത്തിലേയ്ക്ക് കേന്ദ്ര ഏജന്‍സികള്‍ കടക്കുന്നതായാണ് വാര്‍ത്തകള്‍ വരുന്നത്.

.2019 ലെ സിഎജി റിപ്പോര്‍ട്ട് അടിസ്ഥാനമാക്കിയാണ് കൂടുതല്‍ അനവേഷണവുമായി കേന്ദ്ര സര്‍ക്കാര്‍ രംഗത്തെത്തിയിരിക്കുന്നത്. പൊലീസ് സേനയില്‍ നിന്നും തോക്കുകളും വെടിയുണ്ടകളും കാണാതായത് സംബന്ധിച്ച സിഎജി റിപ്പോര്‍ട്ടിന്മേല്‍ കേന്ദ്ര ഏജന്‍സികള്‍ വിവര ശേഖരണം ആരംഭിച്ചു കഴിഞ്ഞു. കാണാതായ വെടിക്കോപ്പുകള്‍ ദേശവിരുദ്ധ ശക്തികളുടെ പക്കല്‍ എത്തിയിട്ടുണ്ടോ എന്നതിനെക്കുറിച്ചാണ് ഇപ്പോള്‍ കേന്ദ്ര ഏജന്‍സികള്‍ അന്വേഷണം നടത്തുന്നത്.

സംസ്ഥാനത്തെ പോലീസിനെയും ആഭ്യന്തര വകുപ്പിനെയും പിടിച്ചുലച്ച സിഎജി റിപ്പോര്‍ട്ടാണ് 2019ല്‍ പുറത്തു വന്നത്. പോലീസിന്റെ പക്കല്‍ ഉണ്ടായിരുന്ന ആയുധങ്ങളില്‍ 25 തോക്കുകളും 12061 വെടിയുണ്ടകളും കാണാതായെന്നായിരുന്നു റിപ്പോര്‍ട്ടില്‍ ചൂണ്ടിക്കാണിച്ചിരുന്നത്. ഈ വിവരം പുറത്തറിയാതിരിക്കാന്‍ പൊലീസ് വാര്‍ത്ത മൂടി വച്ചതായും റിപ്പോര്‍ട്ടില്‍ ചൂണ്ടിക്കാണിച്ചിരുന്നു. റിപ്പോര്‍ട്ട് വിവാദമായതിനെത്തുടര്‍ന്ന് സര്‍ക്കാര്‍ പ്രശ്‌നത്തില്‍ ഇടപെടുകയും ക്രൈം ബ്രാഞ്ച് അന്വേഷണം പ്രഖ്യാപിക്കുകയുമായിരുന്നു. സിബിഐ അന്വേഷണം ഒഴിവാക്കാന്‍ വേണ്ടിയായിരുന്നു സര്‍ക്കാര്‍ അന്വേഷണം പ്രഖ്യാപിച്ചതെന്ന ആരോപണങ്ങള്‍ ആ സമയത്ത് ഉയര്‍ന്നിരുന്നു. സിഎജി റിപ്പോര്‍ട്ട് തെറ്റാണെന്നും തോക്കുകള്‍ കാണാതായിട്ടില്ലെന്നും 3000 വെടിയുണ്ടകള്‍ മാത്രമാണ് കാണാതായതെന്നും വ്യക്തമാക്കിക്കൊണ്ടുള്ള റിപ്പോര്‍ട്ടാണ് ക്രൈം ബ്രാഞ്ച് നല്‍കിയത്.

റിപ്പോര്‍ട്ടുകള്‍ രണ്ടും രണ്ടു കാര്യങ്ങള്‍ പറയുമ്പോള്‍ യഥാര്‍ത്ഥ വസ്തുതകള്‍ എന്താണെന്ന് പരിശോധിക്കുകയാണ് കേന്ദ്ര രഹസ്യാന്വേഷണ ഏജന്‍സികളുടെ ലക്ഷ്യം. വളരെ ഗുരുതരമായ വിവരങ്ങള്‍ അടങ്ങിയതാണ് സി എ ജി റിപ്പോര്‍ട്ടെന്നും കേന്ദ്ര ഏജന്‍സികള്‍ വിലയിരുത്തുന്നുണ്ട്. പൊലീസ് സേനയിലെ തോക്കുകളും വെടിയുണ്ടകളും കാണാതായ വിവരം പുറത്തുപോകാതിരിക്കാന്‍ ഉദ്യോഗസ്ഥന്മാര്‍ പരമാവധി ശ്രമിച്ചുവെന്നുള്ള സിഎജി റിപ്പോര്‍ട്ട് പരാമര്‍ശത്തെ വളരെ ഗൗരവത്തോടെയാണ് ആയുധ ശേഖരത്തിലെ കുറവ് പൊലീസിന് അറിയാമായിരുന്നിട്ടും അതിന് കാരണക്കാരായ കുറ്റവാളികളെ ശിക്ഷിക്കുന്നതിന് പകരം മൂടിവെക്കാനാണ് ഉദ്യോഗസ്ഥന്മാര്‍ ശ്രമിച്ചതെന്നാണ് സിഎജി റിപ്പോര്‍ട്ടില്‍ ചൂണ്ടിക്കാട്ടുന്നത്.

തിരുവനന്തപുരം സ്‌പെഷ്യല്‍ ആംഡ് പൊലീസ് ബറ്റാലിയനിലാണ് ആയുധങ്ങളുടെയും കാട്രിഡ്ജുകളുടെയും സ്റ്റോക്കില്‍ കുറവു കണ്ടത്. ആയുധങ്ങളുടെയും വെടിക്കോപ്പുകളുടെയും ചുമതലയുള്ള ഉദ്യോഗസ്ഥന്മാര്‍ ആഴ്ചയിലൊരിക്കലെങ്കിലും അവ പരിശോധിക്കുകയും, സ്റ്റോറില്‍ സൂക്ഷിച്ചിട്ടുള്ള ആയുധങ്ങളുടെയും വെടിക്കോപ്പുകളുടെയും കൃത്യത അതിനായി സൂക്ഷിച്ചിട്ടുള്ള ഒരു രജിസ്റ്ററില്‍ രേഖപ്പെടുത്തുകയും വേണമെന്നുള്ള നിര്‍ദ്ദേശം നേരത്തെ നിലവിലുണ്ടായിരുന്നു. കമ്പനി കമാന്‍ഡര്‍ അല്ലെങ്കില്‍ സര്‍ക്കിള്‍ ഇന്‍സ്‌പെക്ടര്‍മാര്‍ മാസത്തിലൊരിക്കല്‍ ആയുധങ്ങളുടെയും വെടിക്കോപ്പുകളുടെയും സ്റ്റോക്ക് റൂമില്‍ മിന്നല്‍ പരിശോധന നടത്തണമെന്നും അതിനായി സൂക്ഷിച്ചിട്ടുള്ള രജിസ്റ്ററില്‍ രേഖപ്പെടുത്തണമെന്നും നിര്‍ദ്ദേശിച്ചിരുന്നു. അതുപോലെതന്നെ പൊലീസ് സൂപ്രണ്ട് അല്ലെങ്കില്‍ കമാന്‍ഡന്റ് ആറുമാസത്തിലൊരിക്കല്‍ ആയുധങ്ങളുടെയും വെടിക്കോപ്പുകളുടെയും പരിശോധന നടത്തി കൃത്യത ഉറപ്പു വരുത്തണമെന്നും നിര്‍ദ്ദേശിച്ചിരുന്നു.

ഈ നിര്‍ദ്ദേശങ്ങള്‍ കാറ്റില്‍പ്പറത്തിയെന്ന് വ്യക്തമാക്കിക്കൊണ്ടാണ് ആയുധങ്ങളുടെ എണ്ണത്തില്‍ കുറവ് രേഖപ്പെടുത്തിയത്. രാജ്യവിരുദ്ധ ശക്തികളുടെ പക്കല്‍ ഈ ആയുധങ്ങള്‍ എത്തിയിട്ടുണ്ടോ എന്ന ആശങ്കയിലാണ് ആഭ്യന്തര വകുപ്പ്. നിയമവിരുദ്ധമായ പ്രവര്‍ത്തനങ്ങളുടെ പേരില്‍ പോപ്പുലര്‍ ഫ്രണ്ടിനെ നിരോധിക്കുക കൂടി ചെയ്തതോടെ ഈ ആശങ്കകള്‍ക്ക് വലിപ്പം വച്ചിരിക്കുകയാണ്. ഇതുകൊണ്ടാണ് ഈ ആയുധങ്ങള്‍ നിയമവിരുദ്ധ ശക്തികളുടെ കൈകളില്‍ എത്തിയിട്ടുണ്ടോ എന്ന പരിശോധനയുമായി കേന്ദ്ര അന്വേഷണ ഏജന്‍സികള്‍ രംഗത്ത് എത്തിയിരിക്കുന്നത്. കേരള പൊലീസില്‍ പോപ്പുലര്‍ ഫ്രണ്ട് സാന്നിധ്യമുണ്ടെന്ന് സ്ഥിരീകരിക്കപ്പെട്ടതോടെ ഈ ആശങ്കകള്‍ക്ക് ബലം വച്ചിരിക്കുകയാണെന്നാണ് പുറത്തുവരുന്ന റിപ്പോര്‍ട്ടുകള്‍.
മുഖ്യന്റെ വിദേശ ടൂര്‍ കഴിഞ്ഞ് നാട്ടിലെത്തുമ്പോള്‍ അന്വേഷണ ഏജന്‍സികള്‍ നാടൊട്ടുക്കും അരിച്ചു പെറുക്കും. കേരള പോലീസ് അന്വേഷണം മതിയാക്കിയ തോക്കുകളും തിരകളും കേന്ദ്ര ഏജന്‍സി പൊക്കിയെടുത്താല്‍ കേരള പോലീസിന് തലയില്‍ മുണ്ടിട്ട് നടക്കേണ്ടി വരും.