വോട്ടര്‍ പട്ടികയില്‍ പേരില്ലാത്തതിനാല്‍ നടന്‍ മമ്മൂട്ടിക്കും മകന്‍ ദുല്‍ഖര്‍ സല്‍മാനും കൊച്ചിയില്‍ വോട്ട് ചെയ്യാനാകാത്തതിനെ ചൊല്ലി എല്‍ഡിഎഫിലും യുഡിഎഫിലും തര്‍ക്കം. താരത്തിന്റെയും മകന്റെയും പേര് വെട്ടിയത് കോണ്‍ഗ്രസുകാരെന്നാണ് സിപിഎമ്മിന്റെ ആരോപണം. എന്നാല്‍ തങ്ങള്‍ക്കറിയില്ലെന്നാണ് യുഡിഎഫ് നേതാക്കള്‍ പറയുന്നത്. നടന്‍ ശ്രീനിവാസന്റെ പേരും വോട്ടര്‍പട്ടികയില്‍ ഇല്ലായിരുന്നു. മനപൂര്‍വം ഒഴിവാക്കിയെതെന്നാണ് നടന്റെ അഭിപ്രായം. മമ്മൂട്ടിയും ശ്രീനിവാസനും ഇടതുപാര്‍ട്ടികളോട് അനുഭാവം പുലര്‍ത്തുന്നവരാണ്. ഇതാണ് മൂന്ന് പേര്‍ക്കും വിനയായത്.
പുതിയ സിനിമയുടെ ഡബ്ബിങ്ങ് ജോലികള്‍ക്കായി കൊച്ചിയിലുള്ള മമ്മൂട്ടി പനമ്പിള്ളി നഗറിലെ വീട്ടിലുണ്ട്. മകനോടൊപ്പം പോളിങ്ങ് ബൂത്തിലെത്തി വോട്ട് ചെയ്യാന്‍ ഒരുങ്ങിയിരുന്ന മമ്മൂട്ടി വോട്ടില്ലെന്ന് അറിഞ്ഞതോടെ പരിപാടി മാറ്റി. മമ്മൂട്ടിയുടെ ഭാര്യ സുല്‍ഫത്തിന്റെ പേരു പട്ടികയിലുണ്ടെങ്കിലും അവര്‍ ചെന്നൈയിലായിരുന്നു. കഴിഞ്ഞ ലോക്‌സഭാ തെരഞ്ഞെടുപ്പിലും മമ്മൂട്ടിക്ക് വോട്ടില്ലായിരുന്നു. ഷൂട്ടിങ്ങിന് അവധി നല്‍കി വോട്ട് ചെയ്യാനായി എത്തിയപ്പോഴാണ് വോട്ടില്ലെന്ന വിവരം മമ്മൂട്ടി അന്ന് അറിയുന്നത്. കഴിഞ്ഞ നിയമസഭാ തെരഞ്ഞെടുപ്പിലാണ് മമ്മൂട്ടി അവസാനമായി വോട്ട് ചെയ്തത്. നിയമസഭാ തെരഞ്ഞെടുപ്പു നടക്കുമ്പോള്‍ എളംകുളം സ്‌കൈലൈന്‍ ഫഌറ്റിലായിരുന്നു മമ്മൂട്ടിയുടെ താമസം. എളംകുളത്തെ ബൂത്തിലായിരുന്നു വോട്ട്. പിന്നീടു പനമ്പിള്ളി നഗറിലെ വീട്ടിലേക്കു താമസം മാറ്റിയതോടെയാണു വോട്ടര്‍പട്ടികയില്‍ നിന്ന് പുറത്തായത്. എന്നാല്‍ നേരത്തെതന്നെ പനമ്പിള്ളി നഗറിലെ വീട്ടില്‍ താമസിച്ചിരുന്ന സുല്‍ഫത്തിന് ഇവിടെ വോട്ടര്‍പട്ടികയില്‍ പേരുണ്ട്.
തൃപ്പൂണിത്തുറയ്ക്കടുത്ത് കണ്ടനാട് താമസിക്കുന്ന നടന്‍ ശ്രീനിവാസനും വോട്ടര്‍പട്ടികയില്‍ പേരില്ലാത്തതിനാല്‍ വോട്ടു ചെയ്യാനായില്ല. വെണ്ണലയില്‍ വോട്ടറായ നടി കാവ്യാമാധവന്‍ മുംബൈയിലായതിനാല്‍ വോട്ട് ചെയ്യാനെത്തിയില്ല. ചലച്ചിത്ര താരങ്ങളായ കവിയൂര്‍ പൊന്നമ്മ കരുമാല്ലൂര്‍ സ്‌കൂളിലും ദിലീപ് ആലുവയിലും ജയസൂര്യ കടവന്ത്ര സെന്റ് ജോസഫ്‌സ് സ്‌കൂളിലും ലാലു അലക്‌സ് പിറവത്തും രമ്യ നമ്പീശന്‍ ചോറ്റാനിക്കരയിലും മീരാ നന്ദന്‍ പുന്നക്കല്‍ സ്‌കൂളിലും വോട്ട് ചെയ്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha