വീണ്ടും അലര്ട്ടുകള്... മഴയുടെ ഗതി മാറ്റി ബംഗാള് ഉള്ക്കടലിലെ ന്യൂനമര്ദം നാളെ തീവ്രന്യൂനമര്ദമായും തുടര്ന്നു ചുഴലിക്കാറ്റായും ശക്തി പ്രാപിക്കാന് സാധ്യത; തിങ്കളാഴ്ചയോടെ ബംഗാള് ഉള്ക്കടലില് സിത്രംഗ് ചുഴലിക്കാറ്റ്; 6 ജില്ലകളില് ശക്തമായ മഴയ്ക്ക് സാധ്യത
വീണ്ടും കേരളം മഴഭീതിയിലേക്ക്. സംസ്ഥാനത്ത് മഴ ഇനിയും ശക്തി പ്രാപിക്കുമെന്നാണ് സൂചന. ബംഗാള് ഉള്ക്കടലിലെ ന്യൂനമര്ദം നാളെ തീവ്രന്യൂനമര്ദമായും തുടര്ന്നു ചുഴലിക്കാറ്റായും ശക്തി പ്രാപിക്കാന് സാധ്യതയെന്നു കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. നാളെ വരെ കേരളത്തില് ഒറ്റപ്പെട്ട സ്ഥലങ്ങളില് ശക്തമായ മഴയ്ക്കും ഇടിമിന്നലിനും സാധ്യത.
കേരള തീരത്ത് ഇന്നും ലക്ഷദ്വീപ് തീരത്ത് ഞായര് വരെയും മത്സ്യബന്ധനത്തിനു വിലക്കേര്പ്പെടുത്തി. ഇടുക്കി, പത്തനംതിട്ട, തൃശൂര്, പാലക്കാട്, കോഴിക്കോട്, വയനാട് എന്നീ 6 ജില്ലകളില് ഇന്നു യെലോ അലര്ട്ട് പ്രഖ്യാപിച്ചു. കോട്ടയം, ഇടുക്കി, പത്തനംതിട്ട, എറണാകുളം, കോഴിക്കോട്, വയനാട് ജില്ലകളില് നാളെ യെലോ അലര്ട്ട് ആണ്.
വടക്കന് ആന്ഡമാന് കടലിനു മുകളില് രൂപപ്പെട്ട ന്യൂനമര്ദം പടിഞ്ഞാറ്- വടക്കു പടിഞ്ഞാറന് ദിശയില് സഞ്ചരിച്ചു നാളെ മധ്യ ബംഗാള് ഉള്ക്കടലില് തീവ്രന്യൂനമര്ദമാകും. തുടര്ന്ന് 48 മണിക്കൂറില് ചുഴലിക്കാറ്റായും ശക്തി പ്രാപിച്ചേക്കും. തെക്കു കിഴക്കന് അറബിക്കടലില് മഹാരാഷ്ട്ര തീരത്തിനു സമീപം മറ്റൊരു ചക്രവാതച്ചുഴിയും നിലനില്ക്കുന്നുണ്ട്.
സംസ്ഥാനത്ത് ഇന്നും ശക്തമായ ഒറ്റപ്പെട്ടയിടങ്ങളില് ശക്തമായ മഴയ്ക്ക് സാധ്യത. ആറ് ജില്ലകളില് ഇന്ന് യെല്ലോ അലര്ട്ട് പ്രഖ്യാപിച്ചിട്ടുണ്ട്. കേരളാ തീരത്തും ലക്ഷദ്വീപ് തീരത്തും മത്സ്യബന്ധനത്തിന് പോകരുത് എന്നും കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്കുന്നു.
കേരളത്തില് അടുത്ത ദിവസങ്ങളിലും മഴ തുടരാനാണ് സാധ്യത. തുലാവര്ഷത്തിന് മുന്നോടിയായുള്ള ഇടിയോട് കൂടിയ മഴയ്ക്കും സാധ്യതയുണ്ട്.
അതേസമയം ഇടിമിന്നല്-ജാഗ്രത നിര്ദ്ദേശങ്ങള് പാലിക്കേണ്ടതായിട്ടുണ്ട്. ഇടിമിന്നല് അപകടകാരികളാണ്. അവ മനുഷ്യന്റെയും മൃഗങ്ങളുടെയും ജീവനും വൈദ്യുത-ആശയവിനിമയ ശൃംഖലകള്ക്കും വൈദ്യുത ചാലകങ്ങളുമായി ബന്ധിപ്പിച്ചിട്ടുള്ള വീട്ടുപകരണങ്ങള്ക്കും വലിയ നാശനഷ്ടം സൃഷ്ടിക്കുന്നുണ്ട്. ആയതിനാല് പൊതുജനങ്ങള് മുന്കരുതല് കാര്മേഘം കണ്ട് തുടങ്ങുന്ന സമയം മുതല് തന്നെ സ്വീകരിക്കേണ്ടതാണ്. ഇടിമിന്നല് ദൃശ്യമല്ല എന്നതിനാല് ഇത്തരം മുന്കരുതല് സ്വീകരിക്കുന്നതില് നിന്നും വിട്ടുനില്ക്കരുത്.
- ഇടിമിന്നലിന്റെ ആദ്യ ലക്ഷണം കണ്ടുകഴിഞ്ഞാല് ഉടന് തന്നെ സുരക്ഷിതമായ കെട്ടിടത്തിനുള്ളിലേക്ക് മാറുക. തുറസ്സായ സ്ഥലങ്ങളില് തുടരുന്നത് ഇടിമിന്നലേല്ക്കാനുള്ള സാധ്യത വര്ധിപ്പിക്കും.
- ശക്തമായ കാറ്റിനും ഇടിമിന്നലിനും സാധ്യതയുള്ള ഘട്ടത്തില് ജനലും വാതിലും അടച്ചിടുക, വാതിലിനും ജനലിനും അടുത്ത് നില്ക്കാതെയിരിക്കുക. കെട്ടിടത്തിനകത്ത് തന്നെ ഇരിക്കുകയും പരമാവധി ഭിത്തിയിലോ തറയിലോ സ്പര്ശിക്കാതിരിക്കാന് ശ്രമിക്കുകയും ചെയ്യുക.
- ഗൃഹോപകരണങ്ങളുടെ വൈദ്യുതി ബന്ധം വിഛേദിക്കുക. വൈദ്യുതി ഉപകരണങ്ങളുടെ സാമീപ്യവും ഇടിമിന്നലുള്ള സമയത്ത് ഒഴിവാക്കുക.
- ഇടിമിന്നലുള്ള സമയത്ത് ടെലിഫോണ് ഉപയോഗിക്കുന്നത് ഒഴിവാക്കണം. മൊബൈല് ഫോണ് ഉപയോഗിക്കുന്നത് കൊണ്ട് കുഴപ്പമില്ല.
- കുട്ടികള് ഉച്ചക്ക് 2 മണി മുതല് രാത്രി 10 മണി വരെ അന്തരീക്ഷം മേഘാവൃതമാണെങ്കില്, തുറസായ സ്ഥലത്തും, ടെറസ്സിലും കളിക്കുന്നത് ഒഴിവാക്കുക.
- ഇടിമിന്നലുള്ള സമയത്ത് വൃക്ഷങ്ങളുടെ ചുവട്ടില് നില്ക്കരുത്. വാഹനങ്ങള് മരച്ചുവട്ടില് പാര്ക്ക് ചെയ്യുകയുമരുത്.
- ഇടിമിന്നലുള്ള സമയത്ത് വാഹനത്തിനകത്ത് തന്നെ തുടരുക. കൈകാലുകള് പുറത്തിടാതിരിക്കുക. വാഹനത്തിനകത്ത് സുരക്ഷിതരായിരിക്കും. സൈക്കിള്, ബൈക്ക്, ട്രാക്ടര് തുടങ്ങിയ വാഹനങ്ങളിലുള്ള യാത്ര ഇടിമിന്നല് സമയത്ത് ഒഴിവാക്കുകയും ഇടിമിന്നല് അവസാനിക്കുന്നത് വരെ സുരക്ഷിതമായ ഒരു കെട്ടിടത്തില് അഭയം തേടുകയും വേണം.
- മഴക്കാറ് കാണുമ്പോള് തുണികള് എടുക്കാന് ടെറസ്സിലേക്കോ, മുറ്റത്തേക്കോ ഇടിമിന്നലുള്ള സമയത്ത് പോകരുത്.
- കാറ്റില് മറിഞ്ഞു വീഴാന് സാധ്യതയുള്ള വസ്തുക്കള് കെട്ടി വെക്കുക.
- ഇടിമിന്നലുള്ള സമയത്ത് കുളിക്കുന്നത് ഒഴിവാക്കുക. ടാപ്പുകളില് നിന്ന് വെള്ളം ശേഖരിക്കുന്നതും ഒഴിവാക്കുക. പൈപ്പുകളിലൂടെ മിന്നല് മൂലമുള്ള വൈദ്യുതി സഞ്ചരിച്ചേക്കാം.
https://www.facebook.com/Malayalivartha
